พระไตรปิฎกเล่มที่ ๑๕ ภาษาบาลี อักษรไทย
พระสุตตันตปิฎกเล่มที่ ๗ สุตฺต. สํ. สคาถวคฺโค

     [๘๔๖]   กถํ นุทานิ ปุจฺเฉยฺยํ           ปุถู สมณพฺราหฺมเณ
               โยหํ อชฺช ปชานามิ          โย อตฺโถ สมฺปรายิโก
               อตฺถาย วต เม พุทฺโธ        วาสายาฬวิมาคมา ๒-
               โยหํ อชฺช ปชานามิ          ยตฺถ ทินฺนํ มหปฺผลํ
               โส อหํ วิจริสฺสามิ             คามา คามํ ปุรา ปุรํ
               นมสฺสมาโน สมฺพุทฺธํ       ธมฺมสฺส จ สุธมฺมตนฺติ ฯ
                              ยกฺขสํยุตฺตํ สมตฺตํ ฯ
                                     ตสฺสุทฺทานํ
         อินฺทโก สกฺกสูจิ จ                 มณิภทฺโท จ สานุ จ
         ปิยงฺกรปุนพฺพสุ                     สุทตฺโต จ เทฺว สุกฺกา จีรา
         อาฬวเกน ทฺวาทสาติ ฯ
                     ------------
@เชิงอรรถ: ๑ ยุ. สุสฺสูสา ลภเต ปญฺญา ฯ ๒ ยุ. ...วิมาคโต ฯ
                                 สกฺกสํยุตฺตํ
                             ปฐมวคฺโค ปฐโม
                                   ----------
                               ปฐมํ สุวีรสุตฺตํ
     [๘๔๗]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม   ฯ   ตตฺร   โข   ภควา  ภิกฺขู
อามนฺเตสิ ภิกฺขโวติ ฯ ภทนฺเตติ เต ภิกฺขู ภควโต ปจฺจสฺโสสุํ ฯ
     [๘๔๘]   ภควา   เอตทโวจ   ภูตปุพฺพํ   ภิกฺขเว  อสุรา  เทเว
อภิยํสุ   ฯ   อถ   โข  ภิกฺขเว  สกฺโก  เทวานมินฺโท  สุวีรํ  เทวปุตฺตํ
อามนฺเตสิ   เอเต   ตาต   สุวีร  อสุรา  เทเว  อภิยนฺติ  คจฺฉ  ตาต
สุวีร   อสุเร  ปจฺจุยฺยาหีติ  ฯ  เอวํ  ภทฺทนฺตวาติ  โข  ภิกฺขเว  สุวีโร
เทวปุตฺโต   สกฺกสฺส   เทวานมินฺทสฺส  ปฏิสฺสุตฺวา  ปมาทํ  อาปาเทสิ  ฯ
ทุติยมฺปิ  โข  ภิกฺขเว  สกฺโก  เทวานมินฺโท  สุวีรํ  เทวปุตฺตํ  อามนฺเตสิ
เอเต   ตาต  สุวีร  อสุรา  เทเว  อภิยนฺติ  คจฺฉ  ตาต  สุวีร  อสุเร
ปจฺจุยฺยาหีติ   ฯ   เอวํ   ภทฺทนฺตวาติ  โข  ภิกฺขเว  สุวีโร  เทวปุตฺโต
สกฺกสฺส   เทวานมินฺทสฺส   ปฏิสฺสุตฺวา   ทุติยมฺปิ   ปมาทํ  อาปาเทสิ  ฯ
ตติยมฺปิ  โข  ภิกฺขเว  สกฺโก  เทวานมินฺโท  สุวีรํ  เทวปุตฺตํ  อามนฺเตสิ
เอเต   ตาต  สุวีร  อสุรา  เทเว  อภิยนฺติ  คจฺฉ  ตาต  สุวีร  อสุเร
ปจฺจุยฺยาหีติ   ฯ   เอวํ   ภทฺทนฺตวาติ  โข  ภิกฺขเว  สุวีโร  เทวปุตฺโต
สกฺกสฺส เทวานมินฺทสฺส ปฏิสฺสุตฺวา ตติยมฺปิ ปมาทํ อาปาเทสิ ฯ
     [๘๔๙]   อถ  โข  ภิกฺขเว  สกฺโก  เทวานมินฺโท  สุวีรํ  เทวปุตฺตํ
คาถาย อชฺฌภาสิ
               อนุฏฺฐหํ อวายามํ              สุขํ ยตฺราธิคจฺฉติ
               สุวีร ตตฺถ คจฺฉาหิ            มญฺจ ตตฺเถว ปาปยาติ ฯ
     [๘๕๐]   อลสฺวายํ ๑- อนุฏฺฐาตา     น จ กิจฺจานิ การเย
               สพฺพกามสมิทฺธสฺส           ตมฺเม สกฺก วรํ ทิสาติ ฯ
     [๘๕๑]   ยตฺถาลโส อนุฏฺฐาตา        อจฺจนฺตสุขเมธติ
               สุวีร ตตฺถ คจฺฉาหิ            มญฺจ ตตฺเถว ปาปยาติ ฯ
     [๘๕๒]   อกมฺมุนา เทวเสฏฺฐ          สกฺก วินฺเทมุ ยํ สุขํ
               อโสกํ อนุปายาสํ               ตมฺเม สกฺก วรํ ทิสาติ ฯ
     [๘๕๓]   สเจ อตฺถิ อกมฺเมน           โกจิ กฺวจิ น ชีวติ
               นิพฺพานสฺส หิ โส มคฺโค   สุวีร ตตฺถ คจฺฉาหิ
               .................                      มญฺจ ตตฺเถว ปาปยาติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๕ หน้าที่ ๓๑๖-๓๑๘.
https://84000.org/tipitaka/read/pali_item.php?book=15&item=846&items=8&mode=bracket
             อ่านโดยใช้เนื้อความเป็นเกณฑ์แบ่งข้อ :-
https://84000.org/tipitaka/read/pali_item.php?book=15&item=846&items=8
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=15&item=846&items=8&mode=bracket
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=15&item=846&items=8&mode=bracket
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=15&i=846
             สารบัญพระไตรปิฎกเล่มที่ ๑๕
https://84000.org/tipitaka/read/?index_15
https://84000.org/tipitaka/english/?index_15