ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๒ ภาษาบาลีอักษรไทย เถร.อ.๑ (ปรมตฺถที.๑)

                  ๒๘๖. ๙. ภารทฺวาชตฺเถรคาถาวณฺณนา
      นทนฺติ เอวํ สปฺปญฺญาติ อายสฺมโต ภารทฺวาชตฺเถรสฺส คาถา. กา
อุปฺปตฺติ?
      อยมฺปิ ปุริมพุทฺเธสุ กตาธิกาโร ตตฺถ ตตฺถ ภเว ปุญฺญานิ อุปจินนฺโต
อิโต เอกตึเส กปฺเป กุลเคเห นิพฺพตฺติตฺวา วิญฺญุตํ ปตฺโต เอกทิวสํ สุมนํ นาม
ปจฺเจกพุทฺธํ ปิณฺฑาย จรนฺตํ ทิสฺวา ปสนฺนมานโส ปริปกฺกํ ๓- วลฺลิการผลํ อทาสิ.
โส เตน ปุญฺญกมฺเมน เทวมนุสฺเสสุ สํสรนฺโต อิมสฺมึ พุทฺธุปฺปาเท ราชคเห
พฺราหฺมณกุเล นิพฺพตฺติตฺวา โคตฺตนาเมน ภารทฺวาโชเตฺวว ปญฺญายิตฺถ. โส วยปฺปตฺโต
ฆราวาสํ วสนฺโต เอกปุตฺตํ ลภิ. ตสฺส "กณฺหทินฺโน"ติ ๔- นามํ อกาสิ.
ตสฺส วิญฺญุตํ ปตฺตกาเล "ตาต อสุกสฺส นาม อาจริยสฺส สนฺติเก สิปฺปํ สิกฺขิตฺวา
เอหี"ติ ตํ ตกฺกสิลํ เปเสสิ. โส คจฺฉนฺโต อนฺตรามคฺเค สตฺถุ สาวกํ อญฺญตรํ
มหาเถรํ กลฺยาณมิตฺตํ ลภิตฺวา ตสฺส สนฺติเก ธมฺมํ สุตฺวา ปฏิลทฺธสทฺโธ ปพฺพชิตฺวา
@เชิงอรรถ:  สี. ยสฺส    อิ. โส สทตฺโถ     สี. สุปริปกฺกํ     สี. กณฺหาทินฺโนติ
กตปุพฺพกิจฺโจ วิปสฺสนาย กมฺมํ กโรนฺโต น จิรสฺเสว อรหตฺตํ ปาปุณิ. เตน
วุตฺตํ อปทาเน ๑- :-
          "สุมโน นาม สมฺพุทฺโธ       ตกฺกรายํ วสี ตทา
           วลฺลิการผลํ คยฺห          สยมฺภุสฺส อทาสหํ.
           เอกตึเส อิโต กปฺเป       ยํ ผลํ อททึ ตทา
           ทุคฺคตึ นาภิชานามิ         ผลทานสฺสิทํ ผลํ.
           กิเลสา ฌาปิตา มยฺหํ ฯเปฯ  กตํ พุทฺธสฺส สาสนนฺ"ติ.
      อถสฺส ปิตา ภารทฺวาโช เวฬุวเน วิหรนฺตํ ภควนฺตํ อุปสงฺกมิตฺวา ธมฺมํ
สุตฺวา ปพฺพชิตฺวา น จิรสฺเสว อรหตฺตํ สจฺฉากาสิ. อถ ปุตฺโต สตฺถารํ วนฺทิตุํ
ราชคหํ อาคโต สตฺถุ สนฺติเก นิสินฺนํ ปิตรํ ทิสฺวา ตุฏฺฐจิตฺโต "ปิตาปิ โข
เม ปพฺพชิโต, กึ นุ โข เตน ๒- ปพฺพชฺชากิจฺจํ มตฺถกํ ปาปิตนฺ"ติ วีมํสนฺโต
ขีณาสวภาวํ ญตฺวา ตํ สีหนาทํ นทาเปตุกาโม "สาธุ โข ตุเมฺหหิ กตํ ปพฺพชนฺเตหิ,
ปพฺพชฺชากิจฺจํ ปน มตฺถกํ ๓- ปาปิตนฺ"ติ ปุจฺฉิ. ภารทฺวาโช ปุตฺตสฺส อธิคมํ
ทีเปนฺโต:-
    [๑๗๗] "นทนฺติ เอวํ สปฺปญฺญา       สีหาว คิริคพฺภเร
           วีรา ๔- วิชิตสงฺคามา      เชตฺวา มารํ สวาหนํ.
    [๑๗๘]  สตฺถา จ ปริจิณฺโณ เม      ธมฺโม สํโฆ จ ปูชิโต
           อหญฺจ วิตฺโต สุมโน        ปุตฺตํ ทิสฺวา อนาสวนฺ"ติ
คาถาทฺวยํ อภาสิ.
      ตตฺถ นทนฺตีติ ยถาภุจฺจคุณาภิพฺยาหารวเสน ๕- อภีตนาทํ นทนฺติ คชฺชนฺติ.
เอวนฺติ อิทานิ วตฺตพฺพาการทสฺสนํ. สปฺปญฺญาติ อคฺคมคฺคปญฺญาธิคเมน
@เชิงอรรถ:  ขุ.อป. ๓๓/๖๘/๙๕ วลฺลิการผลทายกตฺเถราปทาน (สฺยา)     ม. อเนน
@ อิ. กึ มตฺถกํ    ปาลิ. ธีรา    สี. ยถาภุจฺจพุทฺธคุณา.....
สพฺพปญฺญาธิคเมน สพฺพปญฺญาเวปุลฺลปฺปตฺตา. วีราติ จตุพฺพิธสมฺมปฺปธานวิริย-
สมฺปนฺนตาย วีรา, ตโตเอว อนวเสสสงฺกิเลสปกฺขนิมฺมถเนน สวาหนํ กิเลสมารํ
อภิสงฺขารมารํ เทวปุตฺตมารญฺจ เชตฺวา ๑- สพฺพโส วิชิตสงฺคามา นทนฺติ
สปฺปญฺญาติ สมฺพนฺโธ.
      เอวํ วิเชตพฺพวิชเยน สีหนาทํ ทสฺเสตฺวา อิทานิ อาราเธตพฺพสมาราธเนน
อิจฺฉิตพฺพสิทฺธิยา จ ตํ ทสฺเสตุํ "สตฺถา จ ปริจิณฺโณ เม"ติ ทุติยํ คาถมาห.
ตตฺถ สตฺถา จ ปริจิณฺโณ เมติ มม สตฺถา สมฺมาสมฺพุทฺโธ ยถานุสิฏฺฐํ
โอวาทานุสาสนีกรเณน ๒- มยา ปริจิณฺโณ ๓- อุปาสิโต, น ธมฺมาธิกรณํ วิโสสิโตติ
อธิปฺปาโย. ธมฺโม สํโฆ จ ปูชิโตติ นววิโธปิ โลกุตฺตรธมฺโม, ยถาปฏิปตฺติยาคต-
มคฺคานุปตฺติยา สีลทิฏฺฐิสามญฺญคมเนน อริยสํโฆ จ มยา ปูชิโต มานิโต. อหญฺจ
วิตฺโต สุมโน, ปุตฺตํ ทิสฺวา อนาสวนฺติ มม ปุตฺตํ อนาสวํ สพฺพโส ขีณาสวํ
ทิสฺวา ทสฺสนเหตุ อหมฺปิ วิตฺโต นิรามิสาย ปีติยา ตุฏฺโฐ, ตโตเยว นิรามิเสน
โสมนสฺเสน สุมโน ชาโตติ อตฺโถ.
                   ภารทฺวาชตฺเถรคาถาวณฺณนา นิฏฺฐิตา.
                      --------------------


             อรรถกถาภาษาบาลีอักษรไทย เล่มที่ ๓๒ หน้า ๔๖๕-๔๖๗. http://84000.org/tipitaka/atthapali/read_th.php?B=32&A=10412&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=32&A=10412&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=26&i=286              เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=5869              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=6018              The Pali Tipitaka in Roman Character :- http://84000.org/tipitaka/read/roman_read.php?B=26&A=6018              สารบัญพระไตรปิฎกเล่มที่ ๒๖ http://84000.org/tipitaka/read/?index_26

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]