ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับภาษาไทย   บาลีอักษรไทย   บาลีอักษรโรมัน 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๙ ภาษาบาลี อักษรไทย พระสุตตันตปิฎกเล่มที่ ๒๑ สุตฺต. ขุ. มหานิทฺเทโส
     [๕๙๗]   อุทฺธํ โส โลกสฺมึ วิวาทเมตีติ อุทฺธํ [๓]- วุจฺจติ อนาคตํ ฯ
อตฺตโน    วาทํ   อุทฺธํ   ฐเปตฺวา   สยเมว   กลหํ   ภณฺฑนํ   วิคฺคหํ
วิวาทํ   เมธคํ   เอติ  อุเปติ  อุปคจฺฉติ  คณฺหาติ  ปรามสติ  อภินิวิสตีติ
เอวมฺปิ   อุทฺธํ   โส   โลกสฺมึ   วิวาทเมติ  ฯ  อถวา  อญฺเญน  อุทฺธํ
วาเทน   สทฺธึ   กลหํ   กโรติ   ภณฺฑนํ  กโรติ  วิคฺคหํ  กโรติ  วิวาทํ
กโรติ   เมธคํ   กโรติ   น   ตฺวํ   อิมํ  ธมฺมวินยํ  อาชานาสิ  ฯเปฯ
นิพฺเพเธหิ วา สเจ ปโหสีติ เอวมฺปิ อุทฺธํ โส โลกสฺมึ วิวาทเมติ ฯ
@เชิงอรรถ:  สพฺพตฺถ โปฏฺฐเกสุ ส อิติ ทิสฺสติ ฯ  ม. กุพฺพติ ฯ ยุ. กุรุเต ฯ  ม. โส ฯ
     [๕๙๘]   หิตฺวาน   สพฺพานิ   วินิจฺฉยานีติ   วินิจฺฉยา   วุจฺจนฺติ
ทฺวาสฏฺฐี    ทิฏฺฐิคตานิ    ฯ    สพฺพา   วินิจฺฉิตทิฏฺฐิโย   ๑-   หิตฺวา
จชิตฺวา   ปริจฺจชิตฺวา   ชหิตฺวา   ปชหิตฺวา   วิโนทิตฺวา   พฺยนฺตีกริตฺวา
อนภาวงฺคเมตฺวาติ หิตฺวาน สพฺพานิ วินิจฺฉยานิ ฯ
     [๕๙๙]   น  เมธคํ  กูรุเต  ชนฺตุ  โลเกติ  น  กลหํ  กโรติ  น
ภณฺฑนํ   กโรติ   น   วิคฺคหํ   กโรติ   น   วิวาทํ  กโรติ  น  เมธคํ
กโรติ   ฯ   วุตฺตํ  เหตํ  ภควตา  เอวํ  วิมุตฺตจิตฺโต  โข  อคฺคิเวสฺสน
ภิกฺขุ   น   เกนจิ   สํวทติ   น   เกนจิ   วิวทติ  ยญฺจ  โลเก  วุตฺตํ
เตน   จ   โวหรติ   อปรามสนฺติ   ฯ   ชนฺตูติ  สตฺโต  นโร  มานโว
โปโส   ปุคฺคโล   ชีโว   ชาตุ  ๒-  ชนฺตุ  อินฺทคู  มนุโช  ฯ  โลเกติ
อปายโลเก     มนุสฺสโลเก     เทวโลเก    ขนฺธโลเก    ธาตุโลเก
อายตนโลเกติ น เมธคํ กูรุเต ชนฺตุ โลเก ฯ เตนาห ภควา
                      วินิจฺฉเย ฐตฺวา สยํ ปมาย
                      อุทฺธํ โส โลกสฺมึ วิวาทเมติ
                      หิตฺวาน สพฺพานิ วินิจฺฉยานิ
                      น เมธคํ กูรุเต ชนฺตุ โลเกติ ฯ
                             ทฺวาทสโม จูฬวิยูหสุตฺตนิทฺเทโส นิฏฺฐิโต ฯ
                                         -------------------
@เชิงอรรถ:  ม. ทิฏฺฐิวินิจฺฉยา สพฺเพ วินิจฺฉเย ... ฯ  ม. ชาคุ ฯ ยุ. ชคู ฯ
                                  เตรสโม มหาวิยูหสุตฺตนิทฺเทโส
     [๖๐๐]        เยเกจิเม ทิฏฺฐิปริพฺพสานา
                       อิทเมว สจฺจนฺติ ปวาทยนฺติ ๑-
                       สพฺเพว เต นินฺทมนฺวานยนฺติ
                       อโถ ปสํสมฺปิ ลภนฺติ ตตฺถ ฯ
     [๖๐๑]   เยเกจิเม   ทิฏฺฐิปริพฺพสานาติ  เยเกจีติ  สพฺเพน  สพฺพํ
สพฺพถา   สพฺพํ   อเสสํ   นิสฺเสสํ   ปริยาทายวจนเมตํ   เยเกจีติ   ฯ
ทิฏฺฐิปริพฺพสานาติ     สนฺเตเก     สมณพฺราหฺมณา    ทิฏฺฐิคติกา    เต
ทฺวาสฏฺฐิยา   ทิฏฺฐิคตานํ   อญฺญตรญฺญตรํ  ทิฏฺฐิคตํ  คเหตฺวา  อุคฺคเหตฺวา
คณฺหิตฺวา   ปรามสิตฺวา   อภินิวิสิตฺวา   สกาย   สกาย  ทิฏฺฐิยา  วสนฺติ
สํวสนฺติ   อาวสนฺติ  ปริวสนฺติ  ฯ  ยถา  อาคาริกา  วา  ฆเรสุ  วสนฺติ
สาปตฺติกา   วา   อาปตฺตีสุ   วสนฺติ   สกิเลสา  วา  กิเลเสสุ  วสนฺติ
เอวเมว    สนฺเตเก   สมณพฺราหฺมณา   ทิฏฺฐิคติกา   เต   ทฺวาสฏฺฐิยา
ทิฏฺฐิคตานํ   อญฺญตรญฺญตรํ   ทิฏฺฐิคตํ   คเหตฺวา   อุคฺคเหตฺวา  คณฺหิตฺวา
ปรามสิตฺวา   อภินิวิสิตฺวา   สกาย   สกาย   ทิฏฺฐิยา   วสนฺติ  สํวสนฺติ
อาวสนฺติ ปริวสนฺตีติ เยเกจิเม ทิฏฺฐิปริพฺพสานา ฯ
     [๖๐๒]   อิทเมว  สจฺจนฺติ  ปวาทยนฺตีติ  สสฺสโต  โลโก  อิทเมว
สจฺจํ    โมฆมญฺญนฺติ    วทนฺติ   กเถนฺติ   ภณนฺติ   ทีปยนฺติ   โวหรนฺติ
อสสฺสโต  โลโก  ฯเปฯ  เนว  โหติ  น  น  โหติ  ตถาคโต ปรมฺมรณา
อิทเมว      สจฺจํ     โมฆมญฺญนฺติ     วทนฺติ     กเถนฺติ     ภณนฺติ
@เชิงอรรถ:  ม. จ วาทยนฺติ ฯ
ทีปยนฺติ โวหรนฺตีติ อิทเมว สจฺจนฺติ ปวาทยนฺติ ฯ
     [๖๐๓]   สพฺเพว    เต    นินฺทมนฺวานยนฺตีติ    สพฺเพว   เต
สมณพฺราหฺมณา      นินฺทเมว     อเนฺวนฺติ     ครหเมว     อเนฺวนฺติ
อกิตฺติเมว    อเนฺวนฺติ    สพฺเพ    นินฺทิตาเยว   โหนฺติ   ครหิตาเยว
โหนฺติ อกิตฺติตาเยว โหนฺตีติ สพฺเพว เต นินฺทมนฺวานยนฺติ ฯ
     [๖๐๔]   อโถ   ปสํสมฺปิ  ลภนฺติ  ตตฺถาติ  ตตฺถ  สกาย  ทิฏฺฐิยา
สกาย   ขนฺติยา   สกาย   รุจิยา  สกาย  ลทฺธิยา  ปสํสํ  โถมนํ  กิตฺตึ
วณฺณหาริกํ   ลภนฺติ   ปฏิลภนฺติ  [๑]-  อธิคจฺฉนฺติ  ๒-  วินฺทนฺตีติ  อโถ
ปสํสมฺปิ ลภนฺติ ตตฺถ ฯ เตนาห โส นิมฺมิโต
                       เยเกจิเม ทิฏฺฐิปริพฺพสานา
                       อิทเมว สจฺจนฺติ ปวาทยนฺติ
                       สพฺเพว เต นินฺทมนฺวานยนฺติ
                       อโถ ปสํสมฺปิ ลภนฺติ ตตฺถาติ ฯ
     [๖๐๕]        อปฺปํ หิ เอตํ น อลํ สมาย
                       ทุเว วิวาทสฺส ผลานิ พฺรูมิ
                       เอตมฺปิ ทิสฺวา น วิวาทเยถ ๓-
                       เขมาภิปสฺสํ อวิวาทภุมฺมํ ๔- ฯ
     [๖๐๖]   อปฺปํ   หิ  เอตํ  น  อลํ  สมายาติ  อปฺปํ  หิ  เอตนฺติ
อปฺปกํ   เอตํ   โอมกํ   เอตํ  โถกํ  เอตํ  ลามกํ  เอตํ  ชตุกฺกํ  เอตํ
ปริตฺตกํ   เอตนฺติ   อปฺปํ   หิ   เอตํ   ฯ   น   อลํ  สมายาติ  นาลํ
@เชิงอรรถ:  โป. ม. อุปคจฺฉนฺติ ฯ  ม. อยํ ปาโฐ น ทิสฺสติ ฯ  ยุ. วิวาทิเยถ ฯ
@ ม. อวิวาทภุมฺมึ ฯ
ราคสฺส    สมาย    โทสสฺส    สมาย    โมหสฺส    สมาย   โกธสฺส
อุปนาหสฺส    มกฺขสฺส    ปฬาสสฺส    อิสฺสาย    มจฺฉริยสฺส    มายาย
สาเฐยฺยสฺส    ถมฺภสฺส    สารมฺภสฺส    มานสฺส    อติมานสฺส   มทสฺส
ปมาทสฺส        สพฺพกิเลสานํ       สพฺพทุจฺจริตานํ       สพฺพทรถานํ
สพฺพปริฬาหานํ          สพฺพสนฺตาปานํ         สพฺพากุสลาภิสงฺขารานํ
สมาย      อุปสมาย      วูปสมาย      นิพฺพานาย     ปฏินิสฺสคฺคาย
ปฏิปฺปสฺสทฺธิยาติ อปฺปํ หิ เอตํ น อลํ สมาย ฯ
     [๖๐๗]   ทุเว  วิวาทสฺส  ผลานิ  พฺรูมีติ  ทิฏฺฐิกลหสฺส ทิฏฺฐิภณฺฑนสฺส
ทิฏฺฐิวิคฺคหสฺส    ทิฏฺฐิวิวาทสฺส    ทิฏฺฐิเมธคสฺส   เทฺว   ผลานิ   โหนฺติ
ชยปราชโย   โหติ   ลาภาลาโภ   โหติ   ยสายโส  โหติ  นินฺทาปสํโส
โหติ    สุขทุกฺขํ   โหติ   โสมนสฺสโทมนสฺสํ   โหติ   อิฏฺฐานิฏฺฐํ   โหติ
อนุนยปฏิฆํ   โหติ   อุคฺฆาตินิคฺฆาติ   โหติ   อนุโรธวิโรโธ   โหติ   ฯ
อถวา      ตํ      กมฺมํ     นิรยสํวตฺตนิกํ     ติรจฺฉานโยนิกสํวตฺตนิกํ
ปิตฺติวิสยิกสํวตฺตนิกนฺติ     พฺรูมิ     อาจิกฺขามิ    เทเสมิ    ปญฺญาเปมิ
ปฏฺฐเปมิ    วิวรามิ    วิภชามิ    อุตฺตานีกโรมิ    ปกาเสมีติ    ทุเว
วิวาทสฺส ผลานิ พฺรูมิ ฯ
     [๖๐๘]   เอตมฺปิ  ทิสฺวา  น  วิวาทเยถาติ  เอตมฺปิ  ทิสฺวาติ เอตํ
อาทีนวํ   ทิสฺวา   ปสฺสิตฺวา   ตุลยิตฺวา   ตีรยิตฺวา   วิภาวยิตฺวา  วิภูตํ
กตฺวา    ทิฏฺฐิกลเหสุ    ทิฏฺฐิภณฺฑเนสุ    ทิฏฺฐิวิคฺคเหสุ    ทิฏฺฐิวิวาเทสุ
ทิฏฺฐิเมธเคสูติ    เอตมฺปิ    ทิสฺวา    ฯ    น    วิวาทเยถาติ    น
กลหํ   กเรยฺย   น   ภณฺฑนํ   กเรยฺย  น  วิคฺคหํ  กเรยฺย  น  วิวาทํ
กเรยฺย   น   เมธคํ   กเรยฺย   กลหภณฺฑนวิคฺคหวิวาทเมธคํ   ปชเหยฺย
วิโนเทยฺย      พฺยนฺตีกเรยฺย     อนภาวงฺคเมยฺย     กลหภณฺฑนวิคฺคห-
วิวาทเมธคา   อารโต   อสฺส   วิรโต  ปฏิวิรโต  นิกฺขนฺโต  นิสฺสฏฺโฐ
วิปฺปมุตฺโต     วิสญฺญุตฺโต     วิมริยาทิกเตน    เจตสา    วิหเรยฺยาติ
เอตมฺปิ ทิสฺวา น วิวาทเยถ ฯ
     [๖๐๙]   เขมาภิปสฺสํ    อวิวาทภุมฺมนฺติ    อวิวาทภุมฺมํ   วุจฺจติ
อมตนิพฺพานํ     โย     โส    สพฺพสงฺขารสมโถ    สพฺพูปธิปฏินิสฺสคฺโค
ตณฺหกฺขโย   วิราโค   นิโรโธ  นิพฺพานํ  ฯ  เอตํ  อวิวาทภุมฺมํ  เขมโต
ตาณโต   เลณโต   สรณโต   อภยโต   อจฺจุตโต   อมตโต  นิพฺพานโต
ปสฺสนฺโต    ทกฺขนฺโต    โอโลเกนฺโต    นิชฺฌายนฺโต    อุปปริกฺขนฺโตติ
เขมาภิปสฺสํ อวิวาทภุมฺมํ ฯ เตนาห ภควา
                       อปฺปํ หิ เอตํ น อลํ สมาย
                       ทุเว วิวาทสฺส ผลานิ พฺรูมิ
                       เอตมฺปิ ทิสฺวา น วิวาทเยถ
                       เขมาภิปสฺสํ อวิวาทภุมฺมนฺติ ฯ
     [๖๑๐]        ยากาจิมา สมฺมติโย ๑- ปุถุชฺชา
                       สพฺพาว เอตา น อุเปติ วิทฺธา
                       อนูปโย โส อุปยํ กิเมยฺย
                       ทิฏฺเฐ สุเต ขนฺติมกุพฺพมาโน ฯ
@เชิงอรรถ:  ม. สมฺมุติโย ฯ
     [๖๑๑]   ยากาจิมา   สมฺมติโย   ปุถุชฺชาติ   ยากาจีติ   สพฺเพน
สพฺพํ   สพฺพถา  สพฺพํ  อเสสํ  นิสฺเสสํ  ปริยาทายวจนเมตํ  ยากาจีติ  ฯ
สมฺมติโยติ   สมฺมติโย   วุจฺจนฺติ   ทฺวาสฏฺฐี   ทิฏฺฐิคตานิ   ฯ  ปุถุชฺชาติ
ปุถุชฺชเนหิ   ชนิตา   วา   ตา  สมฺมติโยติ  ปุถุชฺชา  ฯ  ปุถุนานาชเนหิ
ชนิตา วา ตา สมฺมติโยติ ปุถุชฺชาติ ยากาจิมา สมฺมติโย ปุถุชฺชา ฯ
     [๖๑๒]   สพฺพาว  เอตา  น  อุเปติ  วิทฺธาติ  วิทฺธา  วิชฺชาคโต
ญาณี   วิภาวี   เมธาวี   สพฺพาว   เอตา   ทิฏฺฐิสมฺมติโย   เนติ   น
อุเปติ    น    อุปคจฺฉติ   น   คณฺหาติ   น   ปรามสติ   นาภินิวิสตีติ
สพฺพาว เอตา น อุเปติ วิทฺธา ฯ
     [๖๑๓]   อนูปโย   โส  อุปยํ  กิเมยฺยาติ  อุปโยติ  เทฺว  อุปยา
ตณฺหูปโย   จ   ทิฏฺฐูปโย   จ   ฯเปฯ   อยํ   ตณฺหูปโย   ฯเปฯ  อยํ
ทิฏฺฐูปโย    ฯ    ตสฺส    ตณฺหูปโย   ปหีโน   ทิฏฺฐูปโย   ปฏินิสฺสฏฺโฐ
ตณฺหูปยสฺส     ปหีนตฺตา     ทิฏฺฐูปยสฺส     ปฏินิสฺสฏฺฐตฺตา     อนูปโย
ปุคฺคโล    กึ    รูปํ   อุเปยฺย   อุปคจฺเฉยฺย   คเณฺหยฺย   ปรามเสยฺย
อภินิวิเสยฺย   อตฺตา   เมติ  ฯ  กึ  เวทนํ  กึ  สญฺญํ  กึ  สงฺขาเร  กึ
วิญฺญาณํ   กึ   คตึ   กึ   อุปปตฺตึ  กึ  ปฏิสนฺธึ  กึ  ภวํ  กึ  สํสารํ  กึ
วฏฺฏํ   อุเปยฺย   อุปคจฺเฉยฺย   คเณฺหยฺย   ปรามเสยฺย   อภินิวิเสยฺยาติ
อนูปโย โส อุปยํ กิเมยฺย ฯ
     [๖๑๔]   ทิฏฺเฐ  สุเต  ขนฺติมกุพฺพมาโนติ  ทิฏฺเฐ  วา  ทิฏฺฐสุทฺธิยา
วา    สุเต   วา   สุตสุทฺธิยา   วา   มุเต   วา   มุตสุทฺธิยา   วา
ขนฺตึ    อกุพฺพมาโน   ฉนฺทํ   อกุพฺพมาโน   เปมํ   อกุพฺพมาโน   ราคํ
อกุพฺพมาโน      อชนยมาโน      อสญฺชนยมาโน      อนิพฺพตฺตยมาโน
นาภินิพฺพตฺตยมาโนติ      ทิฏฺเฐ      สุเต     ขนฺติมกุพฺพมาโน     ฯ
เตนาห ภควา
                       ยากาจิมา สมฺมติโย ปุถุชฺชา
                       สพฺพาว เอตา น อุเปติ วิทฺธา
                       อนูปโย โส อุปยํ กิเมยฺย
                       ทิฏฺเฐ สุเต ขนฺติมกุพฺพมาโนติ ฯ
     [๖๑๕]        สีลุตฺตมา สญฺญเมนาหุ สุทฺธึ
                       วตฺตํ สมาทาย อุปฏฺฐิตาเส
                       อิเธว สิกฺเขม อถสฺส สุทฺธึ
                       ภวูปนีตา กุสลาวทานา ฯ
     [๖๑๖]   สีลุตฺตมา     สญฺญเมนาหุ     สุทฺธินฺติ     สนฺเตเก
สมณพฺราหฺมณา     สีลุตฺตมวาทา     เต    สีลมตฺเตน    สญฺญมมตฺเตน
สํวรมตฺเตน   อวีติกฺกมมตฺเตน   สุทฺธึ   วิสุทฺธึ   ปริสุทฺธึ   มุตฺตึ  วิมุตฺตึ
ปริมุตฺตึ   ๑-   อาหุ   วทนฺติ   กเถนฺติ  ภณนฺติ  ทีปยนฺติ  โวหรนฺติ  ฯ
สมณมุณฺฑิกาปุตฺโต    เอวมาห    จตูหิ    โข    อหํ   ถปติ   ธมฺเมหิ
สมนฺนาคตํ     ปุริสปุคฺคลํ     ปญฺญาเปมิ     สมฺปนฺนกุสลํ     ปรมกุสลํ
อุตฺตมปฺปตฺติปฺปตฺตํ   สมณํ   อโยชฺฌํ   กตเมหิ   จตูหิ   อิธ   ถปติ  ๒-
น   กาเยน   ปาปกมฺมํ   กโรติ   น  ปาปิกํ  วาจํ  ภาสติ  น  ปาปกํ
สงฺกปฺปํ   สงฺกปฺปติ   น   ปาปกํ   อาชีวํ   อาชีวติ   อิเมหิ  โข  อหํ
@เชิงอรรถ:  ม. ปริวิมุตฺตึ ฯ  โป. ม. คหปติ ฯ
ถปติ     จตูหิ     ธมฺเมหิ     สมนฺนาคตํ    ปุริสปุคฺคลํ    ปญฺญาเปมิ
สมฺปนฺนกุสลํ    ปรมกุสลํ    อุตฺตมปฺปตฺติปฺปตฺตํ    สมณํ    อโยชฺฌํ    ฯ
เอวเมว   สนฺเตเก   สมณพฺราหฺมณา   สีลุตฺตมวาทา   เต   สีลมตฺเตน
สญฺญมมตฺเตน     สํวรมตฺเตน     อวีติกฺกมมตฺเตน     สุทฺธึ     วิสุทฺธึ
ปริสุทฺธึ    มุตฺตึ   วิมุตฺตึ   ปริมุตฺตึ   อาหุ   วทนฺติ   กเถนฺติ   ภณนฺติ
ทีปยนฺติ โวหรนฺตีติ สีลุตฺตมา สญฺญเมนาหุ สุทฺธึ ฯ
     [๖๑๗]   วตฺตํ   สมาทาย   อุปฏฺฐิตาเสติ   วตฺตนฺติ   หตฺถิวตฺตํ
วา  อสฺสวตฺตํ  วา  โควตฺตํ  วา  อชวตฺตํ  วา  กุกฺกุรวตฺตํ วา กากวตฺตํ
วา    วาสุเทววตฺตํ   วา   [๑]-   ปุณฺณภทฺทวตฺตํ   วา   มณิภทฺทวตฺตํ
วา   อคฺคิวตฺตํ   วา   นาควตฺตํ   วา  สุปณฺณวตฺตํ  วา  ยกฺขวตฺตํ  วา
อสุรวตฺตํ   วา   คนฺธพฺพวตฺตํ   วา   มหาราชวตฺตํ  วา  จนฺทวตฺตํ  วา
สุริยวตฺตํ  วา  อินฺทวตฺตํ  วา  พฺรหฺมวตฺตํ  วา  เทววตฺตํ วา ทิสวตฺตํ ๒-
วา    อาทาย   สมาทาย   อาทยิตฺวา   ๓-   คณฺหิตฺวา   ปรามสิตฺวา
อภินิวิสิตฺวา    อุปฏฺฐิตา   ปจฺจุปฏฺฐิตา   อลฺลีนา   อุปคตา   อชฺโฌสิตา
อธิมุตฺตาติ วตฺตํ สมาทาย อุปฏฺฐิตาเส ฯ
     [๖๑๘]   อิเธว  สิกฺเขม  อถสฺส  สุทฺธินฺติ  อิธาติ  สกาย  ทิฏฺฐิยา
สกาย   ขนฺติยา   สกาย   รุจิยา   สกาย  ลทฺธิยา  สิกฺเขม  อาจเรม
สมาจเรม   สมาทาย   วตฺเตมาติ  อิเธว  สิกฺเขม  ฯ  อถสฺส  สุทฺธินฺติ
อถวาสฺส   สุทฺธึ   วิสุทฺธึ   ปริสุทฺธึ  มุตฺตึ  วิมุตฺตึ  ปริมุตฺตินฺติ  อิเธว
สิกฺเขม อถสฺส สุทฺธึ ฯ
@เชิงอรรถ:  ม. พลเทววตํ ฯ  ม. ยุ. ทิสาวตฺตํ ฯ  โป. ม. อาทิยิตฺวา ฯ
     [๖๑๙]   ภวูปนีตา    กุสลาวทานาติ    ภวูปนีตาติ    ภวูปนีตา
ภวูปคตา   ภวชฺโฌสิตา   ภวาธิมุตฺตาติ   ภวูปนีตา   ฯ   กุสลาวทานาติ
กุสลวาทา     ปณฺฑิตวาทา     ธีรวาทา     ญาณวาทา     เหตุวาทา
ลกฺขณวาทา    การณวาทา   ฐานวาทา   สกาย   ลทฺธิยาติ   ภวูปนีตา
กุสลาวทานา ฯ เตนาห ภควา
                       สีลุตฺตมา สญฺญเมนาหุ สุทฺธึ
                       วตฺตํ สมาทาย อุปฏฺฐิตาเส
                       อิเธว สิกฺเขม อถสฺส สุทฺธึ
                       ภวูปนีตา กุสลาวทานาติ ฯ
     [๖๒๐]        สเจ จุโต สีลวตาโต ๑- โหติ
                       ส เวธตี ๒- กมฺม วิราธยิตฺวา
                       ส ชปฺปตี ๓- ปตฺถยตี จ สุทฺธึ
                       สตฺถาวหีโน ปวสํ ฆรมฺหา ฯ
     [๖๒๑]   สเจ  จุโต  สีลวตาโต  โหตีติ  ทฺวีหิ การเณหิ สีลพฺพตโต
จวติ ปรวิจฺฉินฺทนาย วา จวติ อนภิสมฺภุณนฺโต วา จวติ ฯ
     {๖๒๑.๑}   กถํ  ปรวิจฺฉินฺทนาย  จวติ  ฯ  ปโร  วิจฺฉินฺทติ  โส
สตฺถา   น   สพฺพญฺญู   ธมฺโม   น   สฺวากฺขาโต  คโณ  น  สุปฏิปนฺโน
ทิฏฺฐิ   น   ภทฺทิกา   ปฏิปทา   น   สุปญฺญตฺตา  มคฺโค  น  นิยฺยานิโก
นตฺเถตฺถ  สุทฺธิ  วา  วิสุทฺธิ  วา  ปริสุทฺธิ  วา  มุตฺติ  วา  วิมุตฺติ  วา
@เชิงอรรถ:  โป. ม. สีลวตโต ฯ  ปเวธตีติปิ ปาโฐ ฯ  ปชปฺปตีติปิ ปาโฐ ฯ
ปริมุตฺติ   วา   น  ตตฺถ  สุชฺฌนฺติ  วา  วิสุชฺฌนฺติ  วา  ปริสุชฺฌนฺติ  วา
มุจฺจนฺติ   วา   วิมุจฺจนฺติ   วา  ปริมุจฺจนฺติ  วา  หีนา  นิหีนา  โอมกา
ลามกา  ชตุกฺกา  ปริตฺตาติ  เอวํ  ปโร  วิจฺฉินฺทติ ฯ เอวํ วิจฺฉินฺทิยมาโน
สตฺถารา   จวติ   ธมฺมกฺขานา   จวติ   คณา   จวติ   ทิฏฺฐิยา   จวติ
ปฏิปทาย จวติ มคฺคโต จวติ เอวํ ปรวิจฺฉินฺทนาย จวติ ฯ
     {๖๒๑.๒}   กถํ   อนภิสมฺภุณนฺโต  จวติ  ฯ  สีลํ  อนภิสมฺภุณนฺโต
สีลโต    จวติ    วตฺตํ    อนภิสมฺภุณนฺโต    วตฺตโต   จวติ   สีลพฺพตํ
อนภิสมฺภุณนฺโต      สีลพฺพตโต      จวติ     เอวํ     อนภิสมฺภุณนฺโต
จวตีติ สเจ จุโต สีลวตาโต โหติ ฯ
     [๖๒๒]   ส   เวธตี  กมฺม  วิราธยิตฺวาติ  ส  เวธตีติ  สีลํ  วา
วตฺตํ    วา   สีลพฺพตํ   วา   วิรทฺธํ   มยา   อปรทฺธํ   มยา   ขลิตํ
มยา    คฬิตํ   มยา   อญฺญาย   อปรทฺโธ   อหนฺติ   เวธติ   ปเวธติ
สมฺปเวธตีติ    ส   เวธตี   ฯ   กมฺม   วิราธยิตฺวาติ   ปุญฺญาภิสงฺขารํ
วา   อปุญฺญาภิสงฺขารํ   วา   อาเนญฺชาภิสงฺขารํ   วา   วิรทฺธํ   มยา
อปรทฺธํ    มยา    ขลิตํ    มยา   คฬิตํ   มยา   อญฺญาย   อปรทฺโธ
อหนฺติ เวธติ ปเวธติ สมฺปเวธตีติ ส เวธตี กมฺม วิราธยิตฺวา ฯ
     [๖๒๓]   ส   ชปฺปตี   ปตฺถยตี   จ   สุทฺธินฺติ  ส  ชปฺปตีติ  สีลํ
วา   ชปฺปติ   วตฺตํ   วา   ชปฺปติ   สีลพฺพตํ   วา   ชปฺปติ   ปชปฺปติ
อภิชปฺปตีติ   ส   ชปฺปตี   ฯ   ปตฺถยตี   จ   สุทฺธินฺติ   สีลสุทฺธึ   วา
ปตฺเถติ   วตฺตสุทฺธึ   วา   ปตฺเถติ   สีลพฺพตสุทฺธึ  วา  ปตฺเถติ  ปิเหติ
อภิชปฺปตีติ ส ชปฺปตี ปตฺถยตี จ สุทฺธึ ฯ
     [๖๒๔]   สตฺถาวหีโน   ปวสํ   ฆรมฺหาติ   ยถา   ปุริโส  ฆรโต
นิกฺขนฺโต   สตฺเถน   สห   วสนฺโต   สตฺถา   โอหีโน   ตํ  วา  สตฺถํ
อนุพนฺธติ   สกํ   วา   ฆรํ   ปจฺจาคจฺฉติ   เอวเมว   โส  ทิฏฺฐิคติโก
ตํ   วา   สตฺถารํ   คณฺหาติ   อญฺญํ   วา   สตฺถารํ  คณฺหาติ  ตํ  วา
ธมฺมกฺขานํ    คณฺหาติ    อญฺญํ   วา   ธมฺมกฺขานํ   คณฺหาติ   ตํ   วา
คณํ   คณฺหาติ   อญฺญํ   วา   คณํ   คณฺหาติ   ตํ   วา  ทิฏฺฐึ  คณฺหาติ
อญฺญํ    วา    ทิฏฺฐึ    คณฺหาติ   ตํ   วา   ปฏิปทํ   คณฺหาติ   อญฺญํ
วา   ปฏิปทํ   คณฺหาติ   ตํ   วา   มคฺคํ   คณฺหาติ   อญฺญํ  วา  มคฺคํ
คณฺหาติ    ปรามสติ    อภินิวิสตีติ   สตฺถาวหีโน   ปวสํ   ฆรมฺหา   ฯ
เตนาห ภควา
                       สเจ จุโต สีลวตาโต โหติ
                       ส เวธตี กมฺม วิราธยิตฺวา
                       ส ชปฺปตี ปตฺถยตี จ สุทฺธึ
                       สตฺถาวหีโน ปวสํ ฆรมฺหาติ ฯ
     [๖๒๕]        สีลพฺพตํ วาปิ ปหาย สพฺพํ
                       กมฺมญฺจ สาวชฺชนวชฺชเมตํ
                       สุทฺธึ อสุทฺธินฺติ อปตฺถยาโน
                       วิรโต จเร สนฺติมนุคฺคหาย ฯ
     [๖๒๖]   สีลพฺพตํ   วาปิ   ปหาย   สพฺพนฺติ   สพฺพา  สีลสุทฺธิโย
ปหาย     ปชหิตฺวา     วิโนทิตฺวา    พฺยนฺตีกริตฺวา    อนภาวงฺคมิตฺวา
สพฺพา    วตฺตสุทฺธิโย    ปหาย   ปชหิตฺวา   วิโนทิตฺวา   พฺยนฺตีกริตฺวา
อนภาวงฺคมิตฺวา   สพฺพา   สีลพฺพตสุทฺธิโย   ปหาย  ปชหิตฺวา  วิโนทิตฺวา
พฺยนฺตีกริตฺวา อนภาวงฺคมิตฺวาติ สีลพฺพตํ วาปิ ปหาย สพฺพํ ฯ
     [๖๒๗]   กมฺมญฺจ    สาวชฺชนวชฺชเมตนฺติ   สาวชฺชกมฺมํ   วุจฺจติ
กณฺหํ   กณฺหวิปากํ   ฯ   อนวชฺชกมฺมํ   วุจฺจติ   สุกฺกํ   สุกฺกวิปากํ   ฯ
สาวชฺชญฺจ   กมฺมํ   อนวชฺชญฺจ   กมฺมํ   ปหาย   ปชหิตฺวา   วิโนทิตฺวา
พฺยนฺตีกริตฺวา อนภาวงฺคมิตฺวาติ กมฺมญฺจ สาวชฺชนวชฺชเมตํ ฯ
     [๖๒๘]   สุทฺธึ  อสุทฺธินฺติ  อปตฺถยาโนติ  อสุทฺธึ  ปตฺเถนฺติ  อกุสเล
ธมฺเม    ปตฺเถนฺติ    สุทฺธึ    ปตฺเถนฺติ   ปญฺจ   กามคุเณ   ปตฺเถนฺติ
อสุทฺธึ    ปตฺเถนฺติ    อกุสเล    ธมฺเม   ปตฺเถนฺติ   ปญฺจ   กามคุเณ
ปตฺเถนฺติ    สุทฺธึ    ปตฺเถนฺติ   ทฺวาสฏฺฐีทิฏฺฐิคตานิ   ปตฺเถนฺติ   อสุทฺธึ
ปตฺเถนฺติ    อกุสเล   ธมฺเม   ปตฺเถนฺติ   ปญฺจ   กามคุเณ   ปตฺเถนฺติ
ทฺวาสฏฺฐีทิฏฺฐิคตานิ    ปตฺเถนฺติ   สุทฺธึ   ปตฺเถนฺติ   เตธาตุเก   กุสเล
ธมฺเม   ปตฺเถนฺติ   อสุทฺธึ   ปตฺเถนฺติ  อกุสเล  ธมฺเม  ปตฺเถนฺติ  ปญฺจ
กามคุเณ     ปตฺเถนฺติ    ทฺวาสฏฺฐีทิฏฺฐิคตานิ    ปตฺเถนฺติ    เตธาตุเก
กุสเล    ธมฺเม   ปตฺเถนฺติ   สุทฺธึ   ปตฺเถนฺติ   กลฺยาณปุถุชฺชนา   ๑-
นิยามาวกฺกนฺตึ   ปตฺเถนฺติ   เสกฺขา   อคฺคธมฺมํ   อรหตฺตํ  ปตฺเถนฺติ  ฯ
อรหตฺตปฺปตฺเต   อรหา   เนว   อกุสเล   ธมฺเม   ปตฺเถติ  นปิ  ปญฺจ
กามคุเณ   ปตฺเถติ   นปิ   ทฺวาสฏฺฐีทิฏฺฐิคตานิ  ปตฺเถติ  นปิ  เตธาตุเก
@เชิงอรรถ:  โป. ม. ปุถุชฺชนกลฺยาณกา ฯ
กุสเล   ธมฺเม   ปตฺเถติ   นปิ  นิยามาวกฺกนฺตึ  ปตฺเถติ  นปิ  อคฺคธมฺมํ
อรหตฺตํ    ปตฺเถติ    ฯ   ปตฺถนํ   สมติกฺกนฺโต   อรหา   วุฑฺฒิปริหานึ
วีติวตฺโต  ฯ  โส  วุฏฺฐวาโส  จิณฺณจรโณ  ฯเปฯ  นตฺถิ  ตสฺส ปุนพฺภโวติ
สุทฺธึ อสุทฺธินฺติ อปตฺถยาโน ฯ
     [๖๒๙]   วิรโต   จเร  สนฺติมนุคฺคหายาติ  วิรโตติ  สุทฺธิอสุทฺธิยา
อารโต   วิรโต   ปฏิวิรโต  นิกฺขนฺโต  นิสฺสฏฺโฐ  วิปฺปมุตฺโต  วิสญฺญุตฺโต
วิมริยาทิกเตน เจตสา วิหรตีติ วิรโต ฯ จเรติ จเรยฺย วิจเรยฺย อิริเยยฺย
วตฺเตยฺย  ปาเลยฺย  ยเปยฺย  ยาเปยฺยาติ วิรโต จเร ฯ สนฺติมนุคฺคหายาติ
สนฺติโย    วุจฺจนฺติ   ทฺวาสฏฺฐี   ทิฏฺฐิคตานิ   ทิฏฺฐิสนฺติโย   อคฺคณฺหนฺโต
อปรามสนฺโต   อนภินิวิสนฺโตติ  วิรโต  จเร  สนฺติมนุคฺคหาย  ฯ  เตนาห
ภควา
                       สีลพฺพตํ วาปิ ปหาย สพฺพํ
                       กมฺมญฺจ สาวชฺชนวชฺชเมตํ
                       สุทฺธึ อสุทฺธินฺติ อปตฺถยาโน
                       วิรโต จเร สนฺติมนุคฺคหายาติ ฯ
     [๖๓๐]        ตมูปนิสฺสาย ๑- ชิคุจฺฉิตํ วา
                       อถ วาปิ ทิฏฺฐํว สุตํ มุตํ วา
                       อุทฺธํสรา สุทฺธิมนุตฺถุนนฺติ
                       อวีตตณฺหาเส ภวาภเวสุ ฯ
@เชิงอรรถ:  ยุ. ตปูปนิสฺสาย ฯ
     [๖๓๑]   ตมูปนิสฺสาย   ชิคุจฺฉิตํ   วาติ  สนฺเตเก  สมณพฺราหฺมณา
ตโปชิคุจฺฉวาทา    ตโปชิคุจฺฉสารา    ตโปชิคุจฺฉํ   นิสฺสิตา   สนฺนิสฺสิตา
อลฺลีนา อุปคตา อชฺโฌสิตา อธิมุตฺตาติ ตมูปนิสฺสาย ชิคุจฺฉิตํ วา ฯ
     [๖๓๒]   อถวาปิ   ทิฏฺฐํว  สุตํ  มุตํ  วาติ  ทิฏฺฐํ  วา  ทิฏฺฐสุทฺธึ
วา  สุตํ  วา  สุตสุทฺธึ  วา  มุตํ  วา  มุตสุทฺธึ  วา  นิสฺสาย อุปนิสฺสาย
คณฺหิตฺวา ปรามสิตฺวา อภินิวิสิตฺวาติ อถวาปิ ทิฏฺฐํว สุตํ มุตํ วา ฯ
     [๖๓๓]   อุทฺธํสรา   สุทฺธิมนุตฺถุนนฺตีติ   สนฺเตเก   สมณพฺราหฺมณา
อุทฺธํสราวาทา  ฯ  กตเม  [๑]-  สมณพฺราหฺมณา  อุทฺธํสราวาทา  ฯ เย
เต    สมณพฺราหฺมณา    อจฺจนฺตสุทฺธิกา    สํสารสุทฺธิกา   อกิริยทิฏฺฐิกา
สสฺสตวาทา    อิเม   เต   สมณพฺราหฺมณา   อุทฺธํสราวาทา   ฯ   เต
สํสาเรน  ๒-  สุทฺธึ  วิสุทฺธึ  ปริสุทฺธึ มุตฺตึ วิมุตฺตึ ปริมุตฺตึ อนุตฺถุนนฺติ
วทนฺติ     กเถนฺติ     ภณนฺติ     ทีปยนฺติ     โวหรนฺตีติ    อุทฺธํสรา
สุทฺธิมนุตฺถุนนฺติ ฯ
     [๖๓๔]   อวีตตณฺหาเส  ภวาภเวสูติ  ตณฺหาติ  รูปตณฺหา  สทฺทตณฺหา
คนฺธตณฺหา    รสตณฺหา   โผฏฺฐพฺพตณฺหา   ธมฺมตณฺหา   ฯ   ภวาภเวสูติ
ภวาภเว   กมฺมภเว  ปุนพฺภเว  กามภเว  กมฺมภเว  กามภเว  ปุนพฺภเว
รูปภเว   กมฺมภเว   รูปภเว   ปุนพฺภเว  อรูปภเว  กมฺมภเว  อรูปภเว
ปุนพฺภเว    ปุนปฺปุนํ    ภเว   ปุนปฺปุนํ   คติยา   ปุนปฺปุนํ   อุปปตฺติยา
ปุนปฺปุนํ      ปฏิสนฺธิยา      ปุนปฺปุนํ     อตฺตภาวาภินิพฺพตฺติยา     ฯ
@เชิงอรรถ:  ม. ยุ. เต ฯ   โป. ม. สํสาเร ฯ
อวีตตณฺหาเสติ       อวีตตณฺหา       อวิคตตณฺหา       อจฺจตฺตตณฺหา
อวนฺตตณฺหา      อมุตฺตตณฺหา     อปฺปหีนตณฺหา     อปฺปฏินิสฺสฏฺฐตณฺหาติ
อวีตตณฺหาเส ภวาภเวสุ ฯ เตนาห ภควา
                       ตมูปนิสฺสาย ชิคุจฺฉิตํ วา
                       อถวาปิ ทิฏฺฐํว สุตํ มุตํ วา
                       อุทฺธํสรา สุทฺธิมนุตฺถุนนฺติ
                       อวีตตณฺหาเส ภวาภเวสูติ ฯ
     [๖๓๕]        ปตฺถยมานสฺส หิ ชปฺปิตานิ
                       สํเวธิตํ ๑- วาปิ ปกปฺปิเตสุ
                       จุตูปปาโต อิธ ยสฺส นตฺถิ
                       ส เกน เวเธยฺย กุหึ ปชปฺเป ฯ
     [๖๓๖]   ปตฺถยมานสฺส   หิ   ชปฺปิตานีติ  ปตฺถนา  วุจฺจติ  ตณฺหา
โย  ราโค  สาราโค  ฯเปฯ  อภิชฺฌา โลโภ อกุสลมูลํ ฯ ปตฺถยมานสฺสาติ
ปตฺถยมานสฺส       อิจฺฉมานสฺส       สาทิยมานสฺส       ปิหยมานสฺส
อภิชปฺปยมานสฺสาติ    ปตฺถยมานสฺส    หิ    ฯ    ชปฺปิตานีติ   ชปฺปนา
วุจฺจติ  ตณฺหา  โย  ราโค  สาราโค  ฯเปฯ  อภิชฺฌา โลโภ อกุสลมูลนฺติ
ปตฺถยมานสฺส หิ ชปฺปิตานิ ฯ
     [๖๓๗]   สํเวธิตํ  วาปิ  ปกปฺปิเตสูติ  ปกปฺปนาติ  เทฺว  ปกปฺปนา
ตณฺหาปกปฺปนา   จ   ทิฏฺฐิปกปฺปนา   จ   ฯเปฯ   อยํ   ตณฺหาปกปฺปนา
ฯเปฯ    อยํ    ทิฏฺฐิปกปฺปนา    ฯ    วตฺถุอจฺเฉทสงฺกิโนปิ   เวเธนฺติ
@เชิงอรรถ:  ปเวธิตนฺติปิ ปาโฐ ฯ
อจฺฉิชฺชนฺเตปิ   เวเธนฺติ   อจฺฉินฺเนปิ   เวเธนฺติ   วตฺถุวิปริณามสงฺกิโนปิ
เวเธนฺติ   วิปริณามนฺเตปิ   เวเธนฺติ   วิปริณเตปิ  เวเธนฺติ  ปเวเธนฺติ
สมฺปเวเธนฺตีติ สํเวธิตํ วาปิ ปกปฺปิเตสุ ฯ
     [๖๓๘]   จุตูปปาโต   อิธ   ยสฺส   นตฺถีติ   ยสฺสาติ   อรหโต
ขีณาสวสฺส   อาคมนํ   คมนํ   คมนาคมนํ   กาลํ   คติ   ภวาภโว  จุติ
จ   อุปปตฺติ   จ   นิพฺพตฺติ   จ   เภโท   จ  ชาติชรามรณํ  นตฺถิ  น
สนฺติ    น    สํวิชฺชนฺติ    นุปลพฺภนฺติ   ปหีนา   สมุจฺฉินฺนา   วูปสนฺตา
ปฏิปฺปสฺสทฺธา     อภพฺพุปฺปตฺติกา    ญาณคฺคินา    ทฑฺฒาติ    จุตูปปาโต
อิธ ยสฺส นตฺถิ ฯ
     [๖๓๙]   ส  เกน เวเธยฺย กุหึ ปชปฺเปติ โส เกน ราเคน เวเธยฺย
เกน  โทเสน  เวเธยฺย  เกน  โมเหน  เวเธยฺย เกน มาเนน เวเธยฺย
กาย   ทิฏฺฐิยา  เวเธยฺย  เกน  อุทฺธจฺเจน  เวเธยฺย  กาย  วิจิกิจฺฉาย
เวเธยฺย  เกหิ  อนุสเยหิ  เวเธยฺย  รตฺโตติ  วา  ทุฏฺโฐติ  วา มูโฬฺหติ
วา  วินิพนฺโธติ  วา  ปรามฏฺโฐติ  วา  วิกฺเขปคโตติ  วา  อนิฏฺฐงฺคโตติ
วา   ถามคโตติ   วา   ฯ   เต   อภิสงฺขารา   ปหีนา  อภิสงฺขารานํ
ปหีนตฺตา  คติยา  เกน  เวเธยฺย  เนรยิโกติ  วา  ติรจฺฉานโยนิโกติ วา
ปิตฺติวิสยิโกติ  วา  มนุสฺโสติ  วา  เทโวติ  วา  รูปีติ  วา  อรูปีติ  วา
สญฺญีติ    วา    อสญฺญีติ    วา    เนวสญฺญีนาสญฺญีติ   วา   ฯ   โส
เหตุ   นตฺถิ   ปจฺจโย  นตฺถิ  การณํ  นตฺถิ  เยน  เวเธยฺย  ปเวเธยฺย
สมฺปเวเธยฺยาติ  ส  เกน  เวเธยฺย  ฯ  กุหึ  ปชปฺเปติ  กิมฺหิ  ชปฺเปยฺย
ปชปฺเปยฺย   อภิชปฺเปยฺยาติ   ส   เกน   เวเธยฺย   กุหึ   ปชปฺเป  ฯ
เตนาห ภควา
                       ปตฺถยมานสฺส หิ ชปฺปิตานิ
                       สํเวธิตํ วาปิ ปกปฺปิเตสุ
                       จุตูปปาโต อิธ ยสฺส นตฺถิ
                       ส เกน เวเธยฺย กุหึ ปชปฺเปติ ฯ
     [๖๔๐]        ยมาหุ ธมฺมํ ปรมนฺติ เอเก
                       ตเมว หีนนฺติ ปนาหุ อญฺเญ
                       สจฺโจ นุ วาโท กตโม อิเมสํ
                       สพฺเพว หีเม กุสลาวทานา ฯ
     [๖๔๑]   ยมาหุ  ธมฺมํ  ปรมนฺติ  เอเกติ  ยํ  ธมฺมํ  ทิฏฺฐึ  ปฏิปทํ
มคฺคํ   เอเก   สมณพฺราหฺมณา   อิทํ   ปรมํ   อคฺคํ   เสฏฺฐํ   วิเสฏฺฐํ
ปาโมกฺขํ   อุตฺตมํ   ปวรนฺติ   เอวมาหํสุ   เอวํ  กเถนฺติ  เอวํ  ภณนฺติ
เอวํ ทีปยนฺติ เอวํ โวหรนฺตีติ ยมาหุ ธมฺมํ ปรมนฺติ เอเก ฯ
     [๖๔๒]   ตเมว   หีนนฺติ   ปนาหุ   อญฺเญติ  ตเมว  ธมฺมํ  ทิฏฺฐึ
ปฏิปทํ   มคฺคํ   เอเก   สมณพฺราหฺมณา  หีนํ  เอตํ  นิหีนํ  เอตํ  โอมกํ
เอตํ   ลามกํ   เอตํ  ชตุกฺกํ  เอตํ  ปริตฺตกํ  เอตนฺติ  เอวมาหํสุ  เอวํ
กเถนฺติ   เอวํ  ภณนฺติ  เอวํ  ทีปยนฺติ  เอวํ  โวหรนฺตีติ  ตเมว  หีนนฺติ
ปนาหุ อญฺเญ ฯ
     [๖๔๓]   สจฺโจ  นุ  วาโท  กตโม อิเมสนฺติ อิเมสํ สมณพฺราหฺมณานํ
วาโท  กตโม สจฺโจ ตจฺโฉ ตโถ ภูโต ยาถาโว อวิปรีโตติ สจฺโจ นุ วาโท
กตโม อิเมสํ ฯ
     [๖๔๔]   สพฺเพว  หีเม  กุสลาวทานาติ สพฺเพว หีเม สมณพฺราหฺมณา
กุสลวาทา   ปณฺฑิตวาทา   ธีรวาทา  ญาณวาทา  เหตุวาทา  ลกฺขณวาทา
การณวาทา  ฐานวาทา  สกาย  ลทฺธิยาติ  สพฺเพว  หีเม กุสลาวทานา ฯ
เตนาห ภควา
                       ยมาหุ ธมฺมํ ปรมนฺติ เอเก
                       ตเมว หีนนฺติ ปนาหุ อญฺเญ
                       สจฺโจ นุ วาโท กตโม อิเมสํ
                       สพฺเพว หีเม กุสลาวทานาติ ฯ
     [๖๔๕]        สกํ หิ ธมฺมํ ปริปุณฺณมาหุ
                       อญฺญสฺส ธมฺมํ ปน หีนมาหุ
                       เอวมฺปิ วิคฺคยฺห วิวาทยนฺติ
                       สกํ สกํ สมฺมติมาหุ สจฺจํ ฯ
     [๖๔๖]   สกํ   หิ   ธมฺมํ   ปริปุณฺณมาหูติ   สกํ  หิ  ธมฺมํ  ทิฏฺฐึ
ปฏิปทํ    มคฺคํ    เอเก    สมณพฺราหฺมณา    อิทํ    สมตฺตํ   ปริปุณฺณํ
อโนมนฺติ   เอวมาหํสุ   เอวํ   กเถนฺติ   เอวํ   ภณนฺติ  เอวํ  ทีปยนฺติ
เอวํ โวหรนฺตีติ สกํ หิ ธมฺมํ ปริปุณฺณมาหุ ฯ
     [๖๔๗]   อญฺญสฺส   ธมฺมํ   ปน   หีนมาหูติ  อญฺญสฺส  ธมฺมํ  ทิฏฺฐึ
ปฏิปทํ   มคฺคํ   เอเก   สมณพฺราหฺมณา  หีนํ  เอตํ  นิหีนํ  เอตํ  โอมกํ
เอตํ   ลามกํ   เอกํ  ชตุกฺกํ  เอตํ  ปริตฺตกํ  เอตนฺติ  เอวมาหํสุ  เอวํ
กเถนฺติ   เอวํ   ภณนฺติ   เอวํ   ทีปยนฺติ   เอวํ   โวหรนฺตีติ  อญฺญสฺส
ธมฺมํ ปน หีนมาหุ ฯ
     [๖๔๘]   เอวมฺปิ  วิคฺคยฺห  วิวาทยนฺตีติ  เอวํ  คเหตฺวา  คณฺหิตฺวา
ปรามสิตฺวา   อภินิวิสิตฺวา   วิวาทยนฺติ   กลหํ  กโรนฺติ  ภณฺฑนํ  กโรนฺติ
วิคฺคหํ  กโรนฺติ  วิวาทํ  กโรนฺติ  เมธคํ  กโรนฺติ  น  ตฺวํ  อิมํ ธมฺมวินยํ
อาชานาสิ   ฯเปฯ   นิพฺเพเธหิ   วา  สเจ  ปโหสีติ  เอวมฺปิ  วิคฺคยฺห
วิวาทยนฺติ ฯ
     [๖๔๙]   สกํ   สกํ  สมฺมติมาหุ  สจฺจนฺติ  สสฺสโต  โลโก  ฯเปฯ
เนว   โหติ   น   น   โหติ   ตถาคโต   ปรมฺมรณา   อิทเมว  สจฺจํ
โมฆมญฺญนฺติ สกํ สกํ สมฺมติมาหุ สจฺจํ ฯ เตนาห ภควา
                       สกํ หิ ธมฺมํ ปริปุณฺณมาหุ
                       อญฺญสฺส ธมฺมํ ปน หีนมาหุ
                       เอวมฺปิ วิคฺคยฺห วิวาทยนฺติ
                       สกํ สกํ สมฺมติมาหุ สจฺจนฺติ ฯ
     [๖๕๐]        ปรสฺส เจ วมฺภยิเตน หีโน
                       น โกจิ ธมฺเมสุ วิเสสิ อสฺส
                       ปุถู หิ อญฺญสฺส วทนฺติ ธมฺมํ
                       นิหีนโต สมฺหิ ทฬฺหํวทานา ฯ
     [๖๕๑]   ปรสฺส  เจ  วมฺภยิเตน  หีโนติ  ปรสฺส เจ วมฺภยิตการณา
นินฺทิตการณา     ครหิตการณา     อุปวทิตการณา     ปโร     พาโล
โหติ   หีโน   นิหีโน   โอมโก   ลามโก   ชตุกฺโก   ปริตฺโตติ  ปรสฺส
เจ วมฺภยิเตน หีโน ฯ
     [๖๕๒]   น   โกจิ  ธมฺเมสุ  วิเสสิ  อสฺสาติ  ธมฺเมสุ  น  โกจิ
อคฺโค   เสฏฺโฐ   วิเสฏฺโฐ   ปาโมกฺโข   อุตฺตโม  ปวโร  อสฺสาติ  น
โกจิ ธมฺเมสุ วิเสสิ อสฺส ฯ
     [๖๕๓]   ปุถู   หิ   อญฺญสฺส   วทนฺติ   ธมฺมํ  นิหีนโตติ  พหุกาปิ
พหุนฺนํ   ธมฺมํ   วทนฺติ   อุปวทนฺติ   นินฺทนฺติ   ครหนฺติ  หีนโต  นิหีนโต
โอมกโต   ลามกโต   ชตุกฺกโต   ปริตฺตโต   พหุกาปิ   เอกสฺส   ธมฺมํ
วทนฺติ    อุปวทนฺติ    นินฺทนฺติ   ครหนฺติ   หีนโต   นิหีนโต   โอมกโต
ลามกโต    ชตุกฺกโต    ปริตฺตโต    เอโกปิ    พหุนฺนํ   ธมฺมํ   วทติ
อุปวทติ    นินฺทติ    ครหติ    หีนโต   นิหีนโต   โอมกโต   ลามกโต
ชตุกฺกโต    ปริตฺตโต    เอโกปิ    เอกสฺส    ธมฺมํ   วทติ   อุปวทติ
นินฺทติ    ครหติ    หีนโต   นิหีนโต   โอมกโต   ลามกโต   ชตุกฺกโต
ปริตฺตโตติ ปุถู หิ อญฺญสฺส วทนฺติ ธมฺมํ นิหีนโต ฯ
     [๖๕๔]   สมฺหิ   ทฬฺหํวทานาติ   ธมฺโม   สกายนํ  ทิฏฺฐิ  สกายนํ
ปฏิปทา   สกายนํ   มคฺโค  สกายนํ  ฯ  สกายเน  ทฬฺหวาทา  ถิรวาทา
พลิกวาทา     อวฏฺฐิตวาทาติ    สมฺหิ    ทฬฺหํวทานา    ฯ    เตนาห
ภควา
                       ปรสฺส เจ วมฺภยิเตน หีโน
                       น โกจิ ธมฺเมสุ วิเสสิ อสฺส
                       ปุถู หิ อญฺญสฺส วทนฺติ ธมฺมํ
                       นิหีนโต สมฺหิ ทฬฺหํวทานาติ ฯ
     [๖๕๕]        สธมฺมปูชา ๑- จ ปนา ตเถว
                       ยถา ปสํสนฺติ สกายนานิ
                       สพฺเพ ๒- ปวาทา ตถิวา ภเวยฺยุํ
                       สุทฺธี หิ เนสํ ปจฺจตฺตเมว ฯ
     [๖๕๖]   สธมฺมปูชา   จ  ปนา  ตเถวาติ  กตมา  สธมฺมปูชา  ฯ
สกํ   สตฺถารํ   สกฺกโรติ   ครุกโรติ   มาเนติ   ปูเชติ   อยํ   สตฺถา
สพฺพญฺญูติ    อยํ    สธมฺมปูชา    ฯ    สกํ    ธมฺมกฺขานํ   สกํ   คณํ
สกํ   ทิฏฺฐึ   สกํ   ปฏิปทํ   สกํ   มคฺคํ   สกฺกโรติ  ครุกโรติ  มาเนติ
ปูเชติ   อยํ   มคฺโค   นิยฺยานิโกติ   อยํ   สธมฺมปูชา   ฯ  สธมฺมปูชา
จ    ปนา   ตเถวาติ   สธมฺมปูชา   ตถา   ตจฺฉา   ภูตา   ยาถาวา
อวิปรีตาติ สธมฺมปูชา จ ปนา ตเถว ฯ
     [๖๕๗]   ยถา   ปสํสนฺติ   สกายนานีติ   ธมฺโม   สกายนํ  ทิฏฺฐิ
สกายนํ   ปฏิปทา   สกายนํ   มคฺโค   สกายนํ  ฯ  สกายนานิ  ปสํสนฺติ
โถเมนฺติ กิตฺเตนฺติ วณฺเณนฺตีติ ยถา ปสํสนฺติ สกายนานิ ฯ
     [๖๕๘]   สพฺเพ   ปวาทา   ตถิวา   ภเวยฺยุนฺติ  สพฺเพ  ปวาทา
ตถา   ตจฺฉา   ภูตา   ยาถาวา  อวิปรีตา  ภเวยฺยุนฺติ  สพฺเพ  ปวาทา
ตถิวา ภเวยฺยุํ ฯ
@เชิงอรรถ:  ม. สทฺธมฺมปูชา ฯ สพฺพตฺถ อีทิสเมว  โป. ม. สพฺเพว วาทา ฯ
     [๖๕๙]   สุทฺธี   หิ   เนสํ   ปจฺจตฺตเมวาติ   ปจฺจตฺตเมว  เตสํ
สมณพฺราหฺมณานํ   สุทฺธิ   วิสุทฺธิ   ปริสุทฺธิ   มุตฺติ   วิมุตฺติ  ปริมุตฺตีติ
สุทฺธี หิ เนสํ ปจฺจตฺตเมว ฯ เตนาห ภควา
                       สธมฺมปูชา จ ปนา ตเถว
                       ยถา ปสํสนฺติ สกายนานิ
                       สพฺเพ ปวาทา ตถิวา ภเวยฺยุํ
                       สุทฺธี หิ เนสํ ปจฺจตฺตเมวาติ ฯ
     [๖๖๐]        น พฺราหฺมณสฺส ปรเนยฺยมตฺถิ
                       ธมฺเมสุ นิจฺเฉยฺย สมุคฺคหีตํ
                       ตสฺมา วิวาทานิ อุปาติวตฺโต
                       น หิ เสฏฺฐโต ปสฺสติ ธมฺมมญฺญํ ฯ
     [๖๖๑]   น   พฺราหฺมณสฺส   ปรเนยฺยมตฺถีติ  นาติ  ปฏิกฺเขโป  ฯ
พฺราหฺมโณติ    สตฺตนฺนํ    ธมฺมานํ    พาหิตตฺตา    พฺราหฺมโณ   ฯเปฯ
อนิสฺสิโต   ๑-   ตาทิ   ปวุจฺจเต   ส   พฺรหฺมา   ฯ  น  พฺราหฺมณสฺส
ปรเนยฺยมตฺถีติ    พฺราหฺมณสฺส    ปรเนยฺยตา    นตฺถิ   พฺราหฺมโณ   น
ปรเนยฺโย   น   ปรปตฺติโย   น   ปรปจฺจโย  น  ปรปฏิพทฺธคู  ชานาติ
ปสฺสติ    อสมฺมูโฬฺห    สมฺปชาโน   ปฏิสฺสโต   ฯ   สพฺเพ   สงฺขารา
อนิจฺจาติ   พฺราหฺมณสฺส   ปรเนยฺยตา   นตฺถิ  พฺราหฺมโณ  น  ปรเนยฺโย
น   ปรปตฺติโย   น   ปรปจฺจโย   น   ปรปฏิพทฺธคู   ชานาติ   ปสฺสติ
อสมฺมูโฬฺห   สมฺปชาโน  ปฏิสฺสโต  ฯ  สพฺเพ  สงฺขารา  ทุกฺขาติ  ฯเปฯ
@เชิงอรรถ:  โป. ม. อสิโต ฯ
ยงฺกิญฺจิ      สมุทยธมฺมํ     สพฺพนฺตํ     นิโรธธมฺมนฺติ     พฺราหฺมณสฺส
ปรเนยฺยตา   นตฺถิ   พฺราหฺมโณ   น   ปรเนยฺโย   น   ปรปตฺติโย  น
ปรปจฺจโย     น     ปรปฏิพทฺธคู     ชานาติ    ปสฺสติ    อสมฺมูโฬฺห
สมฺปชาโน ปฏิสฺสโตติ น พฺราหฺมณสฺส ปรเนยฺยมตฺถิ ฯ
     [๖๖๒]   ธมฺเมสุ   นิจฺเฉยฺย  สมุคฺคหีตนฺติ  ธมฺเมสูติ  ทฺวาสฏฺฐิยา
ทิฏฺฐิคเตสุ    ฯ    นิจฺเฉยฺยาติ    นิจฺฉินิตฺวา   วินิจฺฉินิตฺวา   วิจินิตฺวา
ปวิจินิตฺวา     ตุลยิตฺวา    ตีรยิตฺวา    วิภาวยิตฺวา    วิภูตํ    กตฺวา
โอธิคฺคาโห    วิลคฺคาโห   วรคฺคาโห   โกฏฺฐาสคฺคาโห   อุจฺจยคฺคาโห
สมุจฺจยคฺคาโห   อิทํ   สจฺจํ   ตถํ   ตจฺฉํ   ภูตํ   ยาถาวํ   อวิปรีตนฺติ
คหิตํ   ปรามฏฺฐํ   อภินิวิฏฺฐํ   อชฺโฌสิตํ   อธิมุตฺตํ   นตฺถิ   น  สํวิชฺชติ
นุปลพฺภติ    ปหีนํ    สมุจฺฉินฺนํ    วูปสนฺตํ   ปฏิปฺปสฺสทฺธํ   อภพฺพุปฺปตฺติกํ
ญาณคฺคินา ทฑฺฒนฺติ ธมฺเมสุ นิจฺเฉยฺย สมุคฺคหีตํ ฯ
     [๖๖๓]   ตสฺมา    วิวาทานิ   อุปาติวตฺโตติ   ตสฺมาติ   ตสฺมา
ตํการณา   ตํเหตุ   ตปฺปจฺจยา   ตํนิทานา   ทิฏฺฐิกลหานิ   ทิฏฺฐิภณฺฑนานิ
ทิฏฺฐิวิคฺคหานิ    ทิฏฺฐิวิวาทานิ   ทิฏฺฐิเมธคานิ   อุปาติวตฺโต   อติกฺกนฺโต
สมติกฺกนฺโต วีติวตฺโตติ ตสฺมา วิวาทานิ อุปาติวตฺโต ฯ
     [๖๖๔]   น   หิ   เสฏฺฐโต  ปสฺสติ  ธมฺมมญฺญนฺติ  อญฺญํ  สตฺถารํ
ธมฺมกฺขานํ    คณํ    ทิฏฺฐึ    ปฏิปทํ    มคฺคํ   อญฺญตฺร   สติปฏฺฐาเนหิ
อญฺญตฺร      สมฺมปฺปธาเนหิ     อญฺญตฺร     อิทฺธิปฺปาเทหิ     อญฺญตฺร
อินฺทฺริเยหิ     อญฺญตฺร    พเลหิ    อญฺญตฺร    โพชฺฌงฺเคหิ    อญฺญตฺร
อริยา   อฏฺฐงฺคิกา   มคฺคา   อคฺคํ   เสฏฺฐํ  วิเสฏฺฐํ  ปาโมกฺขํ  อุตฺตมํ
ปวรํ   ธมฺมํ   น   ปสฺสติ  น  ทกฺขติ  น  โอโลเกติ  น  นิชฺฌายติ  น
อุปปริกฺขตีติ น หิ เสฏฺฐโต ปสฺสติ ธมฺมมญฺญํ ฯ เตนาห ภควา
                       น พฺราหฺมณสฺส ปรเนยฺยมตฺถิ
                       ธมฺเมสุ นิจฺเฉยฺย สมุคฺคหีตํ
                       ตสฺมา วิวาทานิ อุปาติวตฺโต
                       น หิ เสฏฺฐโต ปสฺสติ ธมฺมมญฺญนฺติ ฯ
     [๖๖๕]        ชานามิ ปสฺสามิ ตเถว เอตํ
                       ทิฏฺฐิยา เอเก ปจฺเจนฺติ สุทฺธึ
                       อทฺทกฺขิ เจ กิญฺหิ ตุมสฺส เตน
                       อติสิตฺวา อญฺเญน วทนฺติ สุทฺธึ ฯ
     [๖๖๖]   ชานามิ  ปสฺสามิ  ตเถว  เอตนฺติ ชานามีติ ปรจิตฺตญาเณน
วา   ชานามิ   ปุพฺเพนิวาสานุสฺสติญาเณน   วา   ชานามิ  ฯ  ปสฺสามีติ
มํสจกฺขุนา  วา  ปสฺสามิ  ทิพฺเพน  วา  จกฺขุนา ปสฺสามิ ฯ ตเถว เอตนฺติ
เอตํ ตถํ ตจฺฉํ ภูตํ ยาถาวํ อวิปรีตนฺติ ชานามิ ปสฺสามิ ตเถว เอตํ ฯ
     [๖๖๗]   ทิฏฺฐิยา   เอเก   ปจฺเจนฺติ   สุทฺธินฺติ  ทิฏฺฐิยา  เอเก
สมณพฺราหฺมณา    สุทฺธึ    วิสุทฺธึ    ปริสุทฺธึ   มุตฺตึ   วิมุตฺตึ   ปริมุตฺตึ
ปจฺเจนฺติ   ฯ   สสฺสโต   โลโก   อิทเมว  สจฺจํ  โมฆมญฺญนฺติ  ทิฏฺฐิยา
เอเก    สมณพฺราหฺมณา    สุทฺธึ    วิสุทฺธึ    ปริสุทฺธึ   มุตฺตึ   วิมุตฺตึ
ปริมุตฺตึ   ปจฺเจนฺติ   ฯ   อสสฺสโต  โลโก  ฯเปฯ  เนว  โหติ  น  น
โหติ   ตถาคโต   ปรมฺมรณา   อิทเมว   สจฺจํ   โมฆมญฺญนฺติ   ทิฏฺฐิยา
เอเก    สมณพฺราหฺมณา    สุทฺธึ    วิสุทฺธึ    ปริสุทฺธึ   มุตฺตึ   วิมุตฺตึ
ปริมุตฺตึ ปจฺเจนฺตีติ ทิฏฺฐิยา เอเก ปจฺเจนฺติ สุทฺธึ ฯ
     [๖๖๘]   อทฺทกฺขิ    เจ   กิญฺหิ   ตุมสฺส   เตนาติ   อทฺทกฺขีติ
ปรจิตฺตญาเณน     วา     อทฺทกฺขิ    ปุพฺเพนิวาสานุสฺสติญาเณน    วา
อทฺทกฺขิ   มํสจกฺขุนา   วา   อทฺทกฺขิ   ทิพฺเพน  วา  จกฺขุนา  อทฺทกฺขีติ
อทฺทกฺขิ  เจ  ฯ  กิญฺหิ  ตุมสฺส  เตนาติ ตสฺส เตน ทสฺสเนน กึ กถํ [๑]-
ทุกฺขปริญฺญา   อตฺถิ   น   สมุทยสฺส   ปหานํ   อตฺถิ   น   มคฺคภาวนา
อตฺถิ   น   ผลสจฺฉิกิริยา  อตฺถิ  น  ราคสฺส  สมุจฺเฉทปฺปหานํ  อตฺถิ  น
โทสสฺส   สมุจฺเฉทปฺปหานํ   อตฺถิ   น   โมหสฺส  สมุจฺเฉทปฺปหานํ  อตฺถิ
น   กิเลสานํ   สมุจฺเฉทปฺปหานํ  อตฺถิ  น  สํสารวฏฺฏสฺส  อุจฺเฉโท  ๒-
อตฺถีติ อทฺทกฺขิ เจ กิญฺหิ ตุมสฺส เตน ฯ
     [๖๖๙]   อติสิตฺวา   อญฺเญน  วทนฺติ  สุทฺธินฺติ  เต  ทิฏฺฐิยา  ๓-
สุทฺธิมคฺคํ   วิสุทฺธิมคฺคํ   ปริสุทฺธิมคฺคํ   โวทาตมคฺคํ   ปริโยทาตมคฺคํ  ๔-
อติกฺกมิตฺวา    สมติกฺกมิตฺวา    วีติกฺกมิตฺวา    อญฺญตฺร    สติปฏฺฐาเนหิ
อญฺญตฺร      สมฺมปฺปธาเนหิ     อญฺญตฺร     อิทฺธิปฺปาเทหิ     อญฺญตฺร
อินฺทฺริเยหิ   อญฺญตฺร   พเลหิ   อญฺญตฺร   โพชฺฌงฺเคหิ   อญฺญตฺร  อริยา
อฏฺฐงฺคิกา   มคฺคา   สุทฺธึ   วิสุทฺธึ   ปริสุทฺธึ  มุตฺตึ  วิมุตฺตึ  ปริมุตฺตึ
วทนฺติ    กเถนฺติ   ภณนฺติ   ทีปยนฺติ   โวหรนฺตีติ   เอวมฺปิ   อติสิตฺวา
@เชิงอรรถ:  ม. นสทฺโท อตฺถิ ฯ  ม. อุปจฺเฉโท ฯ  ม. ยุ. ติตฺถิยา ฯ  ปริโวทาตมคฺคํ
@อิติปิ ปาโฐ ฯ
อญฺเญน  วทนฺติ  สุทฺธึ  ฯ  อถวา  พุทฺธา  จ พุทฺธสาวกา จ ปจฺเจกพุทฺธา
จ    เตสํ    ทิฏฺฐิยา   ๑-   อสุทฺธิมคฺคํ   อวิสุทฺธิมคฺคํ   อปริสุทฺธิมคฺคํ
อโวทาตมคฺคํ      อปริโยทาตมคฺคํ      อติกฺกมิตฺวา      สมติกฺกมิตฺวา
วีติวตฺติตฺวา    จตูหิ    สติปฏฺฐาเนหิ    จตูหิ    สมฺมปฺปธาเนหิ   จตูหิ
อิทฺธิปฺปาเทหิ   ปญฺจหิ   อินฺทฺริเยหิ   ปญฺจหิ  พเลหิ  สตฺตหิ  โพชฺฌงฺเคหิ
อริเยน   อฏฺฐงฺคิเกน   มคฺเคน   สุทฺธึ   วิสุทฺธึ  ปริสุทฺธึ  มุตฺตึ  วิมุตฺตึ
ปริมุตฺตึ    วทนฺติ    กเถนฺติ   ภณนฺติ   ทีปยนฺติ   โวหรนฺตีติ   เอวมฺปิ
อติสิตฺวา อญฺเญน วทนฺติ สุทฺธึ ฯ เตนาห ภควา
                       ชานามิ ปสฺสามิ ตเถว เอตํ
                       ทิฏฺฐิยา เอเก ปจฺเจนฺติ สุทฺธึ
                       อทฺทกฺขิ เจ กิญฺหิ ตุมสฺส เตน
                       อติสิตฺวา อญฺเญน วทนฺติ สุทฺธินฺติ ฯ
     [๖๗๐]        ปสฺสํ นโร ทกฺขติ นามรูปํ
                       ทิสฺวาน วาญฺญสฺสติ ๒- ตานิเมว
                       กามํ พหุํ ปสฺสตุ อปฺปกํ วา
                       น หิ เตน สุทฺธึ กุสลา วทนฺติ ฯ
     [๖๗๑]   ปสฺสํ  นโร  ทกฺขติ  นามรูปนฺติ ปสฺสํ นโรติ ปรจิตฺตญาเณน
วา   ปสฺสนฺโต   ปุพฺเพนิวาสานุสฺสติญาเณน   วา   ปสฺสนฺโต  มํสจกฺขุนา
วา    ปสฺสนฺโต    ทิพฺเพน   วา   จกฺขุนา   ปสฺสนฺโต   นามรูปญฺเญว
ทกฺขติ    นิจฺจโต    สุขโต    อตฺตโต   น   เตสํ   ธมฺมานํ   สมุทยํ
@เชิงอรรถ:  ม. ยุ. ติตฺถิยานํ ฯ  ม. ทิสฺวาน วา ญายติ ฯ
วา   อตฺถงฺคมํ  วา  อสฺสาทํ  วา  อาทีนวํ  วา  นิสฺสรณํ  วา  ทกฺขตีติ
ปสฺสํ นโร ทกฺขติ นามรูปํ ฯ
     [๖๗๒]   ทิสฺวาน  วาญฺญสฺสติ  ตานิเมวาติ  ทิสฺวาติ  ปรจิตฺตญาเณน
วา   ทิสฺวา   ปุพฺเพนิวาสานุสฺสติญาเณน   วา   ทิสฺวา  มํสจกฺขุนา  วา
ทิสฺวา   ทิพฺเพน   วา   จกฺขุนา   ทิสฺวา  นามรูปญฺเญว  ทิสฺวา  ญสฺสติ
นิจฺจโต  สุขโต  อตฺตโต  น  เตสํ  ธมฺมานํ  สมุทยํ  วา  อตฺถงฺคมํ  วา
อสฺสาทํ   วา  อาทีนวํ  วา  นิสฺสรณํ  วา  ญสฺสตีติ  ทิสฺวาน  วาญฺญสฺสติ
ตานิเมว ฯ
     [๖๗๓]   กามํ  พหุํ  ปสฺสตุ  อปฺปกํ  วาติ  กามํ พหุกํ วา ปสฺสนฺโต
นามรูปํ  อปฺปกํ  วา  นิจฺจโต  สุขโต  อตฺตโตติ  กามํ  พหุํ ปสฺสตุ อปฺปกํ
วา ฯ
     [๖๗๔]   น  หิ เตน สุทฺธึ กุสลา วทนฺตีติ กุสลาติ เย เต ขนฺธกุสลา
ธาตุกุสลา     อายตนกุสลา     ปฏิจฺจสมุปฺปาทกุสลา    สติปฏฺฐานกุสลา
สมฺมปฺปธานกุสลา      อิทฺธิปฺปาทกุสลา      อินฺทฺริยกุสลา     พลกุสลา
โพชฺฌงฺคกุสลา    มคฺคกุสลา    ผลกุสลา   นิพฺพานกุสลา   เต   กุสลา
ปรจิตฺตญาเณน    วา    ปุพฺเพนิวาสานุสฺสติญาเณน    วา    มํสจกฺขุนา
วา  ทิพฺเพน  วา  จกฺขุนา  นามรูปทสฺสเนน  สุทฺธึ  วิสุทฺธึ  ปริสุทฺธึ มุตฺตึ
วิมุตฺตึ  ปริมุตฺตึ  น  วทนฺติ  น  กเถนฺติ น ภณนฺติ น ทีปยนฺติ น โวหรนฺตีติ
น หิ เตน สุทฺธึ กุสลา วทนฺติ ฯ เตนาห ภควา
                       ปสฺสํ นโร ทกฺขติ นามรูปํ
                       ทิสฺวาน วาญฺญสฺสติ ตานิเมว
                       กามํ พหุํ ปสฺสตุ อปฺปกํ วา
                       น หิ เตน สุทฺธึ กุสลา วทนฺตีติ ฯ
     [๖๗๕]        นิวิสฺสวาที น หิ สุพฺพินาโย
                       ปกปฺปิตํ ๑- ทิฏฺฐิ ปุเรกฺขราโน
                       ยํ นิสฺสิโต ตตฺถ สุภํวทาโน
                       สุทฺธึวโท ตตฺถ ตถทฺทสา โส ฯ
     [๖๗๖]   นิวิสฺสวาที  น  หิ  สุพฺพินาโยติ  สสฺสโต  โลโก  อิทเมว
สจฺจํ   โมฆมญฺญนฺติ   นิวิสฺสวาที   ฯ   อสสฺสโต   โลโก  ฯเปฯ  เนว
โหติ   น   น  โหติ  ตถาคโต  ปรมฺมรณา  อิทเมว  สจฺจํ  โมฆมญฺญนฺติ
นิวิสฺสวาที  ฯ  น  หิ  สุพฺพินาโยติ  นิวิสฺสวาที  ทุพฺพินโย  ทุญฺญาปโย ๒-
ทุนฺนิชฺฌาปโย    ทุปฺเปกฺขาปโย    ทุปฺปสาทโยติ    นิวิสฺสวาที   น   หิ
สุพฺพินาโย ฯ
     [๖๗๗]   ปกปฺปิตํ   ทิฏฺฐิ   ปุเรกฺขราโนติ   ปกปฺปิตํ   อภิสงฺขตํ
สณฺฐปิตํ    ทิฏฺฐึ    ปุรกฺขโต    ปุรโต    กตฺวา    จรติ   ทิฏฺฐิทฺธโช
ทิฏฺฐิเกตุ    ทิฏฺฐาธิปเตยฺโย    ทิฏฺฐิยา   ปริวาริโต   จรตีติ   ปกปฺปิตํ
ทิฏฺฐิ ปุเรกฺขราโน ฯ
     [๖๗๘]   ยํ   นิสฺสิโต   ตตฺถ   สุภํวทาโนติ   ยํ   นิสฺสิโตติ  ยํ
สตฺถารํ   ธมฺมกฺขานํ   คณํ   ทิฏฺฐึ   ปฏิปทํ   มคฺคํ  นิสฺสิโต  สนฺนิสฺสิโต
@เชิงอรรถ:  ม. ปกปฺปิตา ฯ  ม. ทุปฺปญฺญาปโย ฯ
อลฺลีโน   อุปคโต   อชฺโฌสิโต   อธิมุตฺโตติ   ยํ   นิสฺสิโต  ฯ  ตตฺถาติ
สกาย   ทิฏฺฐิยา   สกาย   ขนฺติยา  สกาย  รุจิยา  สกาย  ลทฺธิยา  ฯ
สุภํวทาโนติ   สุภวาโท   โสภนวาโท  ปณฺฑิตวาโท  ธีรวาโท  ญาณวาโท
เหตุวาโท   ลกฺขณวาโท   การณวาโท   ฐานวาโท   สกาย   ลทฺธิยาติ
ยํ นิสฺสิโต ตตฺถ สุภํวทาโน ฯ
     [๖๗๙]   สุทฺธึวโท  ตตฺถ  ตถทฺทสา  โสติ  สุทฺธึวโทติ  สุทฺธิวาโท
วิสุทฺธิวาโท  ปริสุทฺธิวาโท  โวทาตวาโท  ปริโยทาตวาโท  ๑-  ฯ อถวา
สุทฺธิทสฺสโน      วิสุทฺธิทสฺสโน      ปริสุทฺธิทสฺสโน      โวทาตทสฺสโน
ปริโยทาตทสฺสโนติ   ๒-   สุทฺธึวโท   ๓-  ฯ  ตตฺถาติ  สกาย  ทิฏฺฐิยา
สกาย  ขนฺติยา  สกาย  รุจิยา  สกาย  ลทฺธิยา  ฯ  ตถทฺทสา  โสติ ตถํ
ตจฺฉํ   ภูตํ   ยาถาวํ   อวิปรีตนฺติ   อทฺทส   อทฺทกฺขิ  อปสฺสิ  ปฏิวิชฺฌีติ
สุทฺธึวโท ๒- ตตฺถ ตถทฺทสา โส ฯ เตนาห ภควา
                       นิวิสฺสวาที น หิ สุพฺพินาโย
                       ปกปฺปิตํ ทิฏฺฐิ ปุเรกฺขราโน
                       ยํ นิสฺสิโต ตตฺถ สุภํวทาโน
                       สุทฺธึวโท ตตฺถ ตถทฺทสา โสติ ฯ
     [๖๘๐]        น พฺราหฺมโณ กปฺปมุเปติ สงฺขํ ๔-
                       น ทิฏฺฐิสารี นปิ ญาณพนฺธุ
                       ญตฺวา จ โส สมฺมติโย ปุถุชฺชา
                       อุเปกฺขตี อุคฺคหณนฺติ มญฺเญ ฯ
@เชิงอรรถ: ๑-๒ ปริโวทาต .. อิติปิ ปาโฐ ฯ  ม. สุทฺธึวาโท ฯ  ม. สงฺขา ฯ สพฺพตฺถ
@อีทิสเมว ฯ
     [๖๘๑]   น  พฺราหฺมโณ  กปฺปมุเปติ  สงฺขนฺติ  นาติ  ปฏิกฺเขโป  ฯ
พฺราหฺมโณติ    สตฺตนฺนํ    ธมฺมานํ    พาหิตตฺตา    พฺราหฺมโณ   ฯเปฯ
อนิสฺสิโต   ตาทิ   ปวุจฺจเต   ส   พฺรหฺมา   ฯ  กปฺปาติ  เทฺว  กปฺปา
ตณฺหากปฺโป   จ   ทิฏฺฐิกปฺโป   จ   ฯเปฯ   อยํ   ตณฺหากปฺโป  ฯเปฯ
อยํ   ทิฏฺฐิกปฺโป   ฯ   สงฺขา   วุจฺจติ   ญาณํ   ยา  ปญฺญา  ปชานนา
ฯเปฯ    อโมโห    ธมฺมวิจโย    สมฺมาทิฏฺฐิ    ฯ    น   พฺราหฺมโณ
กปฺปมุเปติ    สงฺขนฺติ    พฺราหฺมโณ    สงฺขาย    ชานิตฺวา   ตุลยิตฺวา
ตีรยิตฺวา   วิภาวยิตฺวา   วิภูตํ   กตฺวา   สพฺเพ   สงฺขารา   อนิจฺจาติ
สพฺเพ    สงฺขารา   ทุกฺขาติ   ฯเปฯ   ยงฺกิญฺจิ   สมุทยธมฺมํ   สพฺพนฺตํ
นิโรธธมฺมนฺติ   สงฺขาย   ชานิตฺวา   ตุลยิตฺวา   ตีรยิตฺวา   วิภาวยิตฺวา
วิภูตํ   กตฺวา   ตณฺหากปฺปํ   วา  ทิฏฺฐิกปฺปํ  วา  [๑]-  น  อุเปติ  น
อุปคจฺฉติ   น   คณฺหาติ   น   ปรามสติ   นาภินิวิสตีติ   น  พฺราหฺมโณ
กปฺปมุเปติ สงฺขํ ฯ
     [๖๘๒]   น  ทิฏฺฐิสารี  นปิ  ญาณพนฺธูติ  ตสฺส  ทฺวาสฏฺฐี ทิฏฺฐิคตานิ
ปหีนานิ    สมุจฺฉินฺนานิ    วูปสนฺตานิ   ปฏิปฺปสฺสทฺธานิ   อภพฺพุปฺปตฺติกานิ
ญาณคฺคินา  ทฑฺฒานิ  โส  ทิฏฺฐิยา  น ยายติ น นิยฺยติ น วุยฺหติ น สํหริยติ
นปิ  ตํ ทิฏฺฐิคตํ สารโต ปจฺเจติ ปจฺจาคจฺฉตีติ น ทิฏฺฐิสารี ฯ นปิ ญาณพนฺธูติ
อฏฺฐสมาปตฺติญาเณน    วา    ปญฺจาภิญฺญาญาเณน    วา   มิจฺฉาญาเณน
วา  ตณฺหาพนฺธํ  วา  ทิฏฺฐิพนฺธํ  วา  น  กโรติ  น ชเนติ น สญฺชเนติ น
@เชิงอรรถ:  ม. เนติ ฯ
นิพฺพตฺเตติ นาภินิพฺพตฺเตตีติ น ทิฏฺฐิสารี นปิ ญาณพนฺธุ ฯ
     [๖๘๓]   ญตฺวา    จ    โส   สมฺมติโย   ปุถุชฺชาติ   ญตฺวาติ
ญตฺวา   ชานิตฺวา   ตุลยิตฺวา   ตีรยิตฺวา   วิภาวยิตฺวา   วิภูตํ   กตฺวา
สพฺเพ    สงฺขารา    อนิจฺจาติ   สพฺเพ   สงฺขารา   ทุกฺขาติ   ฯเปฯ
ยงฺกิญฺจิ    สมุทยธมฺมํ    สพฺพนฺตํ    นิโรธธมฺมนฺติ    ญตฺวา   ชานิตฺวา
ตุลยิตฺวา    ตีรยิตฺวา    วิภาวยิตฺวา    วิภูตํ    กตฺวาติ   ญตฺวา   จ
โส  ฯ  สมฺมติโยติ  วุจฺจนฺติ  ทฺวาสฏฺฐี  ทิฏฺฐิคตานิ  [๑]-  ฯ  ปุถุชฺชาติ
ปุถุชฺชเนหิ   ชนิตา   วา   ตา  สมฺมติโยติ  ปุถุชฺชา  ฯ  ปุถุนานาชเนหิ
ชนิตา   วา   ตา   สมฺมติโยติ   ปุถุชฺชาติ   ญตฺวา  จ  โส  สมฺมติโย
ปุถุชฺชา ฯ
     [๖๘๔]   อุเปกฺขตี   อุคฺคหณนฺติ   มญฺเญติ   อญฺเญ   ตณฺหาวเสน
ทิฏฺฐิวเสน    คณฺหนฺติ    ปรามสนฺติ    อภินิวิสนฺติ    อรหา   อุเปกฺขติ
น    คณฺหาติ    น    ปรามสติ   นาภินิวิสตีติ   อุเปกฺขตี   อุคฺคหณนฺติ
มญฺเญ ฯ เตนาห ภควา
                       น พฺราหฺมโณ กปฺปมุเปติ สงฺขํ
                       น ทิฏฺฐิสารี นปิ ญาณพนฺธุ
                       ญตฺวา จ โส สมฺมติโย ปุถุชฺชา
                       อุเปกฺขตี อุคฺคหณนฺติ มญฺเญติ ฯ
     [๖๘๕]        วิสชฺช คนฺถานิ มุนีธ โลเก
                       วิวาทชาเตสุ น วคฺคสารี
@เชิงอรรถ:  โป. ม. ทิฏฺฐิสมฺมุติโย ฯ
                       สนฺโต อสนฺเตสุ อุเปกฺขโก โส
                       อนุคฺคโห อุคฺคหณนฺติ มญฺเญ ฯ
     [๖๘๖]   วิสชฺช  คนฺถานิ  มุนีธ  โลเกติ  คนฺถาติ  จตฺตาโร คนฺถา
อภิชฺฌา    กายคนฺโถ    พฺยาปาโท    กายคนฺโถ    สีลพฺพตฺตปรามาโส
กายคนฺโถ   อิทํสจฺจาภินิเวโส   กายคนฺโถ  ฯ  อตฺตโน  ทิฏฺฐิยา  ราโค
อภิชฺฌา   กายคนฺโถ   ฯ   ปรวาเทสุ  อาฆาโต  อปฺปจฺจโย  พฺยาปาโท
กายคนฺโถ   ฯ  อตฺตโน  สีลํ  วา  วตฺตํ  วา  สีลพฺพตฺตํ  วา  ปรามสติ
สีลพฺพตฺตปรามาโส  กายคนฺโถ  ฯ  อตฺตโน  ทิฏฺฐิ  ๑-  อิทํสจฺจาภินิเวโส
กายคนฺโถ  ฯ วิสชฺชาติ คนฺเถ โวสฺสชฺชิตฺวา วา ๒- วิสชฺช ฯ อถวา คนฺเถ
คถิเต  คนฺถิเต  พนฺเธ  วิพนฺเธ อาพนฺเธ ลคฺเค ลคฺคิเต ปลิพุทฺเธ พนฺธเน
โผฏยิตฺวา  วา  ๒-  วิสชฺช ฯ ยถา วยฺหํ วา รถํ วา สกฏํ วา สนฺทมานิกํ
วา   สชฺชํ  วิสชฺชํ  กโรนฺติ  วิโกเปนฺติ  เอวเมว  คนฺเถ  โวสฺสชฺชิตฺวา
วา  ๓-  วิสชฺช  อถวา  คนฺเถ  คถิเต  คนฺถิเต พนฺเธ วิพนฺเธ อาพนฺเธ
ลคฺเค  ลคฺคิเต  ปลิพุทฺเธ  พนฺธเน  โผฏยิตฺวา  วา  ๔-  วิสชฺช ฯ มุนีติ
โมนํ   วุจฺจติ   ญาณํ   ยา   ปญฺญา   ปชานนา  ฯเปฯ  สงฺคชาลมติจฺจ
โส  มุนิ  ฯ  อิธาติ  อิมิสฺสา  ทิฏฺฐิยา  ฯเปฯ อิมสฺมึ มนุสฺสโลเกติ วิสชฺช
คนฺถานิ มุนีธ โลเก ฯ
     [๖๘๗]   วิวาทชาเตสุ   น  วคฺคสารีติ  วิวาทชาเตสุ  สญฺชาเตสุ
นิพฺพตฺเตสุ     อภินิพฺพตฺเตสุ     ปาตุภูเตสุ     ฉนฺทาคตึ    คจฺฉนฺเตสุ
@เชิงอรรถ:  ม. ทิฏฺฐึ อภินิเวโส กายคนฺโถ ฯ ๒-๓-๔. ม. วาสทฺโท นตฺถิ ฯ
โทสาคตึ   คจฺฉนฺเตสุ   โมหาคตึ   คจฺฉนฺเตสุ   ภยาคตึ  คจฺฉนฺเตสุ  น
ฉนฺทาคตึ   คจฺฉติ   น   โทสาคตึ   คจฺฉติ   น   โมหาคตึ  คจฺฉติ  น
ภยาคตึ   คจฺฉติ   น   ราควเสน   คจฺฉติ   น  โทสวเสน  คจฺฉติ  น
โมหวเสน   คจฺฉติ   น   มานวเสน   คจฺฉติ   น   ทิฏฺฐิวเสน  คจฺฉติ
น   อุทฺธจฺจวเสน   คจฺฉติ   น  วิจิกิจฺฉาวเสน  คจฺฉติ  น  อนุสยวเสน
คจฺฉติ    น   วคฺเคหิ   ธมฺเมหิ   ยายติ   นิยฺยติ   วุยฺหติ   สํหริยตีติ
วิวาทชาเตสุ น วคฺคสารี ฯ
     [๖๘๘]   สนฺโต   อสนฺเตสุ   อุเปกฺขโก  โสติ  สนฺโตติ  ราคสฺส
สนฺตตฺตา    สนฺโต   โทสสฺส   สนฺตตฺตา   สนฺโต   โมหสฺส   สนฺตตฺตา
สนฺโต     ฯเปฯ     สพฺพากุสลาภิสงฺขารานํ     สนฺตตฺตา    สมิตตฺตา
วูปสมิตตฺตา    วิชฺฌาตตฺตา    นิพฺพุตตฺตา    วิคตตฺตา   ปฏิปฺปสฺสทฺธตฺตา
สนฺโต    อุปสนฺโต   วูปสนฺโต   นิพฺพุโต   ปฏิปฺปสฺสทฺโธติ   สนฺโต   ฯ
อสนฺเตสูติ     อสนฺเตสุ     อนุปสนฺเตสุ     อวูปสนฺเตสุ    อนิพฺพุเตสุ
อปฺปฏิปฺปสฺสทฺเธสูติ   สนฺโต   อสนฺเตสุ   ฯ   อุเปกฺขโก   โสติ  อรหา
ฉฬงฺคุเปกฺขาย   สมนฺนาคโต   จกฺขุนา  รูปํ  ทิสฺวา  เนว  สุมโน  โหติ
น   ทุมฺมโน   อุเปกฺขโก   วิหรติ  สโต  สมฺปชาโน  ฯ  โสเตน  สทฺทํ
สุตฺวา   ฯเปฯ  กาลํ  กงฺขติ  ภาวิโต  สุทนฺโตติ  ๑-  สนฺโต  อสนฺเตสุ
อุเปกฺขโก โส ฯ
     [๖๘๙]   อนุคฺคโห   อุคฺคหณนฺติ   มญฺเญติ   อญฺเญ   ตณฺหาวเสน
ทิฏฺฐิวเสน   คณฺหนฺติ   ๒-   ปรามสนฺติ   อภินิวิสนฺติ   อรหา  อุเปกฺขติ
@เชิงอรรถ:  ม. สนฺโตติ ฯ  โป. ม. คณฺหนฺเต ปรามสนฺเต อภินิวิสนฺเต ฯ
น    คณฺหาติ    น    ปรามสติ   นาภินิวิสตีติ   อนุคฺคโห   อุคฺคหณนฺติ
มญฺเญ ฯ เตนาห ภควา
                       วิสชฺช คนฺถานิ มุนีธ โลเก
                       วิวาทชาเตสุ น วคฺคสารี
                       สนฺโต อสนฺเตสุ อุเปกฺขโก โส
                       อนุคฺคโห อุคฺคหณนฺติ มญฺเญติ ฯ
     [๖๙๐]        ปุพฺพาสเว หิตฺวา นเว อกุพฺพํ
                       น ฉนฺทคู โนปิ นิวิสฺสวาที
                       ส วิปฺปมุตฺโต ทิฏฺฐิคเตหิ ธีโร
                       น ลิมฺปตี โลเก อนตฺตครหี ฯ
     [๖๙๑]   ปุพฺพาสเว  หิตฺวา  นเว  อกุพฺพนฺติ  ปุพฺพาสวา  วุจฺจนฺติ
อตีตา  รูปํ  ๑-  เวทนา  สญฺญา  สงฺขารา  วิญฺญาณํ  ฯ อตีเต สงฺขาเร
อารพฺภ   เย   กิเลสา   อุปฺปชฺเชยฺยุํ   เต   กิเลเส  หิตฺวา  จชิตฺวา
ปริจฺจชิตฺวา   ปชหิตฺวา  วิโนทิตฺวา  ๒-  พฺยนฺตีกริตฺวา  อนภาวงฺคมิตฺวาติ
ปุพฺพาสเว   หิตฺวา   ฯ   นเว   อกุพฺพนฺติ  นวา  วุจฺจนฺติ  ปจฺจุปฺปนฺนา
รูปํ   เวทนา   สญฺญา   สงฺขารา   วิญฺญาณํ  ฯ  ปจฺจุปฺปนฺเน  สงฺขาเร
อารพฺภ   ฉนฺทํ   อกุพฺพมาโน   เปมํ   อกุพฺพมาโน   ราคํ  อกุพฺพมาโน
อชนยมาโน    อสญฺชนยมาโน    อนิพฺพตฺตยมาโน    นาภินิพฺพตฺตยมาโนติ
ปุพฺพาสเว หิตฺวา นเว อกุพฺพํ ฯ
     [๖๙๒]   น  ฉนฺทคู  โนปิ  นิวิสฺสวาทีติ  น  ฉนฺทคูติ  น  ฉนฺทาคตึ
@เชิงอรรถ:  ม. รูป ... สงฺขารวิญฺญาณา ฯ  ม. วิโนเทตฺวา พฺยนฺตึกริตฺวา ฯ
คจฺฉติ   น   โทสาคตึ   คจฺฉติ   น   โมหาคตึ   คจฺฉติ   น  ภยาคตึ
คจฺฉติ   น   ราควเสน   คจฺฉติ  น  โทสวเสน  คจฺฉติ  น  โมหวเสน
คจฺฉติ   น  มานวเสน  คจฺฉติ  น  ทิฏฺฐิวเสน  คจฺฉติ  น  อุทฺธจฺจวเสน
คจฺฉติ    น    วิจิกิจฺฉาวเสน    คจฺฉติ    น    อนุสยวเสน   คจฺฉติ
น   วคฺเคหิ   ธมฺเมหิ  ยายติ  นิยฺยติ  วุยฺหติ  สํหริยตีติ  น  ฉนฺทคู  ฯ
โนปิ    นิวิสฺสวาทีติ   สสฺสโต   โลโก   อิทเมว   สจฺจํ   โมฆมญฺญนฺติ
[๑]-  นิวิสฺสวาที  อสสฺสโต  โลโก  อิทเมว  สจฺจํ  โมฆมญฺญนฺติ  ฯเปฯ
เนว   โหติ   น   น   โหติ   ตถาคโต   ปรมฺมรณา   อิทเมว  สจฺจํ
โมฆมญฺญนฺติ นิวิสฺสวาทีติ น ฉนฺทคู โนปิ นิวิสฺสวาที ฯ
     [๖๙๓]   ส  วิปฺปมุตฺโต  ทิฏฺฐิคเตหิ ธีโรติ ตสฺส ทฺวาสฏฺฐี ทิฏฺฐิคตานิ
ปหีนานิ    สมุจฺฉินฺนานิ    วูปสนฺตานิ   ปฏิปฺปสฺสทฺธานิ   อภพฺพุปฺปตฺติกานิ
ญาณคฺคินา    ทฑฺฒานิ    โส    ทิฏฺฐิคเตหิ    วิปฺปมุตฺโต    วิสญฺญุตฺโต
วิมริยาทิกเตน   เจตสา   วิหรตีติ   ฯ  ธีโรติ  ธีโร  ปณฺฑิโต  ปญฺญวา
พุทฺธิมา ญาณี วิภาวี เมธาวีติ ส วิปฺปมุตฺโต ทิฏฺฐิคเตหิ ธีโร ฯ
     [๖๙๔]   น  ลิมฺปตี  โลเก  อนตฺตครหีติ  เลโปติ  ๒- เทฺว เลปา
ตณฺหาเลโป   จ   ทิฏฺฐิเลโป  จ  ฯเปฯ  อยํ  ตณฺหาเลโป  ฯเปฯ  อยํ
ทิฏฺฐิเลโป  ฯ  ตสฺส  ตณฺหาเลโป  ปหีโน  ทิฏฺฐิเลโป  ปฏินิสฺสฏฺโฐ [๓]-
ตณฺหาเลปสฺส        ปหีนตฺตา       ทิฏฺฐิเลปสฺส       ปฏินิสฺสฏฺฐตฺตา
อนุปลิตฺโต  ๔-  อปายโลเก  น  ลิมฺปติ  มนุสฺสโลเก น ลิมฺปติ เทวโลเก
@เชิงอรรถ:  ม. นสทฺโท อตฺถิ ฯ  ม. เลปาติ ฯ  ม. ตสฺส ฯ  ม. อยํ ปาโฐ น
@ทิสฺสติ ฯ
น   ลิมฺปติ  ขนฺธโลเก  น  ลิมฺปติ  ธาตุโลเก  น  ลิมฺปติ  อายตนโลเก
น   ลิมฺปติ   น   สํลิมฺปติ   นุปลิมฺปติ   อลิตฺโต   อสํลิตฺโต  อนุปลิตฺโต
นิกฺขนฺโต   นิสฺสฏฺโฐ   วิปฺปมุตฺโต   วิสญฺญุตฺโต   วิมริยาทิกเตน  เจตสา
วิหรตีติ   น   ลิมฺปติ  โลเก  ฯ  อนตฺตครหีติ  ทฺวีหิ  การเณหิ  อตฺตานํ
ครหติ   กตตฺตา   จ  อกตตฺตา  จ  ฯ  กถํ  กตตฺตา  จ  อกตตฺตา  จ
อตฺตานํ   ครหติ   ฯ   กตํ  เม  กายทุจฺจริตํ  อกตํ  เม  กายสุจริตนฺติ
อตฺตานํ  ครหติ  กตํ  เม  วจีทุจฺจริตํ  กตํ  เม  มโนทุจฺจริตํ  กโต  เม
ปาณาติปาโต   ฯเปฯ   กตา  เม  มิจฺฉาทิฏฺฐิ  อกตา  เม  สมฺมาทิฏฺฐีติ
อตฺตานํ ครหติ ฯ เอวํ กตตฺตา จ อกตตฺตา จ อตฺตานํ ครหติ ฯ
     {๖๙๔.๑}   อถวา  สีเลสุมฺหิ  น  ปริปูริการีติ  ๑- อตฺตานํ ครหติ
อินฺทฺริเยสุมฺหิ     อคุตฺตทฺวาโรติ     โภชเน     อมตฺตญฺญุมฺหีติ     ๒-
ชาคริยมนนุยุตฺโตติ   ๓-   น   สติสมฺปชญฺเญน   สมนฺนาคโตติ  อภาวิตา
เม   จตฺตาโร   สติปฏฺฐานาติ  อภาวิตา  เม  จตฺตาโร  สมฺมปฺปธานาติ
อภาวิตา   เม  จตฺตาโร  อิทฺธิปฺปาทาติ  อภาวิตานิ  เม  ปญฺจินฺทฺริยานีติ
อภาวิตานิ   เม   ปญฺจ   พลานีติ   อภาวิตา   เม  สตฺต  โพชฺฌงฺคาติ
อภาวิโต   เม   อริโย   อฏฺฐงฺคิโก  มคฺโคติ  ทุกฺขํ  เม  อปริญฺญาตนฺติ
ทุกฺขสมุทโย   เม   อปฺปหีโนติ   มคฺโค   เม  อภาวิโตติ  นิโรโธ  เม
อสจฺฉิกโตติ  อตฺตานํ  ครหติ  ฯ  เอวํ  กตตฺตา  จ  อกตตฺตา จ อตฺตานํ
ครหติ   ฯ   เอวํ   อตฺตครหิยํ   ๔-   กมฺมํ  อกุพฺพมาโน  อชนยมาโน
@เชิงอรรถ:  ม. ยุ. ปริปูรการี ฯ  ม. โภชเนมฺหิ อมตฺตญฺญูติ ฯ  ม. ชาคริยมฺหิ ฯ
@สติสมฺปชญฺเญนามฺหิ ฯ  ม. อตฺตครหี ฯ ตยิทํ กมฺมํ ฯ
อสญฺชนยมาโน           อนิพฺพตฺตยมาโน          นาภินิพฺพตฺตยมาโน
อนตฺตครหีติ น ลิมฺปตี โลเก อนตฺตครหี ฯ เตนาห ภควา
                       ปุพฺพาสเว หิตฺวา นเว อกุพฺพํ
                       น ฉนฺทคู โนปิ นิวิสฺสวาที
                       ส วิปฺปมุตฺโต ทิฏฺฐิคเตหิ ธีโร
                       น ลิมฺปตี โลเก อนตฺตครหีติ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๒๙ หน้าที่ ๓๖๕-๔๐๒. https://84000.org/tipitaka/read/pali_item.php?book=29&item=597&items=98              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=29&item=597&items=98&mode=bracket              อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=29&item=597&items=98              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=29&item=597&items=98              ศึกษาอรรถกถานี้ได้ที่ :- https://84000.org/tipitaka/attha/attha.php?b=29&i=597              สารบัญพระไตรปิฎกเล่มที่ ๒๙ https://84000.org/tipitaka/read/?index_29 https://84000.org/tipitaka/english/?index_29

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]