พระไตรปิฎกเล่มที่ ๑๘ ภาษาบาลี อักษรไทย
พระสุตตันตปิฎกเล่มที่ ๑๐ สังยุตตนิกาย สฬายตนวรรค

     [๒๙๔]   เสยฺยถาปิ  ภิกฺขเว  ขีรรุกฺโข  อสฺสตฺโถ  วา  นิโคฺรโธ
วา  มิลกฺขุ  วา  อุทุมฺพโร  วา  สุกฺโข โกฬาโป เตโรวสฺสิโก ๑- ตเมนํ
ปุริโส  ติณฺหาย  กุธาริยา  ยโต  ยโต  ภินฺเทยฺย  อาคจฺเฉยฺย  ขีรนฺติ ฯ
โน เหตํ ภนฺเต ฯ ตํ กิสฺส เหตุ ฯ ยํ หิ ภนฺเต ขีรํ ตํ นตฺถีติ ๒- ฯ
     {๒๙๔.๑}   เอวเมว  โข ภิกฺขเว ยสฺส กสฺสจิ ภิกฺขุสฺส วา ภิกฺขุนิยา
วา  จกฺขุวิญฺเญยฺเยสุ  รูเปสุ  โย  ราโค  โส  นตฺถิ โย โทโส โส นตฺถิ
โย  โมโห โส นตฺถิ โย ราโค โส ปหีโน โย โทโส โส ปหีโน โย โมโห
โส  ปหีโน  ตสฺส  อธิมตฺตา  เจปิ  จกฺขุวิญฺเญยฺยา  รูปา จกฺขุสฺส อาปาถํ
อาคจฺฉนฺติ  เนวสฺส  จิตฺตํ  ปริยาทิยนฺติ  ฯ  โก  ปน  วาโท ปริตฺตานํ ฯ
ตํ  กิสฺส  เหตุ  ฯ โย ราโค โส นตฺถิ โย โทโส โส นตฺถิ โย โมโห โส
นตฺถิ  โย  ราโค  โส  ปหีโน โย โทโส โส ปหีโน โย โมโห โส ปหีโน
ฯเปฯ  ยสฺส  กสฺสจิ  ภิกฺขเว  ภิกฺขุสฺส วา ภิกฺขุนิยา วา ชิวฺหาวิญฺเญยฺเยสุ
รเสสุ   ฯเปฯ   ยสฺส   กสฺสจิ   ภิกฺขเว  ภิกฺขุสฺส  วา  ภิกฺขุนิยา  วา
มโนวิญฺเญยฺเยสุ  ธมฺเมสุ  โย  ราโค  โส  นตฺถิ  โย  โทโส  โส นตฺถิ
โย  โมโห  โส  นตฺถิ  โย  ราโค  โส  ปหีโน  โย  โทโส โส ปหีโน
โย   โมโห   โส   ปหีโน   ตสฺส   อธิมตฺตา   เจปิ   มโนวิญฺเญยฺยา
ธมฺมา   มนสฺส   อาปาถํ   อาคจฺฉนฺติ   เนวสฺส  จิตฺตํ  ปริยาทิยนฺติ  ฯ
โก  ปน  วาโท  ปริตฺตานํ  ฯ  ตํ  กิสฺส  เหตุ ฯ โย ภิกฺขเว ราโค โส
@เชิงอรรถ: ๑ ยุ. เถโรวสฺสิโก ฯ ๒ ยุ. นตฺถิ ฯ
นตฺถิ   โย   โทโส   โส   นตฺถิ  โย  โมโห  โส  นตฺถิ  โย  ราโค
โส ปหีโน โย โทโส โส ปหีโน โย โมโห โส ปหีโนติ ฯ
     [๒๙๕]   เอกํ   สมยํ   อายสฺมา   จ  สารีปุตฺโต  อายสฺมา  จ
มหาโกฏฺฐิโก    พาราณสิยํ   วิหรนฺติ   อิสิปตเน   มิคทาเย   ฯ   อถ
โข    อายสฺมา    มหาโกฏฺฐิโก   สายณฺหสมยํ   ปฏิสลฺลานา   วุฏฺฐิโต
เยนายสฺมา    สารีปุตฺโต    เตนุปสงฺกมิ    อุปสงฺกมิตฺวา    อายสฺมตา
สารีปุตฺเตน   สทฺธึ   สมฺโมทิ   สมฺโมทนียํ  กถํ  สาราณียํ  วีติสาเรตฺวา
เอกมนฺตํ   นิสีทิ   ฯ   เอกมนฺตํ  นิสินฺโน  โข  อายสฺมา  มหาโกฏฺฐิโก
อายสฺมนฺตํ   สารีปุตฺตํ  เอตทโวจ  กึ  นุ  โข  อาวุโส  สารีปุตฺต  จกฺขุ
รูปานํ   สญฺโญชนํ   รูปา   จกฺขุสฺส   สญฺโญชนํ   ฯเปฯ  ชิวฺหา  รสานํ
สญฺโญชนํ   รสา   ชิวฺหาย   สญฺโญชนํ  ฯเปฯ  มโน  ธมฺมานํ  สญฺโญชนํ
ธมฺมา   มนสฺส   สญฺโญชนนฺติ   ฯ   น   โข   อาวุโส  โกฏฺฐิก  จกฺขุ
รูปานํ   สญฺโญชนํ   น   รูปา   จกฺขุสฺส  สญฺโญชนํ  ยญฺจ  ตตฺถ  ตทุภยํ
ปฏิจฺจ   อุปฺปชฺชติ   ฉนฺทราโค   ตํ   ตตฺถ   สญฺโญชนํ   ฯ  น  ชิวฺหา
รสานํ    สญฺโญชนํ    น    รสา   ชิวฺหาย   สญฺโญชนํ   ยญฺจ   ตตฺถ
ตทุภยํ   ปฏิจฺจ   อุปฺปชฺชติ   ฉนฺทราโค  ตํ  ตตฺถ  สญฺโญชนํ  ฯ  ฯเปฯ
น   มโน   ธมฺมานํ   สญฺโญชนํ   น   ธมฺมา   มนสฺส  สญฺโญชนํ  ยญฺจ
ตตฺถ ตทุภยํ ปฏิจฺจ อุปฺปชฺชติ ฉนฺทราโค ตํ ตตฺถ สญฺโญชนํ ฯ
     [๒๙๖]   เสยฺยถาปิ  อาวุโส  กาโฬ  จ  พลิพทฺโท  โอทาโต  จ
พลิพทฺโท   เอเกน   ทาเมน   วา  โยตฺเตน  วา  สํยุตฺตา  อสฺสุ  โย
นุ   โข   เอวํ   วเทยฺย   กาโฬ   พลิพทฺโท   โอทาตสฺส  พลิพทฺทสฺส
สญฺโญชนํ    โอทาโต    พลิพทฺโท   กาฬสฺส   พลิพทฺทสฺส   สญฺโญชนนฺติ
สมฺมา  นุ  โข  โส  วทมาโน  วเทยฺยาติ  ฯ  โน  เหตํ อาวุโส น โข
อาวุโส    กาโฬ    พลิพทฺโท    โอทาตสฺส    พลิพทฺทสฺส    สญฺโญชนํ
นปิ    โอทาโต    พลิพทฺโท   กาฬสฺส   พลิพทฺทสฺส   สญฺโญชนํ   เยน
จ โข เต เอเกน ทาเมน วา โยตฺเตน วา สํยุตฺตา ตํ ตตฺถ สญฺโญชนํ ฯ
     {๒๙๖.๑}   เอวเมว   โข  อาวุโส  น  จกฺขุ  รูปานํ  สญฺโญชนํ
น   รูปา   จกฺขุสฺส   สญฺโญชนํ   ยญฺจ  ตตฺถ  ตทุภยํ  ปฏิจฺจ  อุปฺปชฺชติ
ฉนฺทราโค  ตํ  ตตฺถ  สญฺโญชนํ  ฯเปฯ  น  ชิวฺหา รสานํ สญฺโญชนํ ฯเปฯ
น   มโน   ธมฺมานํ   สญฺโญชนํ   น   ธมฺมา   มนสฺส  สญฺโญชนํ  ยญฺจ
ตตฺถ ตทุภยํ ปฏิจฺจ อุปฺปชฺชติ ฉนฺทราโค ตํ ตตฺถ สญฺโญชนํ ฯ
     [๒๙๗]   จกฺขุ   วา   อาวุโส  รูปานํ  สญฺโญชนํ  อภวิสฺส  รูปา
วา    จกฺขุสฺส   สญฺโญชนํ   นยิทํ   พฺรหฺมจริยวาโส   ปญฺญาเยถ   ๑-
สมฺมาทุกฺขกฺขยาย   ยสฺมา  จ  โข  อาวุโส  น  จกฺขุ  รูปานํ  สญฺโญชนํ
น   รูปา   จกฺขุสฺส   สญฺโญชนํ   ยญฺจ  ตตฺถ  ตทุภยํ  ปฏิจฺจ  อุปฺปชฺชติ
ฉนฺทราโค   ตํ   ตตฺถ   สญฺโญชนํ   ตสฺมา   พฺรหฺมจริยวาโส  ปญฺญายติ
@เชิงอรรถ: ๑ ม. ปญฺญายติ ฯ
สมฺมาทุกฺขกฺขยาย   ฯเปฯ   ชิวฺหา   วา   อาวุโส   รสานํ   สญฺโญชนํ
อภวิสฺส    รสา    วา   ชิวฺหาย   สญฺโญชนํ   นยิทํ   พฺรหฺมจริยวาโส
ปญฺญาเยถ   สมฺมาทุกฺขกฺขยาย   ยสฺมา   จ   โข   อาวุโส  น  ชิวฺหา
รสานํ   สญฺโญชนํ   น   รสา   ชิวฺหาย  สญฺโญชนํ  ยญฺจ  ตตฺถ  ตทุภยํ
ปฏิจฺจ    อุปฺปชฺชติ    ฉนฺทราโค    ตํ    ตตฺถ    สญฺโญชนํ    ตสฺมา
พฺรหฺมจริยวาโส     ปญฺญายติ     สมฺมาทุกฺขกฺขยาย     ฯเปฯ    มโน
วา    อาวุโส   ธมฺมานํ   สญฺโญชนํ   อภวิสฺส   ธมฺมา   วา   มนสฺส
สญฺโญชนํ    นยิทํ    พฺรหฺมจริยวาโส    ปญฺญาเยถ    สมฺมาทุกฺขกฺขยาย
ยสฺมา   จ   โข   อาวุโส   น   มโน  ธมฺมานํ  สญฺโญชนํ  น  ธมฺมา
มนสฺส     สญฺโญชนํ    ยญฺจ    ตตฺถ    ตทุภยํ    ปฏิจฺจ    อุปฺปชฺชติ
ฉนฺทราโค     ตํ     ตตฺถ     สญฺโญชนํ    ตสฺมา    พฺรหฺมจริยวาโส
ปญฺญายติ สมฺมาทุกฺขกฺขยาย ฯ
     {๒๙๗.๑}   อิมินาเปตํ   อาวุโส  ปริยาเยน  เวทิตพฺพํ  ฯ  ยถา
น   จกฺขุ   รูปานํ   สญฺโญชนํ   น   รูปา   จกฺขุสฺส   สญฺโญชนํ  ยญฺจ
ตตฺถ   ตทุภยํ   ปฏิจฺจ   อุปฺปชฺชติ   ฉนฺทราโค   ตํ   ตตฺถ   สญฺโญชนํ
ฯเปฯ   น   ชิวฺหา   รสานํ   สญฺโญชนํ   ฯเปฯ   น   มโน  ธมฺมานํ
สญฺโญชนํ   น   ธมฺมา   มนสฺส   สญฺโญชนํ   ฯ   ยญฺจ   ตตฺถ  ตทุภยํ
ปฏิจฺจ อุปฺปชฺชติ ฉนฺทราโค ตํ ตตฺถ สญฺโญชนํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๘ หน้าที่ ๒๐๒-๒๐๕.
https://84000.org/tipitaka/read/pali_item.php?book=18&item=294&items=4
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=18&item=294&items=4&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=18&item=294&items=4
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=18&item=294&items=4
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=18&i=294
             สารบัญพระไตรปิฎกเล่มที่ ๑๘
https://84000.org/tipitaka/read/?index_18
https://84000.org/tipitaka/english/?index_18