![]() |
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
โสมทตฺตชาตกํ โย มํ ปุเร ปจฺจุเทตีติ อิทํ สตฺถา เชตวเน วิหรนฺโต อญฺญตรํ มหลฺลกํ อารพฺภ กเถสิ ฯ โส กิเรกํ สามเณรํ ปพฺพาเชสิ ฯ โส สามเณโร ตสฺส อุปการโก หุตฺวา ตถารูเปน โรเคน กาลมกาสิ ฯ มหลฺลโก ตสฺมึ กาลกเต โรทนฺโต ปริเทวนฺโต วิจรติ ฯ ตํ ทิสฺวา ภิกฺขู ธมฺมสภายํ กถํ สมุฏฺฐาเปสุํ อาวุโส อสุกมหลฺลโก สามเณรสฺส กาลกตกิริยาย โรทนฺโต ปริเทวนฺโต วิจรติ มรณานุสฺสติกมฺมฏฺฐาน- รหิโต มญฺเญติ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพเปส เอตสฺมึ มเต โรทติเยวาติ วตฺวา เตหิ ยาจิโต อตีตํ อาหริ อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต สกฺกตฺตํ กาเรสิ ฯ อเถโก กาสินิคมวาสี พฺราหฺมณมหาสาโล กาเม ปหาย หิมวนฺตํ ปวิสิตฺวา อิสิปพฺพชฺชํ ปพฺพชิตฺวา อุญฺฉาจริยาย วนมูลผลาหาโร วสิ ฯ เอกทิวสํ ผลาผลตฺถาย คโต เอกํ หตฺถิฉาปํ ทิสฺวา อตฺตโน อสฺสมปทํ เนตฺวา ปุตฺตฏฺฐาเน ฐเปตฺวา โสมทตฺโตติสฺส นามํ กตฺวา ติณปณฺณาทีนิ ขาทาเปนฺโต ปฏิชคฺคิ ฯ โส วยปฺปตฺโต มหาสรีโร หุตฺวา เอกทิวสํ พหุโคจรํ คเหตฺวา อชีรเกน ทุพฺพโล อโหสิ ฯ ตาปโส ตํ อสฺสมปเท กตฺวา ผลาผลตฺถาย คโต ฯ ตสฺมึ อนาคเตเยว หตฺถิโปตโก กาลมกาสิ ฯ ตาปโส ผลาผลํ คเหตฺวา อาคจฺฉนฺโต อญฺเญสุ ทิวเสสุ เม ปุตฺโต ปจฺจุคฺคมนํ กโรติ อชฺช น ทิสฺสติ กหํ นุ โข คโตติ ปริเทวนฺโต ปฐมํ คาถมาห โย มํ ปุเร ปจฺจุเทติ อรญฺเญ ทูรมายติ โส น ทิสฺสติ มาตงฺโค โสมทตฺโต กุหึ คโตติ ฯ ตตฺถ ปุเรติ อิโต ปุพฺเพ ฯ ปจฺจุเทตีติ ปจฺจุคฺคจฺฉติ ฯ อรญฺเญ ทูรนฺติ อิมสฺมึ นิมฺมนุสฺเส อรญฺเญ มํ ทูรํ ปจฺจุเทติ ฯ อายตีติ อายามสมฺปนฺโน ฯ เอวํ ปริเทวมาโน อาคนฺตฺวา ตํ จงฺกมโกฏิยํ ปติตํ ทิสฺวา คเล คเหตฺวา ปริเทวมาโน ทุติยํ คาถมาห อยํ วา โส มโต เสติ อลฺลปิตํว วิจฺฉิโต ภุมฺยา นิปติโต เสติ อมรา วต กุญฺชเรติ ฯ ตตฺถ อยํ วาติ วิภาวนตฺโถ วาสทฺโท ฯ อยเมว โส น อญฺโญติ ตํ วิภาเวนฺโต เอวมาห ฯ อลฺลปิตนฺติ มาลุวลตาย อคฺคปวาลํ ฯ วิจฺฉิโตติ วิจฺฉินฺโน คิมฺหกาเล มชฺฌนฺติกสมเย ตตฺตวาลิกปุลิเน นเขน ฉินฺทิตฺวา ปาติโต มาลุวลตาย องฺกุโร วิยาติ วุตฺตํ โหติ ฯ ภุมฺยาติ ภูมิยํ ฯ อมรา วตาติ อมโต วต ฯ อมรีติปิ ปาโฐ ฯ ตสฺมึ ขเณ สกฺโก โลกํ โอโลเกนฺโต ตํ ทิสฺวา อยํ ตาปโส ปุตฺตทารํ ปหาย ปพฺพชิโต อิทานิ หตฺถิโปตเก ปุตฺตสญฺญํ กตฺวา ปริเทวติ สํเวเชตฺวา นํ สตึ ปฏิลภาเปสฺสามีติ ตสฺส อสฺสมปทํ อาคนฺตฺวา อากาเส ฐิโตว ตติยํ คาถมาห อนาคาริยุเปตสฺส วิปฺปมุตฺตสฺส เต สโต สมณสฺส น ตํ สาธุ ยํ เปตมนุโสจสีติ ฯ ตสฺส วจนํ สุตฺวา ตาปโส จตุตฺถํ คาถมาห สํวาเสน หเว สกฺก มนุสฺสสฺส มิคสฺส วา หทเย ชายตี เปมํ น ตํ สกฺกา อโสจิตุนฺติ ฯ ตตฺถ มิคสฺส วาติ อิมสฺมึ ฐาเน สพฺเพ ติรจฺฉานา มิคาติ วุตฺตา ฯ ตนฺติ ปิยายิตํ สตฺตํ ฯ อถ นํ โอวทนฺโต สกฺโก เทฺว คาถา อภาสิ มตํ มริสฺสํ โรทนฺติ เย รุทนฺติ ลปนฺติ จ ตสฺมา ตฺวํ อิสิ มา โรทิ โรทิตํ โมฆมาหุ สนฺโต ฯ กนฺทิเตน หเว พฺรหฺเม มโต เปโต สมุฏฺฐเห สพฺเพ สงฺคมฺม โรทาม อญฺญมญฺญสฺส ญาตเกติ ฯ ตตฺถ เย รุทนฺติ ลปนฺติ จาติ พฺราหฺมณ เย สตฺตา โรทนฺติ ปริเทวนฺติ จ สพฺเพ เต มตํว โย จ มริสฺสติ ตํ โรทนฺติ เตสํ เอวํ โรทนฺตานํ อสฺสุสุกฺขนกาโล นตฺถิ ตสฺมา ตฺวํ อิสิ มา โรทิ ฯ กึการณา ฯ โรทิตํ โมฆมาหุ สนฺโตติ ปณฺฑิตา หิ โรทิตํ นิปฺผลนฺติ วทนฺติ ฯ มโต เปโตติ ยทิ เอส เปโตติ สงฺขฺยํ คโต มโต โรทิเตน สมุฏฺฐเหยฺย ฯ เอวํ สนฺเต สพฺเพปิ มยํ สมาคนฺตฺวา อญฺญมญฺญสฺส ญาตเก โรทาม กึ นิกฺขมา อจฺฉามาติ ฯ ตาปโส สกฺกสฺส วจนํ สุตฺวา สตึ ปฏิลภิตฺวา วิคตโสโก อสฺสูนิ ปุญฺฉิตฺวา สกฺกสฺส ถุติวเสน เสสคาถา อภาสิ อาทิตฺตํ วต มํ สนฺตํ ฆฏสิตฺตํว ปาวกํ วารินา วิย โอสิญฺจิ สพฺพํ นิพฺพาปเย ทรํ ฯ อพฺพูฬฺหํ วต เม สลฺลํ โสกํ หทยนิสฺสิตํ โย เม โสกปเรตสฺส ปุตฺตโสกํ อปานุทิ ฯ โสหํ อพฺพูฬฺหสลฺโลสฺมิ วีตโสโก อนาวิโล น โสจามิ น โรทามิ ตว สุตฺวาน วาสวาติ ฯ ตา เหฏฺฐา วุตฺตตฺถาเยว ฯ เอวํ ตาปสํ สกฺโก โอวทิตฺวา สกฏฺฐานเมว คโต ฯ สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ตทา หตฺถิโปตโก สามเณโร อโหสิ ตาปโส มหลฺลโก สกฺโก ปน อหเมวาติ ฯ โสมทตฺตชาตกํ ปญฺจมํ ฯอรรถกถาภาษาบาลีอักษรไทย เล่มที่ ๓๙ หน้า ๒๑๓-๒๑๗. http://84000.org/tipitaka/atthapali/read_th.php?B=39&A=4285&modeTY=2 The Pali Atthakatha in Roman :- http://84000.org/tipitaka/atthapali/read_rm.php?B=39&A=4285&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=27&i=1072 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=4618 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=4647 The Pali Tipitaka in Roman Character :- http://84000.org/tipitaka/read/roman_read.php?B=27&A=4647 สารบัญพระไตรปิฎกเล่มที่ ๒๗ http://84000.org/tipitaka/read/?index_27
![]() ![]() ![]() ![]() ![]() ![]() ![]() ![]() ![]() ![]() |
![]() |
บันทึก ๒๖ มกราคม พ.ศ. ๒๕๖๑.
การแสดงผลนี้อ้างอิงข้อมูลจากอรรถกถาภาษาบาลีอักษรไทย.
หากพบข้อผิดพลาด กรุณาแจ้งได้ที่ [email protected]