พระไตรปิฎกเล่มที่ ๒๐ ภาษาบาลี อักษรไทย
พระสุตตันตปิฎกเล่มที่ ๑๒ สุตฺต. องฺ. (๑): เอก-ทุก-ติกนิปาตา

                      ตติยปณฺณาสโก
     [๓๖๓]   ๑๑๗  เทฺวมา  ภิกฺขเว  อาสา  ทุปฺปชหา  กตมา  เทฺว
ลาภาสา จ ชีวิตาสา จ อิมา โข ภิกฺขเว เทฺว อาสา ทุปฺปชหาติ ฯ
     [๓๖๔]   ๑๑๘  เทฺวเม  ภิกฺขเว  ปุคฺคลา  ทุลฺลภา  โลกสฺมึ กตเม
เทฺว   โย   จ   ปุพฺพการี   โย   จ   กตญฺญู   กตเวที   อิเม  โข
ภิกฺขเว เทฺว ปุคฺคลา ทุลฺลภา โลกสฺมินฺติ ฯ
     [๓๖๕]   ๑๑๙  เทฺวเม  ภิกฺขเว  ปุคฺคลา  ทุลฺลภา  โลกสฺมึ กตเม
เทฺว   ติตฺโต   จ   ตปฺเปตา   จ  อิเม  โข  ภิกฺขเว  เทฺว  ปุคฺคลา
ทุลฺลภา โลกสฺมินฺติ ฯ
     [๓๖๖]   ๑๒๐  เทฺวเม  ภิกฺขเว  ปุคฺคลา  ทุตฺตปฺปยา  กตเม เทฺว
โย   จ   ลทฺธํ  ลทฺธํ  นิกฺขิปติ  โย  จ  ลทฺธํ  ลทฺธํ  วิสฺสชฺเชติ  อิเม
โข ภิกฺขเว เทฺว ปุคฺคลา ทุตฺตปฺปยาติ ฯ
     [๓๖๗]   ๑๒๑  เทฺวเม  ภิกฺขเว  ปุคฺคลา  สุตปฺปยา  กตเม  เทฺว
โย   จ  ลทฺธํ  ลทฺธํ  น  นิกฺขิปติ  โย  จ  ลทฺธํ  ลทฺธํ  น  วิสฺสชฺเชติ
อิเม โข ภิกฺขเว เทฺว ปุคฺคลา สุตปฺปยาติ ฯ
     [๓๖๘]   ๑๒๒  เทฺวเม  ภิกฺขเว  ปจฺจยา ราคสฺส อุปฺปาทาย กตเม
เทฺว   สุภนิมิตฺตญฺจ   อโยนิโส   จ   มนสิกาโร   อิเม   โข  ภิกฺขเว
เทฺว ปจฺจยา ราคสฺส อุปฺปาทายาติ ฯ
     [๓๖๙]   ๑๒๓  เทฺวเม  ภิกฺขเว  ปจฺจยา โทสสฺส อุปฺปาทาย กตเม
เทฺว   ปฏิฆนิมิตฺตญฺจ   อโยนิโส   จ   มนสิกาโร   อิเม  โข  ภิกฺขเว
เทฺว ปจฺจยา โทสสฺส อุปฺปาทายาติ ฯ
     [๓๗๐]   ๑๒๔  เทฺวเม  ภิกฺขเว  ปจฺจยา  มิจฺฉาทิฏฺฐิยา อุปฺปาทาย
กตเม   เทฺว   ปรโต  จ  โฆโส  อโยนิโส  จ  มนสิกาโร  อิเม  โข
ภิกฺขเว เทฺว ปจฺจยา มิจฺฉาทิฏฺฐิยา อุปฺปาทายาติ ฯ
     [๓๗๑]   ๑๒๕  เทฺวเม  ภิกฺขเว  ปจฺจยา  สมฺมาทิฏฺฐิยา อุปฺปาทาย
กตเม   เทฺว   ปรโต   จ  โฆโส  โยนิโส  จ  มนสิกาโร  อิเม  โข
ภิกฺขเว เทฺว ปจฺจยา สมฺมาทิฏฺฐิยา อุปฺปาทายาติ ฯ
     [๓๗๒]   ๑๒๖  เทฺวมา  ภิกฺขเว  อาปตฺติโย  กตมา  เทฺว  ลหุกา
จ อาปตฺติ ครุกา จ อาปตฺติ อิมา โข ภิกฺขเว เทฺว อาปตฺติโยติ ฯ
     [๓๗๓]   ๑๒๗   เทฺวมา   ภิกฺขเว   อาปตฺติโย   กตมา   เทฺว
ทุฏฺฐุลฺลา   จ   อาปตฺติ   อทุฏฺฐุลฺลา   จ  อาปตฺติ  อิมา  โข  ภิกฺขเว
เทฺว อาปตฺติโยติ ฯ
     [๓๗๔]   ๑๒๘  เทฺวมา  ภิกฺขเว  อาปตฺติโย กตมา เทฺว สาวเสสา
จ   อาปตฺติ   อนวเสสา   จ   อาปตฺติ    อิมา   โข  ภิกฺขเว  เทฺว
อาปตฺติโยติ ฯ
                  อาสาวคฺโค ปฐโม ๑- ฯ
     [๓๗๕]   ๑๒๙  สทฺโธ  ภิกฺขเว  ภิกฺขุ  เอวํ  สมฺมา  อายาจมาโน
อายาเจยฺย  ตาทิโส  โหมิ  ยาทิสา สารีปุตฺตโมคฺคลฺลานาติ เอสา ภิกฺขเว
ตุลา เอตํ ปมาณํ มม สาวกานํ ภิกฺขูนํ ยทิทํ สารีปุตฺตโมคฺคลฺลานาติ ฯ
     [๓๗๖]   ๑๓๐  สทฺธา  ภิกฺขเว  ภิกฺขุนี  เอวํ  สมฺมา อายาจมานา
อายาเจยฺย  ตาทิสา  ๒-  โหมิ  ยาทิสา ๓- เขมา จ ภิกฺขุนี อุปฺปลวณฺณา
จาติ   เอสา   ภิกฺขเว   ตุลา   เอตํ  ปมาณํ  มม  สาวิกานํ  ภิกฺขุนีนํ
ยทิทํ เขมา จ ภิกฺขุนี อุปฺปลวณฺณา จาติ ฯ
     [๓๗๗]   ๑๓๑  สทฺโธ  ภิกฺขเว  อุปาสโก เอวํ สมฺมา อายาจมาโน
@เชิงอรรถ: ๑ ยุ. เอกาทสโม ฯ ๒-๓ ม. ตาทิสี ยาทิสี ฯ อิโต ปรํ อีทิสเมว ฯ
อายาเจยฺย   ตาทิโส   โหมิ   ยาทิโส  จิตฺโต  จ  คหปติ  หตฺถโก  จ
อาฬวโกติ   เอสา   ภิกฺขเว   ตุลา   เอตํ   ปมาณํ   มม   สาวกานํ
อุปาสกานํ ยทิทํ จิตฺโต จ คหปติ หตฺถโก จ อาฬวโกติ ฯ
     [๓๗๘]   ๑๓๒  สทฺธา  ภิกฺขเว  อุปาสิกา เอวํ สมฺมา อายาจมานา
อายาเจยฺย    ตาทิสา    โหมิ   ยาทิสา   ขุชฺชุตฺตรา   จ   อุปาสิกา
เวฬุกณฺฏกิยา   จ   นนฺทมาตาติ   เอสา   ภิกฺขเว  ตุลา  เอตํ  ปมาณํ
มมสาวิกานํ   อุปาสิกานํ   ยทิทํ  ขุชฺชุตฺตรา  จ  อุปาสิกา  เวฬุกณฺฏกิยา
จ นนฺทมาตาติ ฯ
     [๓๗๙]   ๑๓๓   ทฺวีหิ   ภิกฺขเว   ธมฺเมหิ   สมนฺนาคโต  พาโล
อพฺยตฺโต    อสปฺปุริโส    ขตํ   อุปหตํ   อตฺตานํ   ปริหรติ   สาวชฺโช
จ   โหติ   สานุวชฺโช   ๑-   วิญฺญูนํ   พหุญฺจ  อปุญฺญํ  ปสวติ  กตเมหิ
ทฺวีหิ    อนนุวิจฺจ    อปริโยคาเหตฺวา    อวณฺณารหสฺส   วณฺณํ   ภาสติ
อนนุวิจฺจ    อปริโยคาเหตฺวา    วณฺณารหสฺส   อวณฺณํ   ภาสติ   อิเมหิ
โข   ภิกฺขเว  ทฺวีหิ  ธมฺเมหิ  สมนฺนาคโต  พาโล  อพฺยตฺโต  อสปฺปุริโส
ขตํ   อุปหตํ   อตฺตานํ  ปริหรติ  สาวชฺโช  จ  โหติ  สานุวชฺโช  วิญฺญูนํ
พหุญฺจ   อปุญฺญํ   ปสวติ   ฯ   ทฺวีหิ   ภิกฺขเว   ธมฺเมหิ   สมนฺนาคโต
ปณฺฑิโต    พฺยตฺโต    สปฺปุริโส   อกฺขตํ   อนุปหตํ   อตฺตานํ   ปริหรติ
อนวชฺโช   จ   โหติ  อนนุวชฺโช  วิญฺญูนํ  พหุญฺจ  ปุญฺญํ  ปสวติ  กตเมหิ
ทฺวีหิ   อนุวิจฺจ   ปริโยคาเหตฺวา  อวณฺณารหสฺส  อวณฺณํ  ภาสติ  อนุวิจฺจ
ปริโยคาเหตฺวา   วณฺณารหสฺส  วณฺณํ  ภาสติ  อิเมหิ  โข  ภิกฺขเว  ทฺวีหิ
@เชิงอรรถ: ๑ ม. สพฺพตฺถ จสทฺโท อตฺถิ ฯ
ธมฺเมหิ   สมนฺนาคโต   ปณฺฑิโต   พฺยตฺโต   สปฺปุริโส   อกฺขตํ  อนุปหตํ
อตฺตานํ   ปริหรติ   อนวชฺโช   จ   โหติ   อนนุวชฺโช   วิญฺญูนํ  พหุญฺจ
ปุญฺญํ ปสวตีติ ฯ
     [๓๘๐]   ๑๓๔  ทฺวีหิ  ภิกฺขเว  ธมฺเมหิ สมนฺนาคโต พาโล อพฺยตฺโต
อสปฺปุริโส  ขตํ  อุปหตํ  อตฺตานํ  ปริหรติ  สาวชฺโช  จ  โหติ สานุวชฺโช
วิญฺญูนํ     พหุญฺจ    อปุญฺญํ    ปสวติ    กตเมหิ    ทฺวีหิ    อนนุวิจฺจ
อปริโยคาเหตฺวา   อปฺปสาทนีเย   ฐาเน   ปสาทํ   อุปทํเสติ  อนนุวิจฺจ
อปริโยคาเหตฺวา   ปสาทนีเย   ฐาเน  อปฺปสาทํ  อุปทํเสติ  อิเมหิ  โข
ภิกฺขเว   ทฺวีหิ  ธมฺเมหิ  สมนฺนาคโต  พาโล  อพฺยตฺโต  อสปฺปุริโส  ขตํ
อุปหตํ   อตฺตานํ   ปริหรติ   สาวชฺโช   จ   โหติ   สานุวชฺโช  วิญฺญูนํ
พหุญฺจ  อปุญฺญํ  ปสวติ  ฯ  ทฺวีหิ  ภิกฺขเว  ธมฺเมหิ  สมนฺนาคโต  ปณฺฑิโต
พฺยตฺโต   สปฺปุริโส   อกฺขตํ   อนุปหตํ   อตฺตานํ  ปริหรติ  อนวชฺโช  จ
โหติ    อนนุวชฺโช   วิญฺญูนํ   พหุญฺจ   ปุญฺญํ   ปสวติ   กตเมหิ   ทฺวีหิ
อนุวิจฺจ   ปริโยคาเหตฺวา   อปฺปสาทนีเย   ฐาเน   อปฺปสาทํ  อุปทํเสติ
อนุวิจฺจ   ปริโยคาเหตฺวา   ปสาทนีเย  ฐาเน  ปสาทํ  อุปทํเสติ  อิเมหิ
โข   ภิกฺขเว   ทฺวีหิ  ธมฺเมหิ  สมนฺนาคโต  ปณฺฑิโต  พฺยตฺโต  สปฺปุริโส
อกฺขตํ   อนุปหตํ   อตฺตานํ   ปริหรติ   อนวชฺโช   จ  โหติ  อนนุวชฺโช
วิญฺญูนํ พหุญฺจ ปุญฺญํ ปสวตีติ ฯ
     [๓๘๑]   ๑๓๕  ทฺวีสุ  ภิกฺขเว  มิจฺฉาปฏิปชฺชมาโน  พาโล อพฺยตฺโต
อสปฺปุริโส  ขตํ  อุปหตํ  อตฺตานํ  ปริหรติ  สาวชฺโช  จ  โหติ สานุวชฺโช
วิญฺญูนํ   พหุญฺจ   อปุญฺญํ   ปสวติ   กตเมสุ  ทฺวีสุ  มาตริ  จ  ปิตริ  จ
อิเมสุ   โข   ภิกฺขเว   ทฺวีสุ   มิจฺฉาปฏิปชฺชมาโน   พาโล   อพฺยตฺโต
อสปฺปุริโส    ขตํ   อุปหตํ   อตฺตานํ   ปริหรติ   สาวชฺโช   จ   โหติ
สานุวชฺโช    วิญฺญูนํ    พหุญฺจ   อปุญฺญํ   ปสวติ   ฯ   ทฺวีสุ   ภิกฺขเว
สมฺมาปฏิปชฺชมาโน    ปณฺฑิโต    พฺยตฺโต   สปฺปุริโส   อกฺขตํ   อนุปหตํ
อตฺตานํ   ปริหรติ   อนวชฺโช   จ   โหติ   อนนุวชฺโช   วิญฺญูนํ  พหุญฺจ
ปุญฺญํ   ปสวติ   กตเมสุ   ทฺวีสุ  มาตริ  จ  ปิตริ  จ  อิเมสุ  โข  ๑-
ภิกฺขเว   ทฺวีสุ   สมฺมาปฏิปชฺชมาโน  ปณฺฑิโต  พฺยตฺโต  สปฺปุริโส  อกฺขตํ
อนุปหตํ   อตฺตานํ   ปริหรติ   อนวชฺโช   จ   โหติ  อนนุวชฺโช  วิญฺญูนํ
พหุญฺจ ปุญฺญํ ปสวตีติ ฯ
     [๓๘๒]   ๑๓๖  ทฺวีสุ  ภิกฺขเว  มิจฺฉาปฏิปชฺชมาโน  พาโล อพฺยตฺโต
อสปฺปุริโส    ขตํ   อุปหตํ   อตฺตานํ   ปริหรติ   สาวชฺโช   จ   โหติ
สานุวชฺโช   วิญฺญูนํ   พหุญฺจ   อปุญฺญํ   ปสวติ  กตเมสุ  ทฺวีสุ  ตถาคเต
จ   ตถาคตสาวเก   จ  อิเมสุ  โข  ภิกฺขเว  ทฺวีสุ  มิจฺฉาปฏิปชฺชมาโน
พาโล    อพฺยตฺโต    อสปฺปุริโส    ขตํ    อุปหตํ   อตฺตานํ   ปริหรติ
สาวชฺโช   จ   โหติ   สานุวชฺโช   วิญฺญูนํ   พหุญฺจ  อปุญฺญํ  ปสวติ  ฯ
ทฺวีสุ   ภิกฺขเว   สมฺมาปฏิปชฺชมาโน  ปณฺฑิโต  พฺยตฺโต  สปฺปุริโส  อกฺขตํ
อนุปหตํ   อตฺตานํ   ปริหรติ   อนวชฺโช   จ   โหติ  อนนุวชฺโช  วิญฺญูนํ
@เชิงอรรถ: ๑ ยุ. โขสทฺโท นตฺถิ ฯ
พหุญฺจ   ปุญฺญํ   ปสวติ   กตเมสุ   ทฺวีสุ   ตถาคเต  จ  ตถาคตสาวเก
จ   อิเมสุ   โข   ภิกฺขเว  ทฺวีสุ  สมฺมาปฏิปชฺชมาโน  ปณฺฑิโต  พฺยตฺโต
สปฺปุริโส   อกฺขตํ   อนุปหตํ   อตฺตานํ   ปริหรติ   อนวชฺโช   จ  โหติ
อนนุวชฺโช วิญฺญูนํ พหุญฺจ ปุญฺญํ ปสวตีติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๒๐ หน้าที่ ๑๐๘-๑๑๔.
https://84000.org/tipitaka/read/pali_item.php?book=20&item=363&items=20
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=20&item=363&items=20&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=20&item=363&items=20
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=20&item=363&items=20
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=20&i=363
             สารบัญพระไตรปิฎกเล่มที่ ๒๐
https://84000.org/tipitaka/read/?index_20
https://84000.org/tipitaka/english/?index_20