ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับภาษาไทย   บาลีอักษรไทย   บาลีอักษรโรมัน 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒ ภาษาบาลี อักษรไทย พระวินัยปิฎกเล่มที่ ๒ วินย. มหาวิภงฺโค (๒)
                              อฏฺฐมสิกฺขาปทํ
     [๓๐๔]   เตน  สมเยน  พุทฺโธ  ภควา  เวสาลิยํ  วิหรติ มหาวเน
กูฏาคารสาลายํ   ฯ   เตน   โข   ปน   สมเยน  สมฺพหุลา  สนฺทิฏฺฐา
สมฺภตฺตา    ภิกฺขู   วคฺคุมุทาย   นทิยา   ตีเร   วสฺสํ   อุปคจฺฉึสุ   ฯ
เตน   โข   ปน  สมเยน  วชฺชี  ทุพฺภิกฺขา  โหติ  ทฺวีหิติกา  เสตฏฺฐิกา
สลากาวุตฺตา   น   สุกรา   อุญฺเฉน   ปคฺคเหน   ยาเปตุํ   ฯ  อถโข
เตสํ   ภิกฺขูนํ   เอตทโหสิ   เอตรหิ   โข   วชฺชี  ทุพฺภิกฺขา  ทฺวีหิติกา
เสตฏฺฐิกา   สลากาวุตฺตา   น   สุกรา   อุญฺเฉน   ปคฺคเหน   ยาเปตุํ
เกน   นุ   โข   มยํ   อุปาเยน   สมคฺคา  สมฺโมทมานา  อวิวทมานา
ผาสุกํ วสฺสํ วเสยฺยาม น จ ปิณฺฑเกน กิลมิสฺสามาติ ๑- ฯ
     {๓๐๔.๑}   เอกจฺเจ  เอวมาหํสุ  หนฺท  มยํ  อาวุโส คิหีนํ กมฺมนฺตํ
อธิฏฺเฐม   เอวนฺเต   อมฺหากํ   ทาตุํ   มญฺญิสฺสนฺติ  เอวํ  มยํ  สมคฺคา
สมฺโมทมานา   อวิวทมานา   ผาสุกํ   วสฺสํ   วเสยฺยาม   ๒-   น  จ
ปิณฺฑเกน   กิลมิสฺสามาติ   ฯ   เอกจฺเจ   เอวมาหํสุ  อลํ  อาวุโส  กึ
คิหีนํ    กมฺมนฺตํ   อธิฏฺฐิเตน   หนฺท   มยํ   อาวุโส   คิหีนํ   ทูเตยฺยํ
หราม   เอวนฺเต   อมฺหากํ   ทาตุํ   มญฺญิสฺสนฺติ   เอวํ   มยํ  สมคฺคา
สมฺโมทมานา    อวิวทมานา    ผาสุกํ    วสฺสํ    วเสยฺยาม   น   จ
ปิณฺฑเกน กิลมิสฺสามาติ ฯ
     {๓๐๔.๒}   เอกจฺเจ   เอวมาหํสุ   อลํ   อาวุโส   กึ   คิหีนํ
กมฺมนฺตํ    อธิฏฺฐิเตน    กึ    คิหีนํ    ทูเตยฺยํ   หเฏน   หนฺท   มยํ
อาวุโส      คิหีนํ      อญฺญมญฺญสฺส      อุตฺตริมนุสฺสธมฺมสฺส     วณฺณํ
@เชิงอรรถ:  ม. กิลเมยฺยามาติ ฯ   ม. วสิสฺสาม ฯ เอวมุปริปิ ฯ
ภาสิสฺสาม  อสุโก  ภิกฺขุ  ปฐมสฺส  ฌานสฺส  ลาภี  อสุโก  ภิกฺขุ  ทุติยสฺส
ฌานสฺส   ลาภี   อสุโก   ภิกฺขุ   ตติยสฺส  ฌานสฺส  ลาภี  อสุโก  ภิกฺขุ
จตุตฺถสฺส   ฌานสฺส   ลาภี   อสุโก   ภิกฺขุ   โสตาปนฺโน  อสุโก  ภิกฺขุ
สกทาคามี   อสุโก  ภิกฺขุ  อนาคามี  อสุโก  ภิกฺขุ  อรหา  อสุโก  ภิกฺขุ
เตวิชฺโช    อสุโก    ภิกฺขุ    ฉฬภิญฺโญติ   เอวนฺเต   อมฺหากํ   ทาตุํ
มญฺญิสฺสนฺติ   เอวํ   มยํ   สมคฺคา   สมฺโมทมานา   อวิวทมานา  ผาสุกํ
วสฺสํ  วเสยฺยาม  น  จ  ปิณฺฑเกน  กิลมิสฺสามาติ  เอโสเยว โข อาวุโส
เสยฺโย    โย    อมฺหากํ    คิหีนํ    อญฺญมญฺญสฺส   อุตฺตริมนุสฺสธมฺมสฺส
วณฺโณ ภาสิโตติ ฯ
     {๓๐๔.๓}   อถโข   เต  ภิกฺขู  คิหีนํ  อญฺญมญฺญสฺส  อุตฺตริมนุสฺส-
ธมฺมสฺส   วณฺณํ   ภาสึสุ  อสุโก  ภิกฺขุ  ปฐมสฺส  ฌานสฺส  ลาภี  ฯเปฯ
อสุโก  ภิกฺขุ  ฉฬภิญฺโญติ  ฯ  อถโข  เต  มนุสฺสา  ลาภา วต โน สุลทฺธํ
วต  โน  เยสํ  โน  เอวรูปา  ภิกฺขู วสฺสํ อุปคตา น วต โน อิโต ปุพฺเพ
เอวรูปา   ภิกฺขู   วสฺสํ   อุปคตา   ยถายิเม   ๑-   ภิกฺขู   สีลวนฺโต
กลฺยาณธมฺมาติ   ฯ   เต   น   ตาทิสานิ   โภชนานิ  อตฺตนา  ภุญฺชนฺติ
มาตาปิตูนํ     เทนฺติ     ปุตฺตทารสฺส    เทนฺติ    ทาสกมฺมกรโปริสสฺส
เทนฺติ    มิตฺตามจฺจานํ    เทนฺติ   ญาติสาโลหิตานํ   เทนฺติ   ยาทิสานิ
ภิกฺขูนํ    เทนฺติ    น    ตาทิสานิ   ขาทนียานิ   สายนียานิ   ปานานิ
อตฺตนา     ปิวนฺติ     มาตาปิตูนํ     เทนฺติ    ปุตฺตทารสฺส    เทนฺติ
ทาสกมฺมกรโปริสสฺส    เทนฺติ   มิตฺตามจฺจานํ   เทนฺติ   ญาติสาโลหิตานํ
@เชิงอรรถ:  ม. ยถยิเม ฯ
เทนฺติ  ยาทิสานิ  ภิกฺขูนํ  เทนฺติ  ฯ  อถโข  เต  ภิกฺขู  วณฺณวนฺโต  ๑-
อเหสุํ ปีนินฺทฺริยา ปสนฺนมุขวณฺณา วิปฺปสนฺนจฺฉวิวณฺณา ฯ
     [๓๐๕]   อาจิณฺณํ   โข   ปเนตํ  วสฺสํ  วุตฺถานํ  ภิกฺขูนํ  ภควนฺตํ
ทสฺสนาย  อุปสงฺกมิตุํ  ฯ  อถโข  เต  ภิกฺขู  วสฺสํ  วุตฺถา เตมาสจฺจเยน
เสนาสนํ  สํสาเมตฺวา  ปตฺตจีวรมาทาย  เยน  เวสาลี  เตนุปสงฺกมึสุ ๒-
อนุปุพฺเพน   เยน   เวสาลี   มหาวนํ   กูฏาคารสาลา   เยน   ภควา
เตนุปงฺกมึสุ     อุปสงฺกมิตฺวา     ภควนฺตํ    อภิวาเทตฺวา    เอกมนฺตํ
นิสีทึสุ   ฯ  เตน  โข  ปน  สมเยน  ทิสาสุ  วสฺสํ  วุตฺถา  ภิกฺขู  กิสา
โหนฺติ    ลูขา   ทุพฺพณฺณา   อุปฺปณฺฑุปฺปณฺฑุกชาตา   ธมนิสนฺถตคตฺตา   ฯ
วคฺคุมุทาตีริยา     ปน     ภิกฺขู    วณฺณวนฺโต    โหนฺติ    ปีนินฺทฺริยา
ปสนฺนมุขวณฺณา    วิปฺปสนฺนจฺฉวิวณฺณา    ฯ    อาจิณฺณํ    โข    ปเนตํ
พุทฺธานํ    ภควนฺตานํ   อาคนฺตุเกหิ   ภิกฺขูหิ   สทฺธึ   ปฏิสมฺโมทิตุํ   ฯ
อถโข   ภควา  วคฺคุมุทาตีริเย  ภิกฺขู  เอตทโวจ  กจฺจิ  ภิกฺขเว  ขมนียํ
กจฺจิ   ยาปนียํ   กจฺจิ   สมคฺคา   สมฺโมทมานา   อวิวทมานา   ผาสุกํ
วสฺสํ   วสิตฺถ  น  จ  ปิณฺฑเกน  กิลมิตฺถาติ  ฯ  ขมนียํ  ภควา  ยาปนียํ
ภควา   สมคฺคา   จ   มยํ   ภนฺเต  สมฺโมทมานา  อวิวทมานา  ผาสุกํ
วสฺสํ   วสิมฺหา   น  จ  ปิณฺฑเกน  กิลมิมฺหาติ  ฯ  ชานนฺตาปิ  ตถาคตา
ปุจฺฉนฺติ  ชานนฺตาปิ  น  ปุจฺฉนฺติ  กาลํ  วิทิตฺวา  ปุจฺฉนฺติ  กาลํ  วิทิตฺวา
น    ปุจฺฉนฺติ    อตฺถสญฺหิตํ    ตถาคตา   ปุจฺฉนฺติ   โน   อนตฺถสญฺหิตํ
อนตฺถสญฺหิเต      เสตุฆาโต      ตถาคตานํ     ฯ     ทฺวีหากาเรหิ
@เชิงอรรถ:  ม. วณฺณวา ฯ เอวมุปริปิ ฯ   ม. เตน ปกฺกมึสุ ฯ
พุทฺธา   ภควนฺโต   ภิกฺขู  ปฏิปุจฺฉนฺติ  ธมฺมํ  วา  เทเสสฺสาม  สาวกานํ
วา สิกฺขาปทํ ปญฺญาเปสฺสามาติ ฯ
     {๓๐๕.๑}   อถโข  ภควา  วคฺคุ มุทาตีริเย ภิกฺขู เอตทโวจ ยถากถํ
ปน   ตุเมฺห  ภิกฺขเว  สมคฺคา  สมฺโมทมานา  อวิวทมานา  ผาสุกํ  วสฺสํ
วสิตฺถ  น  จ  ปิณฺฑเกน  กิลมิตฺถาติ  ฯ อถโข เต ภิกฺขู ภควโต เอตมตฺถํ
อาโรเจสุํ  ฯ  กจฺจิ ปน โว ภิกฺขเว ภูตนฺติ ฯ ภูตํ ภควาติ ฯ วิครหิ พุทฺโธ
ภควา  กถํ  หิ  นาม  ตุเมฺห  ภิกฺขเว  อุทรสฺส การณา คิหีนํ อญฺญมญฺญสฺส
อุตฺตริมนุสฺสธมฺมสฺส   วณฺณํ   ภาสิสฺสถ   เนตํ  ภิกฺขเว  อปฺปสนฺนานํ  วา
ปสาทาย ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๓๐๕.๒}   โย   ปน   ภิกฺขุ   อนุปสมฺปนฺนสฺส   อุตฺตริมนุสฺสธมฺมํ
อาโรเจยฺย ภูตสฺมึ ปาจิตฺติยนฺติ ฯ
     [๓๐๖]   โย  ปนาติ  ยาทิโส ฯเปฯ ภิกฺขูติ ฯเปฯ อยํ อิมสฺมึ อตฺเถ
อธิปฺเปโต    ภิกฺขูติ    ฯ   อนุปสมฺปนฺโน   นาม   ภิกฺขุญฺจ   ภิกฺขุนิญฺจ
ฐเปตฺวา อวเสโส อนุปสมฺปนฺโน นาม ฯ
     [๓๐๗]   อุตฺตริมนุสฺสธมฺโม  นาม  ฌานํ  วิโมกฺโข  สมาธิ สมาปตฺติ
ญาณทสฺสนํ    มคฺคภาวนา    ผลสจฺฉิกิริยา    กิเลสปฺปหานํ   วินีวรณตา
จิตฺตสฺส สุญฺญาคาเร อภิรติ ฯ
     [๓๐๘]   ฌานนฺติ   ปฐมํ  ฌานํ  ทุติยํ  ฌานํ  ตติยํ  ฌานํ  จตุตฺถํ
ฌานํ  ฯ  วิโมกฺโขติ  สุญฺญโต  วิโมกฺโข  อนิมิตฺโต  วิโมกฺโข  อปฺปณิหิโต
วิโมกฺโข    ฯ    สมาธีติ    สุญฺญโต    สมาธิ    อนิมิตฺโต    สมาธิ
อปฺปณิหิโต    สมาธิ   ฯ   สมาปตฺตีติ   สุญฺญตา   สมาปตฺติ   อนิมิตฺตา
สมาปตฺติ   อปฺปณิหิตา   สมาปตฺติ   ฯ  ญาณนฺติ  ๑-  ติสฺโส  วิชฺชา  ฯ
มคฺคภาวนาติ     จตฺตาโร    สติปฏฺฐานา    จตฺตาโร    สมฺมปฺปธานา
จตฺตาโร   อิทฺธิปาทา   ปญฺจินฺทฺริยานิ   ปญฺจ   พลานิ  สตฺต  โพชฺฌงฺคา
อริโย    อฏฺฐงฺคิโก    มคฺโค    ฯ   ผลสจฺฉิกิริยาติ   โสตาปตฺติผลสฺส
สจฺฉิกิริยา    สกทาคามิผลสฺส   สจฺฉิกิริยา   อนาคามิผลสฺส   สจฺฉิกิริยา
อรหตฺตผลสฺส    สจฺฉิกิริยา    ฯ    กิเลสปฺปหานนฺติ   ราคสฺส   ปหานํ
โทสสฺส   ปหานํ   โมหสฺส   ปหานํ   ฯ  วินีวรณตา  จิตฺตสฺสาติ  ราคา
จิตฺตสฺส   ๒-   วินีวรณตา   โทสา   จิตฺตสฺส   ๓-  วินีวรณตา  โมหา
จิตฺตสฺส   ๔-   วินีวรณตา   ฯ  สุญฺญาคาเร  อภิรตีติ  ปฐเมน  ฌาเนน
สุญฺญาคาเร   อภิรติ   ทุติเยน   ฌาเนน   สุญฺญาคาเร  อภิรติ  ตติเยน
ฌาเนน สุญฺญาคาเร อภิรติ จตุตฺเถน ฌาเนน สุญฺญาคาเร อภิรติ ฯ
     [๓๐๙]   อาโรเจยฺยาติ  อนุปสมฺปนฺนสฺส  ปฐมํ  ฌานํ  สมาปชฺชินฺติ
ภณนฺตสฺส   อาปตฺติ   ปาจิตฺติยสฺส   ฯ   อาโรเจยฺยาติ   อนุปสมฺปนฺนสฺส
ปฐมํ    ฌานํ    สมาปชฺชามีติ   ภณนฺตสฺส   อาปตฺติ   ปาจิตฺติยสฺส   ฯ
อาโรเจยฺยาติ   อนุปสมฺปนฺนสฺส   ปฐมํ   ฌานํ   สมาปนฺโนติ   ภณนฺตสฺส
อาปตฺติ    ปาจิตฺติยสฺส   ฯ   อาโรเจยฺยาติ   อนุปสมฺปนฺนสฺส   ปฐมสฺส
ฌานสฺส     ลาภิมฺหีติ     ภณนฺตสฺส     อาปตฺติ     ปาจิตฺติยสฺส    ฯ
อาโรเจยฺยาติ     อนุปสมฺปนฺนสฺส     ปฐมสฺส     ฌานสฺส     วสิมฺหีติ
ภณนฺตสฺส   อาปตฺติ   ปาจิตฺติยสฺส   ฯ   อาโรเจยฺยาติ   อนุปสมฺปนฺนสฺส
@เชิงอรรถ:  ม. ญาณทสฺสนนฺติ ฯ  ๒-๓-๔ ม. จิตฺตํ ฯ
ปฐมํ ฌานํ สจฺฉิกตํ มยาติ ภณนฺตสฺส อาปตฺติ ปาจิตฺติยสฺส ฯ
     [๓๑๐]   อาโรเจยฺยาติ  อนุปสมฺปนฺนสฺส  ทุติยํ  ฌานํ  ตติยํ  ฌานํ
จตุตฺถํ   ฌานํ   สมาปชฺชึ   สมาปชฺชามิ   สมาปนฺโน  จตุตฺถสฺส  ฌานสฺส
ลาภิมฺหิ   วสิมฺหิ   จตุตฺถํ   ฌานํ   สจฺฉิกตํ   มยาติ  ภณนฺตสฺส  อาปตฺติ
ปาจิตฺติยสฺส ฯ
     [๓๑๑]   อาโรเจยฺยาติ  อนุปสมฺปนฺนสฺส  สุญฺญตํ  วิโมกฺขํ  อนิมิตฺตํ
วิโมกฺขํ   อปฺปณิหิตํ   วิโมกฺขํ  สุญฺญตํ  สมาธึ  อนิมิตฺตํ  สมาธึ  อปฺปณิหิตํ
สมาธึ    สมาปชฺชึ   สมาปชฺชามิ   สมาปนฺโน   อปฺปณิหิตสฺส   สมาธิสฺส
ลาภิมฺหิ    วสิมฺหิ   อปฺปณิหิโต   สมาธิ   สจฺฉิกโต   มยาติ   ภณนฺตสฺส
อาปตฺติ ปาจิตฺติยสฺส ฯ
     [๓๑๒]   อาโรเจยฺยาติ    อนุปสมฺปนฺนสฺส    สุญฺญตํ   สมาปตฺตึ
อนิมิตฺตํ    สมาปตฺตึ    อปฺปณิหิตํ    สมาปตฺตึ   สมาปชฺชึ   สมาปชฺชามิ
สมาปนฺโน    อปฺปณิหิตาย   สมาปตฺติยา   ลาภิมฺหิ   วสิมฺหิ   อปฺปณิหิตา
สมาปตฺติ สจฺฉิกตา มยาติ ภณนฺตสฺส อาปตฺติ ปาจิตฺติยสฺส ฯ
     [๓๑๓]   อาโรเจยฺยาติ  อนุปสมฺปนฺนสฺส  ติสฺโส  วิชฺชา  สมาปชฺชึ
สมาปชฺชามิ     สมาปนฺโน    ติสฺสนฺนํ    วิชฺชานํ    ลาภิมฺหิ    วสิมฺหิ
ติสฺโส วิชฺชา สจฺฉิกตา มยาติ ภณนฺตสฺส อาปตฺติ ปาจิตฺติยสฺส ฯ
     [๓๑๔]   อาโรเจยฺยาติ   อนุปสมฺปนฺนสฺส   จตฺตาโร  สติปฏฺฐาเน
จตฺตาโร   สมฺมปฺปธาเน   จตฺตาโร   อิทฺธิปาเท  สมาปชฺชึ  สมาปชฺชามิ
สมาปนฺโน     จตุนฺนํ    อิทฺธิปาทานํ    ลาภิมฺหิ    วสิมฺหิ    จตฺตาโร
อิทฺธิปาทา สจฺฉิกตา มยาติ ภณนฺตสฺส อาปตฺติ ปาจิตฺติยสฺส ฯ
     [๓๑๕]   อาโรเจยฺยาติ   อนุปสมฺปนฺนสฺส   ปญฺจินฺทฺริยานิ   ปญฺจ
พลานิ   สมาปชฺชึ   สมาปชฺชามิ   สมาปนฺโน   ปญฺจนฺนํ  พลานํ  ลาภิมฺหิ
วสิมฺหิ    ปญฺจ    พลานิ    สจฺฉิกตานิ    มยาติ   ภณนฺตสฺส   อาปตฺติ
ปาจิตฺติยสฺส ฯ
     [๓๑๖]   อาโรเจยฺยาติ    อนุปสมฺปนฺนสฺส    สตฺต   โพชฺฌงฺเค
สมาปชฺชึ    สมาปชฺชามิ   สมาปนฺโน   สตฺตนฺนํ   โพชฺฌงฺคานํ   ลาภิมฺหิ
วสิมฺหิ    สตฺต    โพชฺฌงฺคา   สจฺฉิกตา   มยาติ   ภณนฺตสฺส   อาปตฺติ
ปาจิตฺติยสฺส ฯ
     [๓๑๗]   อาโรเจยฺยาติ   อนุปสมฺปนฺนสฺส   อริยํ  อฏฺฐงฺคิกํ  มคฺคํ
สมาปชฺชึ    สมาปชฺชามิ   สมาปนฺโน   อริยสฺส   อฏฺฐงฺคิกสฺส   มคฺคสฺส
ลาภิมฺหิ    วสิมฺหิ    อริโย    อฏฺฐงฺคิโก   มคฺโค   สจฺฉิกโต   มยาติ
ภณนฺตสฺส อาปตฺติ ปาจิตฺติยสฺส ฯ
     [๓๑๘]   อาโรเจยฺยาติ     อนุปสมฺปนฺนสฺส     โสตาปตฺติผลํ
สกทาคามิผลํ   อนาคามิผลํ   อรหตฺตผลํ   ๑-   สมาปชฺชึ   สมาปชฺชามิ
สมาปนฺโน    อรหตฺตผลสฺส    ลาภิมฺหิ    วสิมฺหิ   อรหตฺตผลํ   สจฺฉิกตํ
มยาติ ภณนฺตสฺส อาปตฺติ ปาจิตฺติยสฺส ฯ
     [๓๑๙]   อาโรเจยฺยาติ  อนุปสมฺปนฺนสฺส  ราโค  เม  จตฺโต โทโส
เม   จตฺโต   โมโห   เม  จตฺโต  วนฺโต  มุตฺโต  ปหีโน  ปฏินิสฺสฏฺโฐ
@เชิงอรรถ:  ม. ยุ. อรหตฺตํ ฯ เอวมีทิเสสุ ปเทสุ ฯ
อุกฺเขฏิโต สมุกฺเขฏิโตติ ภณนฺตสฺส อาปตฺติ ปาจิตฺติยสฺส ฯ
     [๓๒๐]   อาโรเจยฺยาติ  อนุปสมฺปนฺนสฺส  ราคา  เม  จิตฺตํ วินีวรณํ
โทสา   เม   จิตฺตํ   วินีวรณํ  โมหา  เม  จิตฺตํ  วินีวรณนฺติ  ภณนฺตสฺส
อาปตฺติ ปาจิตฺติยสฺส ฯ
     [๓๒๑]   อาโรเจยฺยาติ    อนุปสมฺปนฺนสฺส   สุญฺญาคาเร   ปฐมํ
ฌานํ   ทุติยํ   ฌานํ   ตติยํ  ฌานํ  จตุตฺถํ  ฌานํ  สมาปชฺชึ  สมาปชฺชามิ
สมาปนฺโน    สุญฺญาคาเร    จตุตฺถสฺส    ฌานสฺส    ลาภิมฺหิ    วสิมฺหิ
สุญฺญาคาเร    จตุตฺถํ    ฌานํ   สจฺฉิกตํ   มยาติ   ภณนฺตสฺส   อาปตฺติ
ปาจิตฺติยสฺส ฯ
     [๓๒๒]   อาโรเจยฺยาติ   อนุปสมฺปนฺนสฺส  ปฐมญฺจ  ฌานํ  ทุติยญฺจ
ฌานํ   สมาปชฺชึ  สมาปชฺชามิ  สมาปนฺโน  ปฐมสฺส  จ  ฌานสฺส  ทุติยสฺส
จ   ฌานสฺส   ลาภิมฺหิ   วสิมฺหิ  ปฐมญฺจ  ฌานํ  ทุติยญฺจ  ฌานํ  สจฺฉิกตํ
มยาติ  ภณนฺตสฺส  อาปตฺติ  ปาจิตฺติยสฺส  ฯ  อาโรเจยฺยาติ อนุปสมฺปนฺนสฺส
ปฐมญฺจ   ฌานํ   ตติยญฺจ  ฌานํ  ฯเปฯ  ปฐมญฺจ  ฌานํ  จตุตฺถญฺจ  ฌานํ
สมาปชฺชึ   สมาปชฺชามิ   สมาปนฺโน  ปฐมสฺส  จ  ฌานสฺส  จตุตฺถสฺส  จ
ฌานสฺส   ลาภิมฺหิ   วสิมฺหิ   ปฐมญฺจ   ฌานํ   จตุตฺถญฺจ  ฌานํ  สจฺฉิกตํ
มยาติ ภณนฺตสฺส อาปตฺติ ปาจิตฺติยสฺส ฯ
     [๓๒๓]   อาโรเจยฺยาติ    อนุปสมฺปนฺนสฺส    ปฐมญฺจ    ฌานํ
สุญฺญตญฺจ    วิโมกฺขํ    อนิมิตฺตญฺจ    วิโมกฺขํ    อปฺปณิหิตญฺจ   วิโมกฺขํ
สุญฺญตญฺจ     สมาธึ     อนิมิตฺตญฺจ    สมาธึ    อปฺปณิหิตญฺจ    สมาธึ
สมาปชฺชึ     สมาปชฺชามิ     สมาปนฺโน     ปฐมสฺส    จ    ฌานสฺส
อปฺปณิหิตสฺส    จ    สมาธิสฺส    ลาภิมฺหิ    วสิมฺหิ    ปฐมญฺจ   ฌานํ
อปฺปณิหิโต    จ    สมาธิ    สจฺฉิกโต    มยาติ   ภณนฺตสฺส   อาปตฺติ
ปาจิตฺติยสฺส ฯ
     [๓๒๔]   อาโรเจยฺยาติ    อนุปสมฺปนฺนสฺส    ปฐมญฺจ    ฌานํ
สุญฺญตญฺจ      สมาปตฺตึ      อนิมิตฺตญฺจ     สมาปตฺตึ     อปฺปณิหิตญฺจ
สมาปตฺตึ     สมาปชฺชึ     สมาปชฺชามิ    สมาปนฺโน    ปฐมสฺส    จ
ฌานสฺส    อปฺปณิหิตาย   จ   สมาปตฺติยา   ลาภิมฺหิ   วสิมฺหิ   ปฐมญฺจ
ฌานํ    อปฺปณิหิตา    จ    สมาปตฺติ    สจฺฉิกตา   มยาติ   ภณนฺตสฺส
อาปตฺติ ปาจิตฺติยสฺส ฯ
     [๓๒๕]   อาโรเจยฺยาติ   อนุปสมฺปนฺนสฺส   ปฐมญฺจ  ฌานํ  ติสฺโส
จ   วิชฺชา   สมาปชฺชึ   สมาปชฺชามิ   สมาปนฺโน  ปฐมสฺส  จ  ฌานสฺส
ติสฺสนฺนญฺจ    วิชฺชานํ    ลาภิมฺหิ    วสิมฺหิ    ปฐมญฺจ   ฌานํ   ติสฺโส
จ วิชฺชา สจฺฉิกตา มยาติ ภณนฺตสฺส อาปตฺติ ปาจิตฺติยสฺส ฯ
     [๓๒๖]   อาโรเจยฺยาติ  อนุปสมฺปนฺนสฺส  ปฐมญฺจ  ฌานํ  จตฺตาโร
จ   สติปฏฺฐาเน   จตฺตาโร  จ  สมฺมปฺปธาเน  จตฺตาโร  จ  อิทฺธิปาเท
สมาปชฺชึ   สมาปชฺชามิ   สมาปนฺโน   ปฐมสฺส   จ   ฌานสฺส  จตุนฺนญฺจ
อิทฺธิปาทานํ   ลาภิมฺหิ   วสิมฺหิ  ปฐมญฺจ  ฌานํ  จตฺตาโร  จ  อิทฺธิปาทา
สจฺฉิกตา มยาติ ภณนฺตสฺส อาปตฺติ ปาจิตฺติยสฺส ฯ
     [๓๒๗]   อาโรเจยฺยาติ   อนุปสมฺปนฺนสฺส   ปฐมญฺจ   ฌานํ  ปญฺจ
จ   อินฺทฺริยานิ   ปญฺจ   จ   พลานิ  สมาปชฺชึ  สมาปชฺชามิ  สมาปนฺโน
ปฐมสฺส   จ   ฌานสฺส   ปญฺจนฺนญฺจ   พลานํ   ลาภิมฺหิ  วสิมฺหิ  ปฐมญฺจ
ฌานํ    ปญฺจ   จ   พลานิ   สจฺฉิกตานิ   มยาติ   ภณนฺตสฺส   อาปตฺติ
ปาจิตฺติยสฺส ฯ
     [๓๒๘]   อาโรเจยฺยาติ  อนุปสมฺปนฺนสฺส  ปฐมญฺจ  ฌานํ  สตฺต  จ
โพชฺฌงฺเค   สมาปชฺชึ   สมาปชฺชามิ   สมาปนฺโน   ปฐมสฺส  จ  ฌานสฺส
สตฺตนฺนญฺจ   โพชฺฌงฺคานํ   ลาภิมฺหิ   วสิมฺหิ   ปฐมญฺจ   ฌานํ  สตฺต  จ
โพชฺฌงฺคา สจฺฉิกตา มยาติ ภณนฺตสฺส อาปตฺติ ปาจิตฺติยสฺส ฯ
     [๓๒๙]   อาโรเจยฺยาติ   อนุปสมฺปนฺนสฺส  ปฐมญฺจ  ฌานํ  อริยญฺจ
อฏฺฐงฺคิกํ  มคฺคํ  สมาปชฺชึ  สมาปชฺชามิ  สมาปนฺโน  ปฐมสฺส  จ  ฌานสฺส
อริยสฺส  จ  อฏฺฐงฺคิกสฺส  มคฺคสฺส  ลาภิมฺหิ  วสิมฺหิ  ปฐมญฺจ  ฌานํ อริโย
จ อฏฺฐงฺคิโก มคฺโค สจฺฉิกโต มยาติ ภณนฺตสฺส อาปตฺติ ปาจิตฺติยสฺส ฯ
     [๓๓๐]   อาโรเจยฺยาติ  อนุปสมฺปนฺนสฺส  ปฐมญฺจ  ฌานํ โสตาปตฺติ-
ผลญฺจ    สกทาคามิผลญฺจ    อนาคามิผลญฺจ   อรหตฺตผลญฺจ   สมาปชฺชึ
สมาปชฺชามิ  สมาปนฺโน  ปฐมสฺส  จ  ฌานสฺส  อรหตฺตผลสฺส  จ  ลาภิมฺหิ
วสิมฺหิ  ปฐมญฺจ  ฌานํ  อรหตฺตผลญฺจ  สจฺฉิกตํ  มยาติ  ภณนฺตสฺส  อาปตฺติ
ปาจิตฺติยสฺส ฯ
     [๓๓๑]   อาโรเจยฺยาติ  อนุปสมฺปนฺนสฺส  ปฐมญฺจ  ฌานํ  สมาปชฺชึ
สมาปชฺชามิ  สมาปนฺโน  ราโค จ เม จตฺโต โทโส จ เม จตฺโต โมโห จ
เม  จตฺโต  วนฺโต  มุตฺโต  ปหีโน  ปฏินิสฺสฏฺโฐ  อุกฺเขฏิโต สมุกฺเขฏิโตติ
ภณนฺตสฺส อาปตฺติ ปาจิตฺติยสฺส ฯ
     [๓๓๒]   อาโรเจยฺยาติ  อนุปสมฺปนฺนสฺส  ปฐมญฺจ  ฌานํ  สมาปชฺชึ
สมาปชฺชามิ  สมาปนฺโน  ราคา  จ  เม  จิตฺตํ วินีวรณํ โทสา จ เม จิตฺตํ
วินีวรณํ โมหา จ เม จิตฺตํ วินีวรณนฺติ ภณนฺตสฺส อาปตฺติ ปาจิตฺติยสฺส ฯ
     [๓๓๓]   อาโรเจยฺยาติ   อนุปสมฺปนฺนสฺส  ทุติยญฺจ  ฌานํ  ตติยญฺจ
ฌานํ   ฯเปฯ   ทุติยญฺจ   ฌานํ  จตุตฺถญฺจ  ฌานํ  สมาปชฺชึ  สมาปชฺชามิ
สมาปนฺโน  ทุติยสฺส  จ  ฌานสฺส  จตุตฺถสฺส  จ  ฌานสฺส  ลาภิมฺหิ  วสิมฺหิ
ทุติยญฺจ   ฌานํ   จตุตฺถญฺจ   ฌานํ   สจฺฉิกตํ  มยาติ  ภณนฺตสฺส  อาปตฺติ
ปาจิตฺติยสฺส   ฯ   อาโรเจยฺยาติ  อนุปสมฺปนฺนสฺส  ทุติยญฺจ  ฌานํ  ฯเปฯ
โมหา   จ   เม  จิตฺตํ  วินีวรณนฺติ  ภณนฺตสฺส  อาปตฺติ  ปาจิตฺติยสฺส  ฯ
อาโรเจยฺยาติ    อนุปสมฺปนฺนสฺส    ทุติยญฺจ    ฌานํ    ปฐมญฺจ   ฌานํ
สมาปชฺชึ   สมาปชฺชามิ   สมาปนฺโน   ทุติยสฺส  จ  ฌานสฺส  ปฐมสฺส  จ
ฌานสฺส   ลาภิมฺหิ   วสิมฺหิ   ทุติยญฺจ   ฌานํ   ปฐมญฺจ   ฌานํ  สจฺฉิกตํ
มยาติ    ภณนฺตสฺส    อาปตฺติ    ปาจิตฺติยสฺส   ฯเปฯ   อาโรเจยฺยาติ
อนุปสมฺปนฺนสฺส     โมหา    จ    เม    จิตฺตํ    วินีวรณํ    ปฐมญฺจ
ฌานํ  สมาปชฺชึ  สมาปชฺชามิ  สมาปนฺโน  โมหา  จ  เม  จิตฺตํ  วินีวรณํ
ปฐมสฺส   จ   ฌานสฺส  ลาภิมฺหิ  วสิมฺหิ  โมหา  จ  เม  จิตฺตํ  วินีวรณํ
ปฐมญฺจ    ฌานํ   สจฺฉิกตํ   มยาติ   ภณนฺตสฺส   อาปตฺติ   ปาจิตฺติยสฺส
ฯเปฯ   อาโรเจยฺยาติ   อนุปสมฺปนฺนสฺส  โมหา  จ  เม  จิตฺตํ  วินีวรณํ
โทสา จ เม จิตฺตํ วินีวรณนฺติ ภณนฺตสฺส อาปตฺติ ปาจิตฺติยสฺส ฯ
     [๓๓๔]   อาโรเจยฺยาติ   อนุปสมฺปนฺนสฺส  ปฐมญฺจ  ฌานํ  ทุติยญฺจ
ฌานํ   ตติยญฺจ   ฌานํ   จตุตฺถญฺจ  ฌานํ  สุญฺญตญฺจ  วิโมกฺขํ  อนิมิตฺตญฺจ
วิโมกฺขํ    อปฺปณิหิตญฺจ    วิโมกฺขํ    สุญฺญตญฺจ    สมาธึ    อนิมิตฺตญฺจ
สมาธึ    อปฺปณิหิตญฺจ    สมาธึ    สุญฺญตญฺจ    สมาปตฺตึ    อนิมิตฺตญฺจ
สมาปตฺตึ   อปฺปณิหิตญฺจ   สมาปตฺตึ   ติสฺโส   จ   วิชฺชา  จตฺตาโร  จ
สติปฏฺฐาเน  จตฺตาโร  จ  สมฺมปฺปธาเน  จตฺตาโร  จ  อิทฺธิปาเท  ปญฺจ
จ  อินฺทฺริยานิ  ปญฺจ  จ  พลานิ  สตฺต  จ  โพชฺฌงฺเค  อริยญฺจ อฏฺฐงฺคิกํ
มคฺคํ       โสตาปตฺติผลญฺจ       สกทาคามิผลญฺจ      อนาคามิผลญฺจ
อรหตฺตผลญฺจ  สมาปชฺชึ  ฯเปฯ  ราโค  จ เม จตฺโต โทโส จ เม จตฺโต
โมโห   จ  เม  จตฺโต  วนฺโต  มุตฺโต  ปหีโน  ปฏินิสฺสฏฺโฐ  อุกฺเขฏิโต
สมุกฺเขฏิโต  ราคา  จ  เม  จิตฺตํ  วินีวรณํ  โทสา  จ เม จิตฺตํ วินีวรณํ
โมหา จ เม จิตฺตํ วินีวรณนฺติ ภณนฺตสฺส อาปตฺติ ปาจิตฺติยสฺส ฯ
     [๓๓๕]   อาโรเจยฺยาติ     อนุปสมฺปนฺนสฺส     ปฐมํ    ฌานํ
สมาปชฺชินฺติ    วตฺตุกาโม    ทุติยํ    ฌานํ    สมาปชฺชินฺติ    ภณนฺตสฺส
ปฏิวิชานนฺตสฺส    อาปตฺติ    ปาจิตฺติยสฺส    นปฺปฏิวิชานนฺตสฺส   อาปตฺติ
ทุกฺกฏสฺส   ฯ   อาโรเจยฺยาติ  อนุปสมฺปนฺนสฺส  ปฐมํ  ฌานํ  สมาปชฺชินฺติ
วตฺตุกาโม  ตติยํ  ฌานํ  จตุตฺถํ  ฌานํ  สุญฺญตํ  วิโมกฺขํ  อนิมิตฺตํ  วิโมกฺขํ
อปฺปณิหิตํ   วิโมกฺขํ   สุญฺญตํ   สมาธึ  อนิมิตฺตํ  สมาธึ  อปฺปณิหิตํ  สมาธึ
สุญฺญตํ   สมาปตฺตึ   อนิมิตฺตํ   สมาปตฺตึ   อปฺปณิหิตํ   สมาปตฺตึ   ติสฺโส
วิชฺชา    จตฺตาโร   สติปฏฺฐาเน   จตฺตาโร   สมฺมปฺปธาเน   จตฺตาโร
อิทฺธิปาเท    ปญฺจินฺทฺริยานิ   ปญฺจ   พลานิ   สตฺต   โพชฺฌงฺเค   อริยํ
อฏฺฐงฺคิกํ     มคฺคํ     โสตาปตฺติผลํ     สกทาคามิผลํ     อนาคามิผลํ
อรหตฺตผลํ  สมาปชฺชึ  ราโค  เม  จตฺโต  โทโส  เม  จตฺโต โมโห เม
จตฺโต   วนฺโต   มุตฺโต    ปหีโน  ปฏินิสฺสฏฺโฐ  อุกฺเขฏิโต  สมุกฺเขฏิโต
ราคา  เม  จิตฺตํ   วินีวรณํ  โทสา  เม  จิตฺตํ  วินีวรณํ โมหา เม จิตฺตํ
วินีวรณนฺติ      ภณนฺตสฺส     ปฏิวิชานนฺตสฺส    อาปตฺติ    ปาจิตฺติยสฺส
นปฺปฏิวิชานนฺตสฺส อาปตฺติ ทุกฺกฏสฺส ฯ
     [๓๓๖]   อาโรเจยฺยาติ     อนุปสมฺปนฺนสฺส     ทุติยํ    ฌานํ
สมาปชฺชินฺติ    วตฺตุกาโม    ฯเปฯ   โมหา   เม   จิตฺตํ   วินีวรณนฺติ
ภณนฺตสฺส    ปฏิวิชานนฺตสฺส    อาปตฺติ   ปาจิตฺติยสฺส   นปฺปฏิวิชานนฺตสฺส
อาปตฺติ      ทุกฺกฏสฺส      ฯ      อาโรเจยฺยาติ     อนุปสมฺปนฺนสฺส
ทุติยํ    ฌานํ    สมาปชฺชินฺติ   วตฺตุกาโม   ปฐมํ   ฌานํ   สมาปชฺชินฺติ
ภณนฺตสฺส    ปฏิวิชานนฺตสฺส    อาปตฺติ   ปาจิตฺติยสฺส   นปฺปฏิวิชานนฺตสฺส
อาปตฺติ   ทุกฺกฏสฺส   ฯเปฯ  อาโรเจยฺยาติ  อนุปสมฺปนฺนสฺส  โมหา  เม
จิตฺตํ   วินีวรณนฺติ   วตฺตุกาโม   ปฐมํ   ฌานํ   สมาปชฺชินฺติ   ภณนฺตสฺส
ปฏิวิชานนฺตสฺส    อาปตฺติ    ปาจิตฺติยสฺส    นปฺปฏิวิชานนฺตสฺส   อาปตฺติ
ทุกฺกฏสฺส   ฯเปฯ   อาโรเจยฺยาติ   อนุปสมฺปนฺนสฺส   โมหา  เม  จิตฺตํ
วินีวรณนฺติ    วตฺตุกาโม   โทสา   เม   จิตฺตํ   วินีวรณนฺติ   ภณนฺตสฺส
ปฏิวิชานนฺตสฺส    อาปตฺติ    ปาจิตฺติยสฺส    นปฺปฏิวิชานนฺตสฺส   อาปตฺติ
ทุกฺกฏสฺส    ฯ    อาโรเจยฺยาติ    อนุปสมฺปนฺนสฺส    ปฐมญฺจ    ฌานํ
ทุติยญฺจ   ฌานํ   ตติยญฺจ   ฌานํ   จตุตฺถญฺจ  ฌานํ  ฯเปฯ  โทสา  เม
จิตฺตํ   วินีวรณนฺติ   วตฺตุกาโม  โมหา  เม  จิตฺตํ  วินีวรณนฺติ  ภณนฺตสฺส
ปฏิวิชานนฺตสฺส    อาปตฺติ    ปาจิตฺติยสฺส    นปฺปฏิวิชานนฺตสฺส   อาปตฺติ
ทุกฺกฏสฺส ฯ
     [๓๓๗]   อาโรเจยฺยาติ   อนุปสมฺปนฺนสฺส  ทุติยญฺจ  ฌานํ  ตติยญฺจ
ฌานํ   จตุตฺถญฺจ   ฌานํ   ฯเปฯ   โมหา   จ   เม  จิตฺตํ  วินีวรณนฺติ
วตฺตุกาโม    ปฐมํ    ฌานํ    สมาปชฺชินฺติ   ภณนฺตสฺส   ปฏิวิชานนฺตสฺส
อาปตฺติ ปาจิตฺติยสฺส นปฺปฏิวิชานนฺตสฺส อาปตฺติ ทุกฺกฏสฺส ฯ
     [๓๓๘]   อาโรเจยฺยาติ  อนุปสมฺปนฺนสฺส  โย  เต  วิหาเร วสิ โส
ภิกฺขุ    ปฐมํ    ฌานํ    สมาปชฺชิ    สมาปชฺชติ    สมาปนฺโน    โส
ภิกฺขุ  ปฐมสฺส  ฌานสฺส  ลาภี  วสี  เตน  ภิกฺขุนา  ปฐมํ ฌานํ สจฺฉิกตนฺติ
ภณนฺตสฺส   อาปตฺติ   ทุกฺกฏสฺส   ฯ  อาโรเจยฺยาติ  อนุปสมฺปนฺนสฺส  โย
เต  วิหาเร  วสิ  โส  ภิกฺขุ  ทุติยํ ฌานํ ตติยํ ฌานํ จตุตฺถํ ฌานํ สมาปชฺชิ
สมาปชฺชติ   สมาปนฺโน  โส  ภิกฺขุ  จตุตฺถสฺส  ฌานสฺส  ลาภี  วสี  เตน
ภิกฺขุนา จตุตฺถํ ฌานํ สจฺฉิกตนฺติ ภณนฺตสฺส อาปตฺติ ทุกฺกฏสฺส ฯ
     {๓๓๘.๑}   อาโรเจยฺยาติ  อนุปสมฺปนฺนสฺส  โย เต วิหาเร วสิ โส
ภิกฺขุ   สุญฺญตํ   วิโมกฺขํ  อนิมิตฺตํ  วิโมกฺขํ  อปฺปณิหิตํ  วิโมกฺขํ  สุญฺญตํ
สมาธึ    อนิมิตฺตํ   สมาธึ   อปฺปณิหิตํ   สมาธึ   สมาปชฺชิ   สมาปชฺชติ
สมาปนฺโน  โส  ภิกฺขุ  อปฺปณิหิตสฺส  สมาธิสฺส  ลาภี  วสี  เตน  ภิกฺขุนา
อปฺปณิหิโต สมาธิ สจฺฉิกโตติ ภณนฺตสฺส อาปตฺติ ทุกฺกฏสฺส ฯ
     {๓๓๘.๒}   อาโรเจยฺยาติ  อนุปสมฺปนฺนสฺส  โย เต วิหาเร วสิ โส
ภิกฺขุ    สุญฺญตํ   สมาปตฺตึ   อนิมิตฺตํ   สมาปตฺตึ   อปฺปณิหิตํ   สมาปตฺตึ
ติสฺโส  วิชฺชา  จตฺตาโร  สติปฏฺฐาเน  จตฺตาโร  สมฺมปฺปธาเน  จตฺตาโร
อิทฺธิปาเท    ปญฺจินฺทฺริยานิ   ปญฺจ   พลานิ   สตฺต   โพชฺฌงฺเค   อริยํ
อฏฺฐงฺคิกํ     มคฺคํ     โสตาปตฺติผลํ     สกทาคามิผลํ     อนาคามิผลํ
อรหตฺตผลํ   สมาปชฺชิ   ฯเปฯ   ตสฺส   ภิกฺขุโน  ราโค  จตฺโต  โทโส
จตฺโต   โมโห   จตฺโต  วนฺโต  มุตฺโต  ปหีโน  ปฏินิสฺสฏฺโฐ  อุกฺเขฏิโต
สมุกฺเขฏิโต   ตสฺส   ภิกฺขุโน   ราคา   จิตฺตํ   วินีวรณํ   โทสา  จิตฺตํ
วินีวรณํ โมหา จิตฺตํ วินีวรณนฺติ ภณนฺตสฺส อาปตฺติ ทุกฺกฏสฺส ฯ
     {๓๓๘.๓}   อาโรเจยฺยาติ  อนุปสมฺปนฺนสฺส  โย  เต  วิหาเร  วสิ
โส   ภิกฺขุ   สุญฺญาคาเร  ปฐมํ  ฌานํ  ทุติยํ  ฌานํ  ตติยํ  ฌานํ  จตุตฺถํ
ฌานํ    สมาปชฺชิ   สมาปชฺชติ   สมาปนฺโน   โส   ภิกฺขุ   สุญฺญาคาเร
จตุตฺถสฺส   ฌานสฺส   ลาภี   วสี   เตน   ภิกฺขุนา  สุญฺญาคาเร  จตุตฺถํ
ฌานํ   สจฺฉิกตนฺติ   ภณนฺตสฺส   อาปตฺติ   ทุกฺกฏสฺส   ฯ  อาโรเจยฺยาติ
อนุปสมฺปนฺนสฺส  โย  เต  วิหารํ  ปริภุญฺชิ  โย  เต จีวรํ ปริภุญฺชิ โย เต
ปิณฺฑปาตํ  ปริภุญฺชิ  โย  เต  เสนาสนํ  ปริภุญฺชิ  โย  เต  คิลานปจฺจย-
เภสชฺชปริกฺขารํ   ปริภุญฺชิ   โส   ภิกฺขุ   สุญฺญาคาเร   จตุตฺถํ   ฌานํ
สมาปชฺชิ   สมาปชฺชติ   สมาปนฺโน   โส   ภิกฺขุ  สุญฺญาคาเร  จตุตฺถสฺส
ฌานสฺส  ลาภี  วสี  เตน  ภิกฺขุนา  สุญฺญาคาเร  จตุตฺถํ  ฌานํ สจฺฉิกตนฺติ
ภณนฺตสฺส อาปตฺติ ทุกฺกฏสฺส ฯ
     [๓๓๙]   อาโรเจยฺยาติ  อนุปสมฺปนฺนสฺส  เยน เต วิหาโร ปริภุตฺโต
เยน  เต  จีวรํ  ปริภุตฺตํ เยน เต ปิณฺฑปาโต ปริภุตฺโต เยน เต เสนาสนํ
ปริภุตฺตํ   เยน   เต  คิลานปจฺจยเภสชฺชปริกฺขาโร  ปริภุตฺโต  โส  ภิกฺขุ
สุญฺญาคาเร   จตุตฺถํ  ฌานํ  สมาปชฺชิ  สมาปชฺชติ  สมาปนฺโน  โส  ภิกฺขุ
สุญฺญาคาเร   จตุตฺถสฺส  ฌานสฺส  ลาภี  วสี  เตน  ภิกฺขุนา  สุญฺญาคาเร
จตุตฺถํ ฌานํ สจฺฉิกตนฺติ ภณนฺตสฺส อาปตฺติ ทุกฺกฏสฺส ฯ
     [๓๔๐]   อาโรเจยฺยาติ  อนุปสมฺปนฺนสฺส  ยํ  ตฺวํ  อาคมฺม  วิหารํ
อทาสิ     จีวรํ    ปิณฺฑปาตํ    เสนาสนํ    คิลานปจฺจยเภสชฺชปริกฺขารํ
อทาสิ   โส   ภิกฺขุ  สุญฺญาคาเร  จตุตฺถํ  ฌานํ  สมาปชฺชิ  ฯเปฯ  เตน
ภิกฺขุนา     สุญฺญาคาเร     จตุตฺถํ    ฌานํ    สจฺฉิกตนฺติ    ภณนฺตสฺส
อาปตฺติ ทุกฺกฏสฺส ฯ
     [๓๔๑]   อนาปตฺติ อุปสมฺปนฺนสฺส ภูตํ อาโรเจสิ อาทิกมฺมิกสฺสาติ ฯ
                          อฏฺฐมสิกฺขาปทํ นิฏฺฐิตํ ฯ
                                    --------


             เนื้อความพระไตรปิฎกฉบับภาษาบาลีอักษรไทย เล่มที่ ๒ หน้าที่ ๒๐๘-๒๒๔. https://84000.org/tipitaka/read/pali_item.php?book=2&item=304&items=38              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=2&item=304&items=38&mode=bracket              อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=2&item=304&items=38              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=2&item=304&items=38              ศึกษาอรรถกถานี้ได้ที่ :- https://84000.org/tipitaka/attha/attha.php?b=2&i=304              สารบัญพระไตรปิฎกเล่มที่ ๒ https://84000.org/tipitaka/read/?index_2 https://84000.org/tipitaka/english/?index_2

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]