ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๘ ภาษาบาลีอักษรไทย ชา.อ.๔ ติก-ปญฺจกนิปาต

                      ชรูทปานชาตกํ
     ชรูทปานํ ขณมานาติ อิทํ สตฺถา เชตวเน วิหรนฺโต
สาวตฺถีวาสิโน วาณิเช อารพฺภ กเถสิ ฯ
     เต กิร สาวตฺถิยํ ภณฺฑํ คเหตฺวา สกฏานิ ปูเรตฺวา โวหารตฺถาย
คมนกาเล ตถาคตํ นิมนฺเตตฺวา มหาทานํ ทตฺวา สรณานิ
คเหตฺวา สีเลสุ ปติฏฺฐาย สตฺถารํ วนฺทิตฺวา มยํ ภนฺเต
โวหารตฺถาย ทีฆมคฺคํ คมิสฺสาม ภณฺฑํ วิสชฺเชตฺวา สิทฺธิยาตฺรา
โสตฺถินา ปจฺจาคนฺตฺวา ปุน ตุมฺเห วนฺทิสฺสามาติ วตฺวา มคฺคํ
ปฏิปชฺชึสุ ฯ เต กนฺตารมคฺเคสุ ปุราณํ อุทปานํ ทิสฺวา อิมสฺมึ
อุทปาเน ปานียํ นตฺถิ มยญฺจ ปิปาสิตา ขณิสฺสาม นนฺติ ขณนฺตา
ปฏิปาฏิยา พหุํ อยสํ โลหํ เวฬุริยํ ลภึสุ ฯ เต เตเนว สนฺตุฏฺฐา
หุตฺวา เตสํ รตนานํ สกฏานิ ปูเรตฺวา โสตฺถินา สาวตฺถิยํ
ปจฺจาคมึสุ ฯ เต อาภตธนํ ปฏิสาเมตฺวา สิทฺธิยาตฺรา ทานํ
ทสฺสามาติ ตถาคตํ นิมนฺเตตฺวา ทานํ ทตฺวา วนฺทิตฺวา เอกมนฺตํ นิสินฺนา
อตฺตโน ธนสฺส ลทฺธการณํ สตฺถุ อาโรเจสุํ ฯ สตฺถา ตุมฺเห
โข อุปาสกา เตน ธเนน สนฺตุฏฺฐา หุตฺวา ปมาณญฺญุตาย
ธนญฺจ ชีวิตญฺจ ลภิตฺถ โปราณกา ปน อสนฺตุฏฺฐาว อมตฺตญฺญุโน
ปณฺฑิตานํ วจนํ อกตฺวา ชีวิตกฺขยํ ปตฺตาติ วตฺวา เตหิ
ยาจิโต อตีตํ อาหริ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
พาราณสิยํ วาณิชกุเล นิพฺพตฺเตตฺวา วยปฺปตฺโต สตฺถวาหเชฏฺฐโก
อโหสิ ฯ โส พาราณสิยํ ภณฺฑํ คเหตฺวา สกฏานิ ปูเรตฺวา
พหู วาณิเช อาทาย ตเมว กนฺตารํ ปฏิปนฺโน ตเมว อุทปานํ
อทฺทส ฯ ตตฺถ เต วาณิชา ปานียํ ปิวิสฺสามาติ ตํ อุทปานํ
ขณนฺตา ปฏิปาฏิยา พหูนิ เวฬุริยาทีนิ ลภึสุ ฯ เต พหุมฺปิ รตนํ
ลภิตฺวา เตน อสนฺตุฏฺฐา อญฺญมฺปิ เอตฺถ อิโตปิ สุนฺทรตรํ
ภวิสฺสตีติ ภิยฺโยโส มตฺตาย ตํ ขณึสุเยว ฯ อถ เต โพธิสตฺโต
อาห โภ วาณิชา โลโภ นาเมส วินาสมูโล อมฺเหหิ พหุ
ธนํ ลทฺธํ เอตฺตเกน สนฺตุฏฐา โหถ มา จ อติกฺขณิตฺถาติ ฯ
เตน เต วาริยมานาปิ ขณึสุเยว ฯ โส จ อุทปาโน นาคปริคฺคหิโต ฯ
อถสฺส เหฏฺฐา วสนกนาคราชา อตฺตโน วิมาเน ภิชฺชนฺเต
เลฑฺฑูสุ จ ปํสูสุ จ โอปตฺตมาเนสุ กุทฺโธ หุตฺวา โพธิสตฺตํ
ฐเปตฺวา อนวเสเส สพฺเพปิ นาสิกวาเตน ปหริตฺวา ชีวิตกฺขยํ ปาเปตฺวา
นาคภวนา นิกฺขมฺม สกฏานิ โยชาเปตฺวา สตฺตรตนานํ ปูเรตฺวา
โพธิสตฺตํ สุขยานเก นิสีทาเปตฺวา นาคมาณวเกหิ สกฏานิ ปาชาเปนฺโต
โพธิสตฺตํ พาราณสึ เนตฺวา ฆรํ ปเวเสตฺวา ธนํ ปฏิสาเมตฺวา
อตฺตโน นาคภวนเมว คโต ฯ โพธิสตฺโต ตํ ธนํ วิสชฺเชตฺวา
สกลชมฺพูทีปํ อุนฺนงฺคลํ กตฺวา ทานํ ทตฺวา สีลํ สมาทิยิตฺวา
อุโปสถกมฺมํ กตฺวา ชีวิตปริโยสาเน สคฺคปทํ ปูเรสิ ฯ
     สตฺถา อิมํ ธมฺมเทสนํ อาหริตฺวา อภิสมฺพุทฺโธ หุตฺวา อิมา
คาถา อโวจ
       ชรูทปานํ ขณมานา         วาณิชา อุทกตฺถิกา
       อชฺฌคฺคํสุ อโยโลหํ         ติปุสีสญฺจ มาณโย
       รชฏํ ชาตรูปญฺจ           มุตฺตา เวฬุริยา พหู
       เต จ เตน อสนฺตุฏฺฐา      ภิยฺโย ภิยฺโย ขณึสุ เต
       ตตฺถปาสีวิโส โฆโร        เตชสี เตชสา หนิ
       ตสฺมา ขเณ นาติกฺขเณ      อติกฺขาตมฺหิ ปาปกํ
       ขณเนน ธนํ ลทฺธํ          อติกฺขาเตน นาสิตนฺติ ฯ
     ตตฺถ อยนฺติ กาฬโลหํ ฯ โลหนฺติ ตมฺพโลหํ ฯ มุตฺตาติ
มุตฺตาทโย ฯ เต จ เตน อสนฺตุฏฺฐาติ เต จ วาณิชา เตน
ธเนน อสนฺตุฏฺฐา ฯ เต ตตฺถาติ เต วาณิเช ตสฺมึ อุทกปาเน ฯ
เตชสีติ วิสเตเชน สมนฺนาคโต ฯ เตชสา หนีติ วิสเตเชน ฆาเตสิ ฯ
อติกฺขาเตน นาสิตนฺติ อติกฺขณเนน ตญฺจ ธนํ ชีวิตญฺจ นาสิตํ ฯ
     สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา
นาคราชา สารีปุตฺโต อโหสิ สตฺถวาหเชฏฺฐโก ปน อหเมวาติ ฯ
                    ชรูทปานชาตกํ ฉฏฺฐํ
                       --------


             อรรถกถาภาษาบาลีอักษรไทย เล่มที่ ๓๘ หน้า ๒๙-๓๒. http://84000.org/tipitaka/atthapali/read_th.php?B=38&A=602&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=38&A=602&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=27&i=367              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=2043              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=2029              The Pali Tipitaka in Roman Character :- http://84000.org/tipitaka/read/roman_read.php?B=27&A=2029              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]