บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
สีลวีมํสชาตกํ สีลํ กิเรว กลฺยาณนฺติ อิทํ สตฺถา เชตวเน วิหรนฺโต เอกํ สีลวีมํสกํ พฺราหฺมณํ อารพฺภ กเถสิ ฯ วตฺถุ ปน ปจฺจุปนฺนมฺปิ อตีตมฺปิ เหฏฺฐา เอกนิปาเต สีลวีมํสชาตเก วิตฺถาริตเมว ฯ อิธ ปน พาราณสิยํ พฺรหฺมทตฺเต รชฺชํ กาเรนฺเต ตสฺส ปุโรหิโต อตฺตโน สีลํ วีมํสิสฺสามีติ หิรญฺญผลกโต เทฺว ทิวเส เอเกกํ กหาปณํ คณฺหิ ฯ อถ นํ--------------------------------------------------------------------------------------------- หน้าที่ ๑๙๕.
ตติยทิวเส โจโรติ คเหตฺวา รญฺโญ สนฺติกํ นยึสุ ฯ โส อนฺตรามคฺเค อหิตุณฺฑิเก สปฺปํ กีฬายนฺเต อทฺทส ฯ อถ นํ ราชา ทิสฺวา กสฺมา เอวรูปํ อกาสีติ ปุจฺฉิ ฯ พฺราหฺมโณ อตฺตโน สีลํ วีมํสิตุกามตายาติ วตฺวา อิมํ คาถมาห สีลํ กิเรว กลฺยาณํ สีลํ โลเก อนุตฺตรํ ปสฺส โฆรวิโส นาโค สีลวาติ น หญฺญติ โสหํ สีลํ สมาทิสฺสํ โลเก อนุมตํ สิวํ อริยวุตฺติสมาจาโร เยน วุจฺจติ สีลวา ญาตีนญฺจ ปิโย โหติ มิตฺเตสุ จ วิโรจติ กายสฺส เภทา สุคตึ อุปปชฺชติ สีลวาติ ฯ ตตฺถ สีลนฺติ อาจาโร ฯ กิราติ อนุสฺสวนฏฺเฐ นิปาโต ฯ กลฺยาณนฺติ โสภนํ ฯ สีลํ กิเรว กลฺยาณนฺติ เอวํ ปณฺฑิตา วทนฺตีติ อตฺโถ ฯ ปสฺสาติ อตฺตานเมว วทติ ฯ น หญฺญตีติ ปรมฺปิ น วิเหเฐติ ปเรปิ น วิเหเฐยฺยาติ ๑- ฯ สมาทิสฺสนฺติ สมาทยิสฺสามิ ฯ อนุมตํ สิวนฺติ เขมํ นิพฺภยนฺติ เอวํ ปณฺฑิเตหิ สมฺปฏิจฺฉิตํ ฯ เยน วุจฺจตีติ เยน สีเลน สีลวา ปุริโส อริยานํ พุทฺธาทีนํ ปฏิปตฺตึ สมาจรนฺโต อริยวุตฺติสมาจาโรติ วุจฺจติ ตมหํ สมาทยิสฺสามีติ อตฺโถ ฯ วิโรจตีติ ปพฺพตมตฺถเก อคฺคิกฺขนฺโธ วิย วิโรจติ ฯ เอวํ โพธิสตฺโต ตีหิ คาถาหิ สีลสฺส วณฺณํ ปกาเสนฺโต รญฺโญ ธมฺมํ เทเสตฺวา มหาราช มม เคเห ปิตุ สนฺตกํ (๒)- อตฺตนา @เชิงอรรถ: ๑ ปเรน ปน น วิเหฐียติ ฯ ๒ มาตุ สนฺตกํ ฯ--------------------------------------------------------------------------------------------- หน้าที่ ๑๙๖.
อุปฺปาทิตํ ตยา ทินฺนญฺจ พหุ ธนํ อตฺถิ ปริยนฺโต น ปญฺญายติ อหํ ปน สีลํ วีมํสนฺโต หิรญฺญผลกโต กหาปเณ คณฺหึ อิทานิ มยา อิมสฺมึ โลเก ชาติโคตฺตกุลปฺปเทสานํ ลามกภาโว สีลสฺเสว จ เชฏฺฐกภาโว ญาโต อหํ ปพฺพชิสฺสามิ ปพฺพชฺชํ เม อนุชานาหีติ ปพฺพชฺชํ อนุชานาเปตฺวา รญฺญา ปุนปฺปุนํ ยาจิยมาโนปิ นิกฺขมฺม หิมวนฺตํ ปวิสิตฺวา อิสิปพฺพชฺชํ ปพฺพชิตฺวา อภิญฺญา จ สมาปตฺติโย จ นิพฺพตฺเตตฺวา พฺรหฺมโลกปรายโน อโหสิ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา สีลวีมํสโก ปุโรหิโต พฺราหฺมโณ อหเมวาติ ฯ สีลวีมํสชาตกํ ทสมํ อพฺภนฺตรวคฺโค จตุตฺโถ --------อรรถกถาภาษาบาลีอักษรไทย เล่มที่ ๓๘ หน้า ๑๙๔-๑๙๖. http://84000.org/tipitaka/atthapali/read_th.php?B=38&A=4056&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=38&A=4056&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=27&i=469 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=2463 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=2426 The Pali Tipitaka in Roman Character :- http://84000.org/tipitaka/read/roman_read.php?B=27&A=2426 สารบัญพระไตรปิฎกเล่มที่ ๒๗ http://84000.org/tipitaka/read/?index_27
|
บันทึก ๒๖ มกราคม พ.ศ. ๒๕๖๑.
การแสดงผลนี้อ้างอิงข้อมูลจากอรรถกถาภาษาบาลีอักษรไทย.
หากพบข้อผิดพลาด กรุณาแจ้งได้ที่ [email protected]