ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๔๐ ภาษาบาลีอักษรไทย ชา.อ.๖ เอกาทสก-ปกิณฺณก

                     ๙ สุปารกชาตกํ ฯ
     อุมฺมุชฺชนฺติ นิมุชฺชนฺตีติ อิทํ สตฺถา เชตวเน วิหรนฺโต ปญฺญาปารมึ
อารพฺภ กเถสิ ฯ
     เอกทิวสํ หิ สายณฺหสมเย ตถาคตสฺส ธมฺมํ เทเสตุํ นิกฺขมนํ
อาคมยมานา ภิกฺขู ธมฺมสภายํ นิสีทิตฺวา อาวุโส อโห วต สตฺถา
มหาปญฺโญ ปุถุปญฺโญ หาสปญฺโญ ชวนปญฺโญ ติกฺขปญฺโญ
นิพฺเพธิกปญฺโญ ตตฺร ตตฺร อุปายาย ปญฺญาย สมนฺนาคโต วิปุลาย
ปฐวิสมาย มหาสมุทฺโท วิย คมฺภีราย อากาโส วิย วิตฺถิณฺณาย
จ สกลชมฺพูทีปสฺมึ หิ อุฏฺฐิตปญฺโห ทสพลํ อติกฺกมิตฺวา คนฺตุํ
สมตฺโถนาม นตฺถิ ยถา มหาสมุทฺเท อุฏฺฐิตา อุมฺมิ เวลํ ปตฺตมตฺตาว
ภิชฺชติ เอวํ น โกจิ ปญฺโห ทสพลํ อติกฺกมิ สตฺถุ ปาทมูลํ
ปตฺโต ภิชฺชติเอวาติ ทสพลสฺส มหาปญฺญาปารมึ วณฺณยนฺตา
นิสีทึสุ ฯ สตฺถา อาคนฺตฺวา กายนุตฺถ ภิกฺขเว เอตรหิ
กถาย สนฺนิสินฺนาติ ปุจฺฉิตฺวา อิมายนามาติ วุตฺเต น ภิกฺขเว
ตถาคโต อิทาเนว ปญฺญวา ปุพฺเพปิ อปริปกฺกญาเณน ปญฺญวาเยว
อนฺโธปิ หุตฺวา มหาสมุทฺเท อุทกสญฺญาย อิมสฺมึ สมุทฺเท อิทํนาม
รตนนฺติ อญฺญาสีติ วตฺวา อตีตํ อาหริ
     อตีเต กุรุรฏฺเฐ กุรุราชา นาม รชฺชํ กาเรสิ ฯ ภรุกจฺฉํนาม
ปฏฺฏนคาโม อโหสิ ฯ ตทา โพธิสตฺโต ภรุกจฺเฉ นิยามกเชฏฺฐกสฺส
ปุตฺโต หุตฺวา นิพฺพตฺติ ปาสาทิโก สุวณฺณวณฺโณ ฯ
สุปารกกุมาโรติสฺส นามํ กรึสุ ฯ โส มหนฺเตน ปริวาเรน วฑฺฒนฺโต
โสฬสวสฺสกาเลเยว นิยามกสิปฺเปเยว นิปฺผตฺตึ ปตฺวา อปรภาเค
ปิตุอจฺจเยน นิยามกเชฏฺฐโก หุตฺวา นิยามกกมฺมํ อกาสิ ฯ ปณฺฑิโต
ญาณสมฺปนฺโน อโหสิ ฯ เตน อารุฬฺหนาวาย พฺยาปตฺตินาม นตฺถิ ฯ
ตสฺส อปรภาเค โลณชลปหตานิ เทฺวปิ จกฺขูนิ นสฺสึสุ ฯ โส ตโต
ปฏฺฐาย นิยามกเชฏฺฐโก หุตฺวาปิ นิยามกกมฺมํ อกตฺวา ราชานํ นิสฺสาย
ชีวิสฺสามีติ ราชานํ อุปสงฺกมิ ฯ อถ นํ ราชา อคฺฆาปนิยกมฺเม
ฐเปสิ ฯ โส ตโต ปฏฺฐาย รญฺโญ หตฺถิรตนอสฺสรตนญฺจ
มุตฺตาสารมณิสาราทีนิ อคฺฆาเปสิ ฯ อเถกทิวสํ รญฺโญ
มงฺคลหตฺถี ภวิสฺสตีติ กาฬปาสาณกูฏวณฺณํ เอกํ วารณํ อาเนสุํ ฯ
ตํ ทิสฺวา ราชา ปณฺฑิตสฺส ทสฺเสถาติ อาห ฯ อถ นํ ตสฺส
สนฺติกํ นยึสุ ฯ โส หตฺเถน ตสฺส สรีรํ ปริมชฺชิตฺวา นายํ มงฺคลหตฺถี
ภวิตุํ อนุจฺฉวิโก ปจฺฉา ปาเทหิ วามนกธาตุโก เอส เอตํหิ
มาตา วิชายมานา องฺเกน ปฏิจฺฉิตุํ นาสกฺขิ ตสฺมา ภูมิยํ ปติตฺวา
ปจฺฉิมปาเทหิ วามนกธาตุโก ชาโตติ อาห ฯ เต หตฺถึ คเหตฺวา
อาคเต มนุสฺเส ปุจฺฉึสุ ฯ เต สจฺจํ ปณฺฑิโต กเถตีติ วทึสุ ฯ ตํ
การณํ ราชา สุตฺวา หฏฺฐตุฏฺโฐ ตสฺส อฏฺฐ กหาปเณ ทาเปสิ ฯ
ปุเนกทิวสํ รญฺโญ มงฺคลอสฺโส ภวิสฺสตีติ เอกํ อสฺสํ อานยึสุ ฯ ตํปิ
ราชา ปณฺฑิตสฺส สนฺติกํ เปเสสิ ฯ โส ตํปิ หตฺเถน ปรามสิตฺวา
อยํ มงฺคลอสฺโส ภวิตุํ น ยุตฺโต เอตสฺส หิ ชาตทิวเสเยว
มาตา มริ ตสฺมา มาตุ ขีรํ อลภนฺโต น สมฺมา วฑฺฒิโตติ
อาห ฯ อสฺเส คเหตฺวา อาคตมนุสฺสา สาปิสฺส กถา สจฺจาติ
วทึสุ ฯ ตํปิ สุตฺวา ราชา ตุสิตฺวา อฏฺฐ กหาปเณเยว ทาเปสิ ฯ
อเถกทิวสํ รญฺโญ มงฺคลรโถ ภวิสฺสตีติ รถํ อานยึสุ ฯ ตํปิ
ราชา ตสฺส สนฺติกํ เปเสสิ ฯ โส ตํ หตฺเถน ปรามสิตฺวา อยํ
รโถ สุสิรรุกฺเขน กโต ตสฺมา รญฺโญ น อนุจฺฉวิโกติ อาห ฯ
สาปิสฺส กถา สจฺจาว อโหสิ ฯ ราชา ตํปิ สุตฺวา ตุสิตฺวา
อฏฺฐกหาปเณ ทาเปสิ ฯ อถสฺส มหคฺฆํ กมฺพลรตนํ อาหรึสุ ฯ
ตํปิ ตสฺเสว เปเสสิ ฯ ตํปิ หตฺเถน ปรามสิตฺวา อิมสฺส มูสิกจฺฉินฺนํ
เอกํ ฐานํ อตฺถีติ อาห ฯ โสเธนฺตา ตํ ทิสฺวา รญฺโญ อาโรเจสุํ ฯ
ราชา ตํ การณํ สุตฺวา ตุสิตฺวา อฏฺเฐว กหาปเณ ทาเปสิ ฯ โส
จินฺเตสิ อยํ ราชา เอวรูปานิ อจฺฉริยานิ ทิสฺวา อฏฺฐ กหาปเณ
ทาเปสิ อิมสฺส ทาโย นฺหาปิตทาโย นฺหาปิตสฺส ชาติโก ภวิสฺสติ
กึ เม เอวรูเปน ราชุปฏฺฐาเนน อตฺตโน วสนฏฺฐานเมว คมิสฺสามีติ
โส ภรุกจฺฉปฏฺฏนเมว ปจฺจาคมิ ฯ ตสฺมึ ตตฺถ วสนฺเต พาณิชา
นาวํ สชฺเชตฺวา กํ นิยามกํ กริสฺสามาติ มนฺเตตฺวา สุปารกปณฺฑิเตน
อารุฬฺหนาวา น พฺยาปชฺชติ เอส ปณฺฑิโต อุปายกุสโล อนฺโธ
สมาโนปิ สุปารกปณฺฑิโต จ อุตฺตโมติ ตํ อุปสงฺกมิตฺวา นิยามโก
โน โหหีติ วตฺวา ตาตา อหํ อนฺโธ กถํ นิยามกกมฺมํ กริสฺสามีติ
วุตฺเต สามิ อนฺธาปิ ตุมฺเหเยว อมฺหากํ อุตฺตมาติ ปุนปฺปุนํ ยาจึสุ ฯ
สาธุ ตาตา ตุมฺเหหิ อาโรปิตสญฺญาย นิยฺยามโก ภวิสฺสามีติ เตสํ
นาวํ อภิรูหิ ฯ เต นาวาย มหาสมุทฺทํ ปกฺขนฺทึสุ ฯ นาวา
สตฺต ทิวสานิ นิรุปทฺทวา อคมาสิ ฯ ตโต อกาลวาตํ อุปฺปาติตํ
อุปฺปชฺชติ ฯ นาวา จตฺตาโร มาเส ปกติสมุทฺทปิฏฺเฐ จริตฺวาว
ขุรมาลิสมุทฺทํนาม ปตฺตา ฯ ตตฺถ มจฺฉา มนุสฺสสมานสรีรา ขุรนาสา
อุทเก อุมฺมุชฺชนิมฺมุชฺชํ กโรนฺติ ฯ พาณิชา เต ทิสฺวา มหาสตฺตํ
ตสฺส สมุทฺทสฺส นามํ ปุจฺฉนฺตา ปฐมํ คาถมาหํสุ
        อุมฺมุชฺชนฺติ นิมุชฺชนฺติ       มนุสฺสา ขุรนาสิกา
        สุปารกนฺตํ ปุจฺฉาม        สมุทฺโท กตโม อยนฺติ ฯ
     เอวํ เตหิ ปุฏฺโฐ มหาสตฺโต อตฺตโน นิยามกสุตฺเตน สํสนฺเทตฺวา
ทุติยํ คาถมาห
        ภรุกจฺฉา ปยาตานํ        พาณิชานํ ธเนสินํ
        นาวาย วิปฺปนฏฺฐาย       ขุรมาลีติ วุจฺจตีติ ฯ
     ตตฺถ ปยาตานนฺติ ภรุกจฺฉปฏฺฏนา นิกฺขมิตฺวา คจฺฉนฺตานํ ฯ
ธเนสินนฺติ ตุมฺหากํ พาณิชานํ ธนํ ปริเยสนฺตานํ ฯ นาวาย
วิปฺปนฏฺฐายาติ ตาตา ตุมฺหากํ อิมาย วิเทสํ ปกฺขนฺตาย นาวาย
กมฺมการณาย ปกติสมุทฺทํ อติกฺกมิตฺวา สมฺปตฺโต อยํ สมุทฺโท
ขุรมาลีติ วุจฺจตีติ เอวเมตํ ปณฺฑิตา กเถนฺตีติ ฯ
     ตสฺมึ ปน สมุทฺเท วชิรํ อุสฺสนฺนํ โหติ ฯ โส มหาสตฺโต
สจาหํ อยํ วชิรสมุทฺโทติ เอวํ เอเตสํ กเถสฺสามิ โลเภน พหุํ
วชิรํ คเหตฺวา นาวํ โอสีทาเปสฺสนฺตีติ เตสํ อนาจิกฺขิตฺวาว นาวํ
โอลมฺพาเปตฺวา อุปาเยเนว โยตฺตํ คเหตฺวา มจฺฉคหณนิยาเมน
ชาลํ ขิปาเปตฺวา วชิรสารํ อุทฺธริตฺวา นาวาย ปกฺขิปิตฺวา อญฺญํ
อปฺปคฺฆํ ภณฺฑํ ฉฑฺฑาเปสิ ฯ นาวา ตํ สมุทฺทํ อติกฺกมิตฺวา
ปุรโต อคฺคิมาลึนาม คตา ฯ โส ปชฺชลิตอคฺคิกฺขนฺโธ วิย
มชฺฌนฺติกสุริโย วิย จ โอภาสํ มุญฺจนฺโต อฏฺฐาสิ ฯ พาณิชา
        ยถา อคฺคิ สุริโย จ       สมุทฺโท ปฏิทิสฺสติ
        สุปารกนฺตํ ปุจฺฉาม        สมุทฺโท กตโม อยนฺติ ฯ
     คาถาย ตํ ปุจฺฉึสุ ฯ ปุน มหาสตฺโตปิ เนสํ อนนฺตรคาถาย
กเถสิ
        ภรุกจฺฉา ปยาตานํ        พาณิชานํ ธเนสินํ
        นาวาย วิปฺปนฏฺฐาย       อคฺคิมาลีติ วุจฺจตีติ ฯ
     ตสฺมึ ปน สมุทฺเท สุวณฺณํ อุสฺสนฺนํ อโหสิ ฯ มหาสตฺโตปิ
ปุริมนเยเนว ตโตปิ สุวณฺณํ คาหาเปตฺวา นาวาย ปกฺขิปาเปสิ ฯ
นาวาปิ ตํ สมุทฺทํ อติกฺกมิตฺวา ขีรํ วิย ทธิ วิย จ โอภาสนฺตํ
ทธิมาลึนาม สมุทฺทํ ปาปุณิ ฯ
     พาณิชา
        ยถา ทธิ จ ขีรญฺจ        สมุทฺโท ปฏิทิสฺสติ
        สุปารกนฺตํ ปุจฺฉาม        สมุทฺโท กตโม อยนฺติ
     อิมาย คาถาย ตสฺสาปิ นามํ ปุจฺฉึสุ ฯ เตสํ มหาสตฺโต
อนนฺตรคาถาย อาจิกฺขิ
        ภรุกจฺฉา ปยาตานํ        พาณิชานํ ธเนสินํ
        นาวาย วิปฺปนฏฺฐาย       ทธิมาลีติ วุจฺจตีติ ฯ
     ตสฺมึ ปน สมุทฺเท รชฏฺ อุสฺสนฺนํ โหติ ฯ อถ โส ตํปิ
อุปาเยน คาหาเปตฺวา นาวาย ปกฺขิปาเปสิ ฯ นาวา ตํ สมุทฺทํ
อติกฺกมิตฺวา นีลกุสติณํวิย สมฺปนฺนสสฺสมิว จ โอภาสมานํ นีลวณฺณํ
กุสมาลึนาม สมุทฺทํ ปาปุณิ ฯ พาณิชา
        ยถา กุโส จ สสฺโส จ     สมุทฺโท ปฏิทิสฺสติ
        สุปารกนฺตํ ปุจฺฉาม        สมุทฺโท กตโม อยนฺติ
     คาถาย ตสฺสาปิ นามํ ปุจฺฉึสุ ฯ โส อนนฺตรคาถาย อาจิกฺขิ
        ภรุกจฺฉา ปยาตานํ   พาณิชานํ ธเนสินํ
        นาวาย วิปฺปนฏฺฐาย  กุสมาลีติ วุจฺจตีติ ฯ
     ตสฺมึ ปน สมุทฺเท นีลมณิรตนํ อุสฺสนฺนํ อโหสิ ฯ โสปิ
นํ อุปาเยน คาหาเปตฺวา นาวาย ปกฺขิปาเปสิ ฯ นาวาปิ ตํ สมุทฺทํ
อติกฺกมิตฺวา นฬวนํ วิย เวฬุวนํ วิย จ ขายมานํ นฬมาลึนาม
สมุทฺทํ ปาปุณิ ฯ พาณิชา
        ยถา นโฬ จ เวฬุ จ      สมุทฺโท ปฏิทิสฺสติ
        สุปารกนฺตํ ปุจฺฉาม        สมุทฺโท กตโม อยนฺติ
     คาถาย ตสฺสาปิ นามํ ปุจฺฉึสุ ฯ มหาสตฺโต ตํ อนนฺตรคาถาย
กเถสิ
        ภรุกจฺฉา ปยาตานํ        พาณิชานํ ธเนสินํ
        นาวาย วิปฺปนฏฺฐาย       นฬมาลีติ วุจฺจตีติ ฯ
     ตสฺมึ ปน สมุทฺเท มสารคลฺลเวฬุริยํ อุสฺสนฺนํ โหติ ฯ โส
ตํปิ อุปาเยน คาหาเปตฺวา นาวาย ปกฺขิปาเปสิ ฯ
     อปโร นโย นโฬติ วิจฺฉิกนโฬ กกฺกฏกนโฬปิ โส
รตฺตวณฺโณ โหติ ฯ เวฬูติ ปน ปวาลสฺเสเวตํ นามํ โส จ
สมุทฺโท ปวาลสฺส อุสฺสนฺโน รตฺโตภาโส อโหสิ ฯ ตสฺมา ยถา
นโฬ จ เวฬุ จาติ ปุจฺฉึสุ ฯ
     มหาสตฺโต ตโต ปวาลํ คาหาเปสีติ ฯ พาณิชา นฬมาลึ
อติกฺกมิตฺวา พลวามุขสมุทฺทํนาม ปสฺสึสุ ฯ ตตฺถ อุทกํ อุกฺกุชิตฺวา
สพฺพโตภาเคน อุคฺคจฺฉติ ฯ ตสฺมึ สพฺพโตภาเคน อุคฺคตํ อุทกํ
สพฺพโตภาเคน ฉินฺนตฏมหาโสพฺโภ วิย ปญฺญายติ อุมฺมิยา อุคฺคตาย
เอกโต ปปาตสทิสํ โหติ ภยชนโน สทฺโท อุปฺปชฺชติ โสตานิ
ภินฺทนฺโต วิย หทยสฺส ผาเลนฺโต วิย จ ฯ ตํ ทิสฺวา พาณิชา
ภีตตสิตา
        มหพฺภโย ภึสนโก         สทฺโท สุยฺยตมานุโส
        ยถา โสพฺโภ ปปาโตว     สมุทฺโท ปฏิทิสฺสติ
        สุปารกนฺตํ ปุจฺฉาม        สมุทฺโท กตโม อยนฺติ
     คาถาย ตสฺส นามํ ปุจฺฉึสุ ฯ
     ตตฺถ สุยฺยตมานุโสติ สุยฺยติ อมานุสฺโส สทฺโท ฯ
     มหาสตฺโต
        ภรุกจฺฉา ปยาตานํ        พาณิชานํ ธเนสินํ
        นาวาย วิปฺปนฏฺฐาย       พลวามุขีติ วุจฺจตีติ ฯ
     โพธิสตฺโต อนนฺตรคาถาย ตสฺส นามํ อาจิกฺขิตฺวา ตาตา
อิมํ พลวามุขํ สมุทฺทํ ปตฺตา นิวตฺเตตุํ สมตฺถานาม นาวา นตฺถิ
อยํ สมฺปตฺตนาวํ นิมฺมุชฺชาเปตฺวา วินาสํ ปาเปตีติ อาห ฯ ตญฺจ
นาวํ สตฺต มนุสฺสสตานิ อภิรูหึสุ ฯ เต สพฺเพ มรณภยภีตา
เอกปฺปหาเรเนว อวิจิมฺหิ ปจฺจมานสตฺตา วิย อติกลูนํ สรํ
มุญฺจยมานา ปริเทวึสุ ฯ มหาสตฺโต ฐเปตฺวา มํ อญฺโญ เอเตสํ
โสตฺถิภาวํ กาตุํ สมตฺโถนาม นตฺถิ สจฺจกิริยาย เตสํ โสตฺถึ
กริสฺสามีติ จินฺเตตฺวา เต อามนฺเตตฺวา ตาตา ขิปฺปํ มํ คนฺโธทเกน
นฺหาเปตฺวา อหตวตฺถานิ นิวาสาเปตฺวา ปุณฺณปาตึ สชฺเชตฺวา นาวาย
ธุเร ฐเปถาติ ฯ เต พาณิชา ตถา กรึสุ ฯ มหาสตฺโต อุโภหิ
หตฺเถหิ ปุณฺณปาตึ คเหตฺวา นาวาย ธุเร ฐิโต สจฺจกิริยํ กโรนฺโต
โอสานคาถมาห
        ยโต สรามิ อตฺตานํ       ยโต ปตฺโตสฺมิ วิญฺญุตํ
        นาภิชานามิ สญฺจิจฺจ       เอกปาณํปิ หึสิตุํ
        เอเตน สจฺจวชฺเชน       โสตฺถึ นาวา นิวตฺตตูติ ฯ
     ตตฺถ ยโตติ ยโต ปฏฺฐาย อหํ อตฺตานํ สรามิ ยโต
ปฏฺฐาย จมฺหิ วิญฺญุตํ ปตฺโตติ อตฺโถ ฯ เอกปาณํปิ หึสิตุนฺติ
เอตฺถนฺตเร สญฺจิจฺจ เอกํ กุณฺฐกิปิลฺลิกปาณํปิ หึสิตุํ นาภิชานามิ ฯ
เทสนามตฺตเมเวตํ ฯ โพธิสตฺโต ปน ติณสลากํปิ อุปาทาย
อญฺญสฺส สนฺตกํ น คหิตปุพฺพํ โลภวเสน ปรทารํ น โอโลกิตปุพฺพํ
มุสา น ภาสิตปุพฺพา ติณคฺเคนาปิ มชฺชํ น ปีตปุพฺพนฺติ เอวํ
ปญฺจ สีลวเสน สจฺจกิริยํ อกาสิ ฯ กตฺวา จ ปน ปุณฺณปาติยา
อุทกํ นาวาย ธุเร อภิสิญฺจิ ฯ จตฺตาโร มาเส วิเทสํ ปกฺขนฺตา
นาวา นิวตฺติตฺวา อิทฺธิมา วิย สจฺจานุภาเวน เอกทิวเสเนว
ภรุกจฺฉปฏฺฏนํ อคมาสิ ฯ คนฺตฺวา จ ปน ถเล อฏฺฐอุสภมตฺตํ
ฐานํ ปกฺขนฺทิตฺวา นาวิกสฺส ฆรทฺวาเรเยว อฏฺฐาสิ ฯ มหาสตฺโต
เตสํ พาณิชานํ สุวณฺณรชฏมณิปวาลวชิรานิ ภาเชตฺวา อทาสิ ฯ
เอตฺตเกหิ โว รตเนหิ อลํ มา ปุน สมุทฺทํ ปวิสถาติ เตสํ
โอวาทํ ทตฺวา ยาวชีวํ ทานาทีนิ ปุญฺญานิ กตฺวา เทวปุรํ ปูเรสิ ฯ
     สตฺถา อิมํ ธมฺมเทสนํ อาหริตฺวา เอวํ ภิกฺขเว ปุพฺเพปิ
ตถาคโต มหาปญฺโญเยวาติ วตฺวา ชาตกํ สโมธาเนสิ ตทา
อนฺธปริสา พุทฺธปริสา อเหสุํ สุปารกปณฺฑิโต ปน อหเมวาติ ฯ
                    สุปารกชาตกํ นวมํ ฯ
                เอกาทสนิปาตวณฺณนา นิฏฺฐิตา ฯ
                 --------------------


             อรรถกถาภาษาบาลีอักษรไทย เล่มที่ ๔๐ หน้า ๖๖-๗๔. http://84000.org/tipitaka/atthapali/read_th.php?B=40&A=1327&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=40&A=1327&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=27&i=1588              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=6340              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=6533              The Pali Tipitaka in Roman Character :- http://84000.org/tipitaka/read/roman_read.php?B=27&A=6533              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]