พระไตรปิฎกเล่มที่ ๑๔ ภาษาบาลี อักษรไทย
พระสุตตันตปิฎกเล่มที่ ๖ สุตฺต. ม. อุปริปณฺณาสกํ

     [๕๒๕]   อิทมโวจ   ภควา   อิทํ   วตฺวาน   สุคโต   อถาปรํ
เอตทโวจ สตฺถา
          โจทิตา เทวทูเตหิ            เย ปมชฺชนฺติ มาณวา
          เต ทีฆรตฺตํ โสจนฺติ         หีนกายูปคา นรา
          เย จ โข เทวทูเตหิ           สนฺโต สปฺปุริสา อิธ
          โจทิตา นปฺปมชฺชนฺติ      อริยธมฺเม กุทาจนํ
          อุปาทาเน ภยํ ทิสฺวา        ชาติมรณสมฺภเว
          อนุปาทา วิมุจฺจนฺติ         ชาติมรณสงฺขเย
          เต เขมปฺปตฺตา สุขิโน      ทิฏฺฐธมฺมาภินิพฺพุตา
          สพฺพเวรภยาตีตา             สพฺพทุกฺขํ อุปจฺจคุนฺติ ฯ
                  เทวทูตสุตฺตํ นิฏฺฐิตํ ทสมํ ฯ
                    สุญฺญตวคฺโค ตติโย ฯ
                        -------
                        ตสฺสุทฺทานํ
                  อนุตฺตโร สุญฺญตพฺภูตธมฺโม
                   พกฺกุลวีรวโร มหินาโม
                   อนุรุทฺธกิเลสมฺปชฺชหนฺตา
                    ปณฺฑิตภูมิ เทวทูโต ฯ
                       ---------
                       วิภงฺควคฺโค
                        ------
                      ภทฺเทกรตฺตสุตฺตํ
     [๕๒๖]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม   ฯ   ตตฺร   โข   ภควา  ภิกฺขู
อามนฺเตสิ   ภิกฺขโวติ  ฯ  ภทนฺเตติ  เต  ภิกฺขู  ภควโต  ปจฺจสฺโสสุํ  ฯ
ภควา   เอตทโวจ   ภทฺเทกรตฺตสฺส  โว  ภิกฺขเว  อุทฺเทสญฺจ  วิภงฺคญฺจ
เทสิสฺสามิ   ตํ   สุณาถ   สาธุกํ   มนสิกโรถ   ภาสิสฺสามีติ   ฯ  เอวํ
ภนฺเตติ โข เต ภิกฺขู ภควโต ปจฺจสฺโสสุํ ฯ
     [๕๒๗]   ภควา เอตทโวจ
          อตีตํ นานฺวาคเมยฺย             นปฺปฏิกงฺเข อนาคตํ
          ยทตีตมฺปหีนนฺตํ                 อปฺปตฺตญฺจ อนาคตํ
          ปจฺจุปฺปนฺนญฺจ โย ธมฺมํ      ตตฺถ ตตฺถ วิปสฺสติ
          อสํหิรํ อสงฺกุปฺปํ                  ตํ วิทฺธา มนุพฺรูหเย
          อชฺเชว กิจฺจมาตปฺปํ            โก ชญฺญา มรณํ สุเว
          น หิ โน สงฺครนฺเตน            มหาเสเนน มจฺจุนา
          เอวํวิหาริมาตาปึ                 อโหรตฺตมตนฺทิตํ
          ตํ เว ภทฺเทกรตฺโตติ            สนฺโต อาจิกฺขเต มุนีติ ฯ
     [๕๒๘]   กถญฺจ  ภิกฺขเว  อตีตํ  อนฺวาคเมติ  ฯ  เอวํรูโป  อโหสึ
อตีตมทฺธานนฺติ  ตตฺถ  นนฺทึ  สมนฺวาเนติ เอวํเวทโน อโหสึ อตีตมทฺธานนฺติ
ตตฺถ    นนฺทึ    สมนฺวาเนติ    เอวํสญฺโญ    อโหสึ    อตีตมทฺธานนฺติ
ตตฺถ    นนฺทึ    สมนฺวาเนติ    เอวํสงฺขาโร   อโหสึ   อตีตมทฺธานนฺติ
ตตฺถ    นนฺทึ    สมนฺวาเนติ    เอวํวิญฺญาโณ   อโหสึ   อตีตมทฺธานนฺติ
ตตฺถ    นนฺทึ    สมนฺวาเนติ    ฯ    เอวํ    โข    ภิกฺขเว   อตีตํ
อนฺวาคเมติ ฯ
     [๕๒๙]   กถญฺจ  ภิกฺขเว  อตีตํ  นานฺวาคเมติ  ฯ  เอวํรูโป อโหสึ
อตีตมทฺธานนฺติ   ตตฺถ   นนฺทึ   น   สมนฺวาเนติ   เอวํเวทโน   อโหสึ
อตีตมทฺธานนฺติ    ตตฺถ   นนฺทึ   น   สมนฺวาเนติ   เอวํสญฺโญ   อโหสึ
อตีตมทฺธานนฺติ   ตตฺถ   นนฺทึ   น   สมนฺวาเนติ   เอวํสงฺขาโร  อโหสึ
อตีตมทฺธานนฺติ   ตตฺถ   นนฺทึ   น   สมนฺวาเนติ   เอวํวิญฺญาโณ  อโหสึ
อตีตมทฺธานนฺติ   ตตฺถ   นนฺทึ   น  สมนฺวาเนติ  ฯ  เอวํ  โข  ภิกฺขเว
อตีตํ นานฺวาคเมติ ฯ
     [๕๓๐]   กถญฺจ   ภิกฺขเว  อนาคตํ  ปฏิกงฺขติ  ฯ  เอวํรูโป  สิยํ
อนาคตมทฺธานนฺติ    ตตฺถ    นนฺทึ    สมนฺวาเนติ    เอวํเวทโน   สิยํ
ฯเปฯ   เอวํสญฺโญ   สิยํ   ฯเปฯ   เอวํสงฺขาโร   สิยํ   ฯเปฯ  เอวํ
วิญฺญาโณ    สิยํ    อนาคตมทฺธานนฺติ   ตตฺถ   นนฺทึ   สมนฺวาเนติ   ฯ
เอวํ โข ภิกฺขเว อนาคตํ ปฏิกงฺขติ ฯ
     [๕๓๑]   กถญฺจ  ภิกฺขเว  อนาคตํ  นปฺปฏิกงฺขติ  ฯ  เอวํรูโป  สิยํ
อนาคตมทฺธานนฺติ   ตตฺถ   นนฺทึ   น   สมนฺวาเนติ   เอวํเวทโน   สิยํ
ฯเปฯ   เอวํสญฺโญ   สิยํ   ฯเปฯ   เอวํสงฺขาโร   สิยํ   ฯเปฯ  เอวํ
วิญฺญาโณ   สิยํ   อนาคตมทฺธานนฺติ   ตตฺถ   นนฺทึ   น  สมนฺวาเนติ  ฯ
เอวํ โข ภิกฺขเว อนาคตํ นปฺปฏิกงฺขติ ฯ
     [๕๓๒]   กถญฺจ  ภิกฺขเว  ปจฺจุปฺปนฺเนสุ  ธมฺเมสุ  สํหิรติ  ฯ  อิธ
ภิกฺขเว   อสฺสุตวา  ปุถุชฺชโน  อริยานํ  อทสฺสาวี  อริยธมฺมสฺส  อโกวิโท
อริยธมฺเม   อวินีโต   สปฺปุริสานํ   อทสฺสาวี   สปฺปุริสธมฺมสฺส  อโกวิโท
สปฺปุริสธมฺเม    อวินีโต    รูปํ   อตฺตโต   สมนุปสฺสติ   รูปวนฺตํ   วา
อตฺตานํ   อตฺตนิ   วา   รูปํ   รูปสฺมึ   วา   อตฺตานํ   เวทนํ  ฯเปฯ
สญฺญํ    ฯเปฯ    สงฺขาเร    ฯเปฯ   วิญฺญาณํ   อตฺตโต   สมนุปสฺสติ
วิญฺญาณวนฺตํ   วา   อตฺตานํ   อตฺตนิ   วา   วิญฺญาณํ   วิญฺญาณสฺมึ  วา
อตฺตานํ ฯ เอวํ โข ภิกฺขเว ปจฺจุปฺปนฺเนสุ ธมฺเมสุ สํหิรติ ฯ
     [๕๓๓]   กถญฺจ   ภิกฺขเว  ปจฺจุปฺปนฺเนสุ  ธมฺเมสุ  น  สํหิรติ  ฯ
อิธ   ภิกฺขเว   สุตวา   อริยสาวโก   อริยานํ   ทสฺสาวี   อริยธมฺมสฺส
โกวิโท    อริยธมฺเม   สุวินีโต   สปฺปุริสานํ   ทสฺสาวี   สปฺปุริสธมฺมสฺส
โกวิโท   สปฺปุริสธมฺเม   สุวินีโต  ๑-  น  รูปํ  อตฺตโต  สมนุปสฺสติ  น
รูปวนฺตํ   วา   อตฺตานํ  น  อตฺตนิ  วา  รูปํ  น  รูปสฺมึ  วา  อตฺตานํ
น   เวทนํ   ฯเปฯ   น   สญฺญํ   ฯเปฯ   น   สงฺขาเร   ฯเปฯ  น
วิญฺญาณํ    อตฺตโต    สมนุปสฺสติ    น    วิญฺญาณวนฺตํ   วา   อตฺตานํ
น   อตฺตนิ   วา   วิญฺญาณํ   น   วิญฺญาณสฺมึ   วา  อตฺตานํ  ฯ  เอวํ
โข ภิกฺขเว ปจฺจุปฺปนฺเนสุ ธมฺเมสุ น สํหิรติ ฯ
@เชิงอรรถ: ๑ ยุ. วินีโต ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๔ หน้าที่ ๓๔๖-๓๕๐.
https://84000.org/tipitaka/read/pali_item.php?book=14&item=525&items=9
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=14&item=525&items=9&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=14&item=525&items=9
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=14&item=525&items=9
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=14&i=525
             สารบัญพระไตรปิฎกเล่มที่ ๑๔
https://84000.org/tipitaka/read/?index_14
https://84000.org/tipitaka/english/?index_14