ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓ ภาษาบาลีอักษรไทย วินย.อ. (สมนฺต.๓)

     {๙๗} น ภิกฺขเว ทาโสติ เอตฺถ จตฺตาโร ทาสา อนฺโตชาโต
ธนกฺกีโต กรมรานีโต สามํ ทาสพฺยํ อุปคโตติ ฯ ตตฺถ อนฺโต-
ชาโต นาม ชาติทาโส ฆรทาสิยา ปุตฺโต ฯ ธนกฺกีโต นาม
มาตาปิตูนํ สนฺติกา ปุตฺโต วา สามิกานํ สนฺติกา ทาโส วา
ธนํ ทตฺวา ทาสจาริตฺตํ อาโรเปตฺวา กีโต เอเต เทฺวปิ น
ปพฺพาเชตพฺพา ปพฺพาเชนฺเตน ตตฺถ ตตฺถ จาริตฺตวเสน อทาสํ กตฺวา
ปพฺพาเชตพฺพา ฯ กรมรานีโต นาม ติโรรฏฺฐวิโลปํ วา กตฺวา
อุปลาเปตฺวา วา ติโรรฏฺฐโต ภุชิสฺสมานุสกานิปิ อาหรนฺติ
อนฺโตรฏฺเฐเยว วา กตาปราธํ กญฺจิ คามํ ราชา วิลุมฺปถาติ อาณาเปติ
ตโต มานุสกานิปิ อาหรนฺติ ตตฺถ สพฺเพ ปุริสา ทาสา สพฺพา
อิตฺถิโย ทาสิโย เอวรูโป กรมรานีโต ทาโส ฯ เยหิ อานีโต
เตสํ สนฺติเก วสนฺโต วา พนฺธนาคาเร พนฺโธ วา ปุริเสหิ
รกฺขิยมาโน วา น ปพฺพาเชตพฺโพ ฯ ปลายิตฺวา ปน คโต
คตฏฺฐาเน ปพฺพาเชตพฺโพ ฯ รญฺญา ตุฏฺเฐน กรมรานีตเก มุญฺจถาติ
วตฺวา วา สพฺพสาธารเณน วา นเยน พนฺธโมกฺเข กเต
ปพฺพาเชตพฺโพว ฯ สามํ ทาสพฺยํ อุปคโต นาม ชีวิตเหตุ วา
อารกฺขเหตุ วา อหํ เต ทาโสติ สยเมว ทาสภาวํ อุปคโต ฯ
ราชูนํ หตฺถิอสฺสโคมหิสโคปกาทโย วิย ตาทิโส ทาโส น
ปพฺพาเชตพฺโพ ฯ รญฺโญ วณฺณทาสีนํ ปุตฺตา โหนฺติ อมจฺจปุตฺตสทิสา
เตปิ น ปพฺพาเชตพฺพาว ฯ ภุชิสฺสิตฺถิโย อสญฺญตา วณฺณทาสีหิ
สทฺธึ วิจรนฺติ ตาสํ  ปุตฺเต ปพฺพาเชตุํ วฏฺฏติ ฯ สเจ สยเมว
ปณฺณํ อาโรเปนฺติ น วฏฺฏติ ฯ ภทฺทิปุตฺตกคณาทีนํ ทาสาปิ
เตหิ อทินฺนา น ปพฺพาเชตพฺพา ฯ วิหาเรสุ ราชูหิ อารามิกทาสา
นาม ทินฺนา โหนฺติ เตปิ ปพฺพาเชตุํ น วฏฺฏติ ฯ ภุชิสฺเส กตฺวา
ปน ปพฺพาเชตุํ วฏฺฏติ ฯ มหาปจฺจริยํ อนฺโตชาตธนกฺกีตเก อาเนตฺวา
ภิกฺขุสงฺฆสฺส อารามิเก เทมาติ เทนฺติ ตกฺกํ สีเส อาสิตฺตกสทิสาว
โหนฺติ ปพฺพาเชตุํ วฏฺฏตีติ วุตฺตํ ฯ กุรุนฺทิยมฺปน อารามิกํ
เทมาติ กปฺปิยโวหาเรน เทนฺติ เยนเกนจิ โวหาเรน ทินฺโน โหตุ
เนว ปพฺพาเชตพฺโพติ วุตฺตํ ฯ ทุคฺคตมนุสฺสา สงฺฆํ นิสฺสาย
ชีวิสฺสามาติ วิหาเร กปฺปิยการกา โหนฺติ เอเต ปพฺพาเชตุํ วฏฺฏติ ฯ
ยสฺส มาตาปิตโร ทาสา มาตาเอว วา ทาสี ปิตา อทาโส
ตํ ปพฺพาเชตุํ น วฏฺฏติ ฯ ภิกฺขุสฺส ญาตกา วา อุปฏฺฐากา วา
ทาสํ เทนฺติ อิมํ ปพฺพาเชถ ตุมฺหากํ เวยฺยาวจฺจํ กริสฺสตีติ
อตฺตโน วาสฺส ทาโส อตฺถิ ภุชิสฺโส กโตว ปพฺพาเชตพฺโพ ฯ
สามิกา ทาสํ เทนฺติ อิมํ ปพฺพาเชถ สเจ สาสเน อภิรมิสฺสติ
อทาโส วิพฺภมิสฺสติ เจ อมฺหากํ ทาโสว ภวิสฺสตีติ อยํ
ตาวกาลิโก นาม ตํ ปพฺพาเชตุํ น วฏฺฏตีติ กุรุนฺทิยํ วุตฺตํ ฯ
นิสฺสามิกทาโส โหติ โสปิ ภุชิสฺโส กโตว ปพฺพาเชตพฺโพ ฯ
อชานนฺโต ปพฺพาเชตฺวา วา อุปสมฺปาเทตฺวา วา ปจฺฉา ชานาติ
ภุชิสฺสํ กาตุเมว วฏฺฏติ ฯ อิมสฺส จ อตฺถสฺส ปกาสนตฺถํ อิทํ วตฺถุํ
วทนฺติ เอกา กิร กุลทาสี เอเกน สทฺธึ อนุราธปุรา ปลายิตฺวา
โรหเณ วสมานา ปุตฺตํ ปฏิลภิ ฯ โส ปพฺพชิตฺวา อุปสมฺปนฺนกาเล
ลชฺชี กุกฺกุจฺจโก อโหสิ ฯ อเถกทิวสํ มาตรํ ปุจฺฉิ กึ
อุปาสิเก ตุมฺหากํ ภาตา วา ภคินี วา นตฺถิ น กญฺจิ ญาตกํ
ปสฺสามีติ ฯ ตาต อหํ อนุราธปุเร กุลทาสี ตว ปิตรา สทฺธึ
ปลายิตฺวา อิธ วสามีติ ฯ สีลวา ภิกฺขุ อสุทฺธา กิร เม
ปพฺพชฺชาติ สํเวคํ ลภิตฺวา มาตรํ ตสฺส กุลสฺส นามโคตฺตํ ปุจฺฉิตฺวา
อนุราธปุรํ อาคมฺม ตสฺส กุลสฺส ฆรทฺวาเร อฏฺฐาสิ ฯ อติจฺฉถ
ภนฺเตติ วุตฺโตปิ นาติกฺกมิ ฯ เต อาคนฺตฺวา กึ ภนฺเตติ ปุจฺฉึสุ ฯ
ตุมฺหากํ อิตฺถนฺนามา ทาสี ปลาตา อตฺถีติ ฯ อตฺถิ ภนฺเตติ ฯ
อหํ ตสฺสา ปุตฺโต สเจ มํ ตุมฺเห อนุชานาถ ปพฺพชฺชํ ลภามิ
ตุมฺเห มยฺหํ สามิกาติ ฯ เต หฏฺฐตุฏฺฐา หุตฺวา สุทฺธา ภนฺเต
ตุมฺหากํ ปพฺพชฺชาติ ตํ ภุชิสฺสํ กตฺวา มหาวิหาเร วสาเปสุํ จตูหิ
ปจฺจเยหิ ปฏิชคฺคนฺตา ฯ เถโร ตํ กุลํ นิสฺสาย วสมาโนเยว
อรหตฺตํ ปาปุณีติ ฯ
                   ทาสวตฺถุกถา นิฏฺฐิตา ฯ


             อรรถกถาภาษาบาลีอักษรไทย เล่มที่ ๓ หน้า ๖๖-๖๙. http://84000.org/tipitaka/atthapali/read_th.php?B=3&A=1380&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=3&A=1380&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=4&i=109              เนื้อความพระไตรปิฎกฉบับหลวง :- http://84000.org/tipitaka/read/r.php?B=4&A=3032              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=4&A=3196              The Pali Tipitaka in Roman Character :- http://84000.org/tipitaka/read/roman_read.php?B=4&A=3196              สารบัญพระไตรปิฎกเล่มที่ ๔ http://84000.org/tipitaka/read/?index_4

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]