[๖๑๙] เตน สมเยน พุทฺโธ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน สมฺพหุลา
ภิกฺขู จ ปริพฺพาชกา จ สาเกตา สาวตฺถึ อทฺธานมคฺคปฏิปนฺนา
โหนฺติ ฯ อนฺตรามคฺเค โจรา นิกฺขมิตฺวา เต อจฺฉินฺทึสุ ฯ
สาวตฺถิยา ราชภฏา นิกฺขมิตฺวา เต โจเร สภณฺเฑ คเหตฺวา
ภิกฺขูนํ สนฺติเก ทูตํ ปาเหสุํ อาคจฺฉนฺตุ ภทฺทนฺตา สกํ สกํ
จีวรํ สญฺชานิตฺวา คณฺหนฺตูติ ฯ ภิกฺขู จีวรํ ๑- น สญฺชานนฺติ ฯ
มนุสฺสา ๒- อุชฺฌายนฺติ ขียนฺติ วิปาเจนฺติ กถํ หิ นาม ภทฺทนฺตา
อตฺตโน อตฺตโน จีวรํ น สญฺชานิสฺสนฺตีติ ฯ อสฺโสสุํ โข
ภิกฺขู เตสํ มนุสฺสานํ อุชฺฌายนฺตานํ ขียนฺตานํ วิปาเจนฺตานํ ฯ
{๖๑๙.๑} อถโข เต ภิกฺขู ภควโต เอตมตฺถํ อาโรเจสุํ ฯ อถโข
ภควา เอตสฺมึ นิทาเน เอตสฺมึ ปกรเณ ภิกฺขุสงฺฆํ สนฺนิปาตาเปตฺวา
ภิกฺขูนํ ตทนุจฺฉวิกํ ตทนุโลมิกํ ธมฺมึ กถํ กตฺวา ภิกฺขู อามนฺเตสิ
เตนหิ ภิกฺขเว ภิกฺขูนํ สิกฺขาปทํ ปญฺญาเปสฺสามิ ทส อตฺถวเส
ปฏิจฺจ สงฺฆสุฏฺฐุตาย สงฺฆผาสุตาย ฯเปฯ สทฺธมฺมฏฺฐิติยา
วินยานุคฺคหาย ฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
{๖๑๙.๒} นวํ ปน ภิกฺขุนา จีวรลาเภน ติณฺณํ ทุพฺพณฺณกรณานํ
อญฺญตรํ ทุพฺพณฺณกรณํ อาทาตพฺพํ นีลํ วา กทฺทมํ วา กาฬสามํ
วา ฯ อนาทา เจ ภิกฺขุ ติณฺณํ ทุพฺพณฺณกรณานํ อญฺญตรํ ทุพฺพณฺณกรณํ
@เชิงอรรถ: ๑ ม. อยํ ปาโฐ นตฺถิ ฯ ๒ ม. เต ฯ
นวํ จีวรํ ปริภุญฺเชยฺย ปาจิตฺติยนฺติ ฯ
[๖๒๐] นวํ นาม อกตกปฺปํ วุจฺจติ ฯ จีวรํ นาม ฉนฺนํ จีวรานํ
อญฺญตรํ จีวรํ ฯ ติณฺณํ ทุพฺพณฺณกรณานํ อญฺญตรํ ทุพฺพณฺณกรณํ
อาทาตพฺพนฺติ อนฺตมโส กุสคฺเคนปิ อาทาตพฺพํ ฯ นีลํ นาม
เทฺว นีลานิ กํสนีลํ ปลาสนีลํ ฯ กทฺทโม นาม โอทโก วุจฺจติ ฯ
กาฬสามํ นาม ยงฺกิญฺจิ กาฬกํ ๑- ฯ อนาทา เจ ภิกฺขุ
ติณฺณํ ทุพฺพณฺณกรณานํ อญฺญตรํ ทุพฺพณฺณกรณนฺติ อนฺตมโส
กุสคฺเคนปิ อนาทิยิตฺวา ติณฺณํ ทุพฺพณฺณกรณานํ อญฺญตรํ
ทุพฺพณฺณกรณํ นวํ จีวรํ ปริภุญฺชติ อาปตฺติ ปาจิตฺติยสฺส ฯ
[๖๒๑] อนาทินฺเน อนาทินฺนสญฺญี ปริภุญฺชติ อาปตฺติ
ปาจิตฺติยสฺส ฯ อนาทินฺเน เวมติโก ปริภุญฺชติ อาปตฺติ ปาจิตฺติยสฺส ฯ
อนาทินฺเน อาทินฺนสญฺญี ปริภุญฺชติ อาปตฺติ ปาจิตฺติยสฺส ฯ
อาทินฺเน อนาทินฺนสญฺญี อาปตฺติ ทุกฺกฏสฺส ฯ อาทินฺเน เวมติโก
อาปตฺติ ทุกฺกฏสฺส ฯ อาทินฺเน อาทินฺนสญฺญี อนาปตฺติ ฯ
[๖๒๒] อนาปตฺติ อาทิยิตฺวา ปริภุญฺชติ กปฺโป นฏฺโฐ โหติ
กปฺปกโตกาโส ชิณฺโณ โหติ กปฺปกเตน อกปฺปกตํ สํสิพฺพิตํ โหติ
อคฺคเฬ อนุวาเต ปริภณฺเฑ อุมฺมตฺตกสฺส อาทิกมฺมิกสฺสาติ ฯ
อฏฺฐมสิกฺขาปทํ นิฏฺฐิตํ ฯ
--------
@เชิงอรรถ: ๑ ม. ยุ. กาฬสามกํ ฯ
นวมสิกฺขาปทํ
[๖๒๓] เตน สมเยน พุทฺโธ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน อายสฺมา
อุปนนฺโท สกฺยปุตฺโต ภาตุโน สทฺธิวิหาริกสฺส ภิกฺขุโน สามํ
จีวรํ วิกปฺเปตฺวา อปจฺจุทฺธารกํ ๑- ปริภุญฺชติ ฯ อถโข โส ภิกฺขุ
ภิกฺขูนํ เอตมตฺถํ อาโรเจสิ อยํ อาวุโส อายสฺมา อุปนนฺโท
สกฺยปุตฺโต มยฺหํ สามํ จีวรํ วิกปฺเปตฺวา อปจฺจุทฺธารกํ
ปริภุญฺชตีติ ฯ เย เต ภิกฺขู อปฺปิจฺฉา ฯเปฯ เต อุชฺฌายนฺติ
ขียนฺติ วิปาเจนฺติ กถํ หิ นาม อายสฺมา อุปนนฺโท สกฺยปุตฺโต
ภิกฺขุสฺส สามํ จีวรํ วิกปฺเปตฺวา อปจฺจุทฺธารกํ ปริภุญฺชิสฺสตีติ
ฯเปฯ สจฺจํ กิร ตฺวํ อุปนนฺท ภิกฺขุสฺส สามํ จีวรํ วิกปฺเปตฺวา
อปจฺจุทฺธารกํ ปริภุญฺชสีติ ฯ สจฺจํ ภควาติ ฯ วิครหิ พุทฺโธ
ภควา กถํ หิ นาม ตฺวํ โมฆปุริส ภิกฺขุสฺส สามํ จีวรํ
วิกปฺเปตฺวา อปจฺจุทฺธารกํ ปริภุญฺชิสฺสสิ เนตํ โมฆปุริส
อปฺปสนฺนานํ วา ปสาทาย ปสนฺนานํ วา ภิยฺโยภาวาย ฯเปฯ
เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
{๖๒๓.๑} โย ปน ภิกฺขุ ภิกฺขุสฺส วา ภิกฺขุนิยา วา สิกฺขมานาย
วา สามเณรสฺส วา สามเณริยา วา สามํ จีวรํ วิกปฺเปตฺวา
อปจฺจุทฺธารกํ ปริภุญฺเชยฺย ปาจิตฺติยนฺติ ฯ
@เชิงอรรถ: ๑ ม. ยุ. อปจฺจุทฺธารณํ ฯ เอวมุปริปิ ฯ
[๖๒๔] โย ปนาติ โย ยาทิโส ฯเปฯ ภิกฺขูติ ฯเปฯ อยํ อิมสฺมึ
อตฺเถ อธิปฺเปโต ภิกฺขูติ ฯ ภิกฺขุสฺสาติ อญฺญสฺส ภิกฺขุสฺส ฯ
{๖๒๔.๑} ภิกฺขุนี นาม อุภโตสงฺเฆ อุปสมฺปนฺนา ฯ สิกฺขมานา
นาม เทฺว วสฺสานิ ฉสุ ธมฺเมสุ สิกฺขิตสิกฺขา ฯ สามเณโร นาม
ทสสิกฺขาปทิโก ฯ สามเณรี นาม ทสสิกฺขาปทิกา ฯ สามนฺติ สยํ
วิกปฺเปตฺวา ฯ จีวรํ นาม ฉนฺนํ จีวรานํ อญฺญตรํ จีวรํ วิกปฺปนุปคํ
ปจฺฉิมํ ฯ วิกปฺปนํ นาม เทฺว วิกปฺปนา สมฺมุขาวิกปฺปนา จ
ปรมฺมุขาวิกปฺปนา จ ฯ สมฺมุขาวิกปฺปนา นาม อิมํ จีวรํ ตุยฺหํ
วิกปฺเปมิ อิตฺถนฺนามสฺส วาติ ฯ ปรมฺมุขาวิกปฺปนา นาม อิมํ
จีวรํ วิกปฺปนตฺถาย ตุยฺหํ ทมฺมีติ ฯ เตน วตฺตพฺโพ โก เต
มิตฺโต วา สนฺทิฏฺโฐ วาติ ฯ อิตฺถนฺนาโม จ อิตฺถนฺนาโม จาติ ฯ
เตน วตฺตพฺโพ อหํ เตสํ ทมฺมิ เตสํ สนฺตกํ ปริภุญฺช วา
วิสฺสชฺเชหิ วา ยถาปจฺจยํ วา กโรหีติ ฯ อปจฺจุทฺธารกํ นาม
ตสฺส วา อทินฺนํ ตสฺส วา อวิสฺสาเสนฺโต ๑- ปริภุญฺชติ อาปตฺติ
ปาจิตฺติยสฺส ฯ
[๖๒๕] อปจฺจุทฺธารเก อปจฺจุทฺธารกสญฺญี ปริภุญฺชติ อาปตฺติ
ปาจิตฺติยสฺส ฯ อปจฺจุทฺธารเก เวมติโก ปริภุญฺชติ อาปตฺติ
ปาจิตฺติยสฺส ฯ อปจฺจุทฺธารเก ปจฺจุทฺธารกสญฺญี ปริภุญฺชติ
อาปตฺติ ปาจิตฺติยสฺส ฯ อธิฏฺเฐติ วา วิสฺสชฺเชติ วา อาปตฺติ
ทุกฺกฏสฺส ฯ ปจฺจุทฺธารเก อปจฺจุทฺธารกสญฺญี อาปตฺติ
@เชิงอรรถ: ๑ ม. อวิสฺสสนฺโต ฯ
ทุกฺกฏสฺส ฯ ปจฺจุทฺธารเก เวมติโก อาปตฺติ ทุกฺกฏสฺส ฯ
ปจฺจุทฺธารเก ปจฺจุทฺธารกสญฺญี อนาปตฺติ ฯ
[๖๒๖] อนาปตฺติ โส วา เทติ ตสฺส วา วิสฺสาเสนฺโต ๑-
ปริภุญฺชติ อุมฺมตฺตกสฺส อาทิกมฺมิกสฺสาติ ฯ
นวมสิกฺขาปทํ นิฏฺฐิตํ ฯ
-------
@เชิงอรรถ: ๑ ม. วิสฺสสนฺโต ฯ
ทสมสิกฺขาปทํ
[๖๒๗] เตน สมเยน พุทฺโธ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน สตฺตรสวคฺคิยา
ภิกฺขู อสนฺนิหิตปริกฺขารา โหนฺติ ฯ ฉพฺพคฺคิยา ภิกฺขู สตฺตรสวคฺคิยานํ
ภิกฺขูนํ ปตฺตํปิ จีวรํปิ อปนิเธนฺติ ฯ สตฺตรสวคฺคิยา ภิกฺขู ฉพฺพคฺคิเย
ภิกฺขู เอตทโวจุํ เทถาวุโส อมฺหากํ ปตฺตํปิ จีวรํปีติ ฯ ฉพฺพคฺคิยา
ภิกฺขู หสนฺติ ฯ เต โรทนฺติ ฯ ภิกฺขู เอวมาหํสุ กิสฺส ตุเมฺห อาวุโส
โรทถาติ ฯ อิเม อาวุโส ฉพฺพคฺคิยา ภิกฺขู อมฺหากํ ปตฺตํปิ จีวรํปิ
อปนิเธนฺตีติ ฯ
{๖๒๗.๑} เย เต ภิกฺขู อปฺปิจฺฉา ฯเปฯ เต อุชฺฌายนฺติ ขียนฺติ
วิปาเจนฺติ กถํ หิ นาม ฉพฺพคฺคิยา ภิกฺขู ภิกฺขูนํ ปตฺตํปิ จีวรํปิ
อปนิเธสฺสนฺตีติ ฯเปฯ สจฺจํ กิร ตุเมฺห ภิกฺขเว ภิกฺขูนํ ปตฺตํปิ
จีวรํปิ อปนิเธถาติ ฯ สจฺจํ ภควาติ ฯ วิครหิ พุทฺโธ ภควา กถํ
หิ นาม ตุเมฺห โมฆปุริสา ภิกฺขูนํ ปตฺตํปิ จีวรํปิ อปนิเธสฺสถ เนตํ
โมฆปุริสา อปฺปสนฺนานํ วา ปสาทาย ปสนฺนานํ วา ภิยฺโยภาวาย
ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
{๖๒๗.๒} โย ปน ภิกฺขุ ภิกฺขุสฺส ปตฺตํ วา จีวรํ วา นิสีทนํ วา
สูจิฆรํ วา กายพนฺธนํ วา อปนิเธยฺย วา อปนิธาเปยฺย วา อนฺตมโส
หสฺสาเปกฺโขปิ ๑- ปาจิตฺติยนฺติ ฯ
@เชิงอรรถ: ๑ ม. หสาเปกฺโขปิ ฯ ยุ. หาสาเปกฺโขปิ ฯ เอวมุปริปิ ฯ
เนื้อความพระไตรปิฎกฉบับภาษาบาลีอักษรไทย เล่มที่ ๒ หน้าที่ ๔๐๔-๔๐๙.
https://84000.org/tipitaka/read/pali_item.php?book=2&item=619&items=9
อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=2&item=619&items=9&mode=bracket
อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=2&item=619&items=9
อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=2&item=619&items=9
ศึกษาอรรถกถานี้ได้ที่ :-
https://84000.org/tipitaka/attha/attha.php?b=2&i=619
สารบัญพระไตรปิฎกเล่มที่ ๒
https://84000.org/tipitaka/read/?index_2
https://84000.org/tipitaka/english/?index_2
บันทึก ๒ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ [email protected]
