ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๑๔ ภาษาบาลีอักษรไทย องฺ.อ. (มโนรถ.๑)

หน้าที่ ๖๖.

๗. วิริยารมฺภาทิวคฺควณฺณนา [๖๑] สตฺตมสฺส ปฐเม วิริยารมฺโภติ จตุกิจฺจสฺส สมฺมปฺปธานวิริยสฺส อารมฺโภ, ปคฺคหิตปริปุณฺณวิริยตาติ ๑- อตฺโถ. [๖๒] ทุติเย มหิจฺฉตาติ มหาโลโภ. ยํ สนฺธาย วุตฺตํ:- "ตตฺถ กตมา มหิจฺฉตา? อิตรีตเรหิ จีวรปิณฺฑปาตเสนาสน- คิลานปจฺจยเภสชฺชปริกฺขาเรหิ ปญฺจหิ วา กามคุเณหิ อสนฺตุฏฺฐสฺส ภิยฺโยกมฺยตา, ยา เอวรูปา อิจฺฉา อิจฺฉาคตา มหิจฺฉตา ราโค สาราโค จิตฺตสฺส สาราโค. อยํ วุจฺจติ มหิจฺฉตา"ติ. ๒- [๖๓] ตติเย อปฺปิจฺฉตาติ อโลโภ. อปฺปิจฺฉสฺสาติ อนิจฺฉสฺส. เอตฺถ หิ พฺยญฺชนํ สาวเสสํ วิย, อตฺโถ ปน นิรวเสโส. น หิ อปฺปมตฺติกาย อิจฺฉาย อตฺถิภาเวน โส อปฺปิจฺโฉติ วุตฺโต, อิจฺฉาย ปน อภาเวน ปุนปฺปุนํ อาเสวิตสฺส อโลภสฺเสว ภาเวน อปฺปิจฺโฉติ วุตฺโต. อปิเจตฺถ อตฺริจฺฉตา ปาปิจฺฉตา มหิจฺฉตา อปฺปิจฺฉตาติ อยํ เภโท เวทิตพฺโพ. ตตฺถ สกลาเภ อติตฺตสฺส ปรลาเภ ปตฺถนา อตฺริจฺฉตา นาม, ตาย สมนฺนาคตสฺส เอกภาชเน ปกฺกปูเวปิ อตฺตโน ปตฺเต ปกฺขิตฺเต ๓- น สุปกฺโก วิย ขุทฺทโก วิย จ ขายติ, เสฺวว ปรสฺส ปตฺเต ปกฺขิตฺโต สุปกฺโก วิย มหนฺโต วิย จ ขายติ. อสนฺตคุณปกาสนตา ๔- ปน ปฏิคฺคหเณ จ อมตฺตญฺญุตา ปาปิจฺฉตา นาม, สาปิ "อิเธกจฺโจ อสฺสทฺโธ สมาโน สทฺโธติ มํ ชโน ชานาตู"ติอาทินา ๕- นเยน อภิธมฺเม อาคตาเยว, ตาย สมนฺนาคโต ปุคฺคโล โกหญฺเญ ปติฏฺฐาติ. สนฺตคุณปกาสนตา @เชิงอรรถ: ฉ.ม.,อิ. อารทฺธปคฺคหิต.... อภิ.วิ. ๓๕/๘๕๐,๘๕๑/๔๒๘ ขุทฺทกวตฺถุวิภงฺค @ ฉ.ม.,อิ. ปติเต ฉ.ม.,อิ. อสนฺตคุณสมฺภาวนตา @ อภิ.วิ. ๓๕/๘๕๑/๔๒๘ ขุทฺทกวตฺถุวิภงฺค

--------------------------------------------------------------------------------------------- หน้าที่ ๖๗.

ปน ปฏิคฺคหเณ จ อมตฺตญฺญุตา มหิจฺฉตา นาม, สาปิ "อิเธกจฺโจ สทฺโธ สมาโน สทฺโธติ มํ ชโน ชานาตูติ อิจฺฉติ, สีลวา สมาโน สีลวาติ มํ ชโน ชานาตู"ติ ๑- อิมินา นเยน อาคตาเยว. ตาย สมนฺนาคโต ปุคฺคโล ทุสฺสนฺตปฺปิโย ๒- โหติ, วิชาตมาตาปิสฺส จิตฺตํ คเหตุํ น สกฺโกติ. เตเนตํ วุจฺจติ:- "อคฺคิกฺขนฺโธ สมุทฺโท จ มหิจฺโฉ จาปิ ปุคฺคโล สกเฏน ปจฺจเย เทนฺเต ๓- ตโยเปเต อตปฺปิยา"ติ. ๔- สนฺตคุณนิคุหนตา ปน ปฏิคฺคหเณ จ มตฺตญฺญุตา อปฺปิจฺฉตา นาม, ตาย สมนฺนาคโต ปุคฺคโล อตฺตนิ วิชฺชมานํปิ คุณํ ปฏิจฺฉาเทตุกามตาย สทฺโธ สมาโน "สทฺโธติ มํ ชโน ชานาตู"ติ น อิจฺฉติ. สีลวา, ปวิวิตฺโต, พหุสฺสุโต, อารทฺธวิริโย, สมาธิสมฺปนฺโน, ปญฺญวา, ขีณาสโว สมาโน "ขีณาสโวติ มํ ชโน ชานาตู"ติ น อิจฺฉติ เสยฺยถาปิ มชฺฌนฺติกตฺเถโร. เถโร กิร มหาขีณาสโว อโหสิ, ปตฺตจีวรํ ปนสฺส ปาทมตฺตเมว อคฺฆติ. โส อโสกสฺส ธมฺมรญฺโญ วิหารมหทิวเส สํฆตฺเถโร อโหสิ, อถสฺส อติลูขภาวํ ทิสฺวา มนุสฺสา "ภนฺเต โถกํ พหิ โหถา"ติ อาหํสุ. เถโร "มาทิเส ขีณาสเว รญฺโญ สงฺคหํ อกโรนฺเต อญฺโญ โก กริสฺสตี"ติ ปฐวิยํ นิมุชฺชิตฺวา สํฆตฺเถรสฺส อุกฺขิปิตํ ปิณฺฑํ ๕- คณฺหนฺโตเยว อุมฺมุชฺชิ. เอวํ ขีณาสโว สมาโน "ขีณาสโวติ มํ ชโน ชานาตู"ติ น อิจฺฉติ. เอวํ อปฺปิจฺโฉ จ ปน ภิกฺขุ อนุปฺปนฺนลาภํ อุปฺปาเทติ, อุปฺปนฺนํ วา ๖- ถาวรํ กโรติ, ทายกานํ จิตฺตํ อาราเธติ. ยถา ยถา หิ โส อตฺตโน อปฺปิจฺฉตาย อปฺปํ คณฺหาติ, ตถา ตถา ตสฺส วตฺเต ปสนฺนา มนุสฺสา พหู เทนฺติ. @เชิงอรรถ: อภิ.วิ. ๓๕/๘๕๑/๔๒๘ ขุทฺทกวตฺถุวิภงฺค ฉ.ม. ทุสฺสนฺตปฺปโย, ก. ทุตฺตปฺปิโย, @ป.สู. ๒/๑๘๖ (สฺยา) พหุเก ฯเปฯ น ปูรเย, สมฺโมหวิโนทนี @๖๑๘ ขุทฺทกวตฺถุวิภงฺควณฺณนา (สฺยา) ป.สู. ๒/๑๘๖ รถวินีตสุตฺตวณฺณนา (สฺยา) @ ฉ.ม. อุกฺขิตฺตปิณฺฑํ ฉ.ม.,อิ. วา-สทฺโท น ทิสฺสติ

--------------------------------------------------------------------------------------------- หน้าที่ ๖๘.

อปโรปิ จตุพฺพิโธ อปฺปิจฺโฉ ปจฺจยอปฺปิจฺโฉ ธุตงฺคอปฺปิจฺโฉ ปริยตฺติอปฺปิจฺโฉ อธิคมอปฺปิจฺโฉติ. ตตฺถ จตูสุ ปจฺจเยสุ อปฺปิจฺโฉ ปจฺจยอปฺปิจฺโฉ นาม. โส ทายกสฺส วสํ ชานาติ, เทยฺยธมฺมสฺส วสํ ชานาติ, อตฺตโน ถามํ ชานาติ. ยทิ หิ เทยฺยธมฺมา พหู โหนฺติ, ทายโก อปฺปํ ๑- ทาตุกาโม, ทายกสฺส วเสน อปฺปํ คณฺหาติ. เทยฺยธมฺโม อปฺโป, ทายโก พหุํ ทาตุกาโม, เทยฺยธมฺมสฺส วเสน อปฺปํ คณฺหาติ. เทยฺยธมฺโมปิ พหุ, ทายโกปิ พหุํ ทาตุกาโม, อตฺตโน ถามํ ญตฺวา ปมาณเมว คณฺหาติ. ธุตงฺคสมาทานสฺส อตฺตนิ อตฺถิภาวํ น ชานาเปตุกาโม ธุตงฺคอปฺปิจฺโฉ นาม. ตสฺส วิภาวนตฺถํ อิมานิ วตฺถูนิ:- โสสานิกมหากุมารกสฺสปตฺเถโร ๒- กิร สฏฺฐิวสฺสานิ สุสาเน วสิ, อญฺโญ เอกภิกฺขุปิ น อญฺญาสิ. เตเนวาห:- "สุสาเน สฏฺฐิ วสฺสานิ อพฺโพกิณฺณํ วสามหํ ทุติโย มํ น ชาเนยฺย อโห โสสานิกุตฺตโม"ติ. เจติยปพฺพเต เทฺว ภาติกตฺเถรา วสึสุ. กนิฏฺโฐ อุปฏฺฐาเกน เปสิเต อุจฺฉุขณฺฑิเก ๓- คเหตฺวา เชฏฺฐกสฺส สนฺติกํ อคมาสิ "ปริโภคํ ภนฺเต กโรถา"ติ. เถรสฺส จ ภตฺตกิจฺจํ กตฺวา มุขวิกฺขาลนกาโล อโหสิ. โส "อลํ อาวุโส"ติ อาห. กจฺจิ ภนฺเต เอกาสนิกตฺถาติ อาห. อาหร อาวุโส อุจฺฉุขณฺฑิเกติ ปณฺณาส วสฺสานิ เอกาสนิโก สมาโนปิ ธุตงฺคํ นิคุหมาโน ปริโภคํ กตฺวา มุขํ วิกฺขาเลตฺวา ปุน ธุตงฺคํ อธิฏฺฐาย คโต. โย ปน สาเกตติสฺสตฺเถโร วิย พหุสฺสุตภาวํ ชานาเปตุํ น อิจฺฉติ, อยํ ปริยตฺติอปฺปิจฺโฉ นาม. เถโร กิร "ขโณ นตฺถีติ อุทฺเทสปริปุจฺฉาสุ โอกาสํ อกโรนฺโต กทา มรณกฺขณํ ภนฺเต ลภิสฺสถา"ติ โจทิโต คณํ วิสฺสชฺเชตฺวา @เชิงอรรถ: ฉ.ม. อปฺปมตฺตกํ @ ฉ.ม.,อิ. โสสานิกมหากุมารตฺเถโร, ป.สู. ๒/๑๘๗, โสสานิกมหาสุมตฺเถโร (สฺยา) @อพฺโพกิณฺโณ, ป.สู. ๒/๑๘๗ ฉ.ม. เปสิตํ อุจฺฉุขณฺฑิกํ, อิ. เปสิตา @อุจฺฉุขณฺฑิกา, สี. อุจฺฉุภณฺฑิกํ

--------------------------------------------------------------------------------------------- หน้าที่ ๖๙.

กณิการวาลิกสมุทฺทวิหารํ คโต. ตตฺถ อนฺโตวสฺสํ เถรนวมชฺฌิมานํ อุปกาโร หุตฺวา มหาปวารณาย อุโปสถทิวเส ธมฺมกถาย ชนปทํ โขเภตฺวา คโต. โย ปน โสตาปนฺนาทีสุ อญฺญตโร หุตฺวา โสตาปนฺนาทิภาวํ ชานาเปตุํ น อิจฺฉติ, อยํ อธิคมอปฺปิจฺโฉ นาม ตโย กุลปุตฺตา ๑- วิย ฆฏีการภุมฺภกาโร ๒- วิย จ. อิมสฺมึ ปนตฺเถ ลทฺธาเสวเนน พลวอโลเภน สมนฺนาคโต เสโขปิ ปุถุชฺชโนปิ อปฺปิจฺโฉติ เวทิตพฺโพ. [๖๔] จตุตฺเถ อสนฺตุฏฺฐิตาติ อสนฺตุฏฺเฐ ปุคฺคเล เสวนฺตสฺส ภชนฺตสฺส ปยิรุปาสนฺตสฺส อุปฺปนฺโน อสนฺโตสสงฺขาโต โลโภ. [๖๕] ปญฺจเม สนฺตุฏฺฐิตาติ สนฺตุฏฺเฐ ปุคฺคเล เสวนฺตสฺส ภชนฺตสฺส ปยิรุปาสนฺตสฺส อุปฺปนฺโน อโลภสงฺขาโต สนฺโตโส. สนฺตุฏฺฐสฺสาติ อิตรีตรปจฺจยสนฺโตเสน สมนฺนาคตสฺส. โส ปเนส สนฺโตโส ทฺวาทสวิโธ โหติ. เสยฺยถีทํ? จีวเร ยถาลาภสนฺโตโส ยถาพลสนฺโตโส ยถาสารุปฺปสนฺโตโสติ ติวิโธ. เอวํ ปิณฺฑปาตาทีสุ. ตสฺสายํ ปเภทสํวณฺณนา:- อิธ ภิกฺขุ จีวรํ ลภติ สุนฺทรํ วา อสุนฺทรํ วา. โส เตเนว ยาเปติ อญฺญํ น ปตฺเถติ, ๓- ลภนฺโตปิ น คณฺหาติ. อยมสฺส จีวเร ยถาลาภสนฺโตโส. อปโร ปน ๔- ปกติทุพฺพโล วา โหติ อาพาธชราภิภูโต วา, ครุจีวรํ ปารุปนฺโต ๕- กิลมติ. โส สภาเคน ภิกฺขุนา สทฺธึ ตํ ปริวตฺเตตฺวา ลหุเกน ยาเปนฺโตปิ สนฺตุฏฺโฐว โหติ. อยมสฺส จีวเร ยถาพลสนฺโตโส. อปโร ปณีตปจฺจยลาภี โหติ. โสมารปฏฺฏจีวราทีนํ ๖- อญฺญตรํ มหคฺฆํ ลภิตฺวา พหูนิ วา ปน จีวรานิ ลภิตฺวา `อิทํ เถรานํ จิรปพฺพชิตานํ, อิทํ พหุสฺสุตานํ อนุรูปํ, @เชิงอรรถ: ม.มู. ๑๒/๓๒๕/๒๘๙ จูฬโคสิงฺคสุตฺต ม.ม. ๑๓/๒๘๒/๒๕๘ ฆฏิการสุตฺต @ ก.ปฏฺเฐติ. เอวมุปริปิ ฉ.ม. อถ ปน ม. ธาเรนฺโต ฉ.ม.,อิ. โส @ปฏฺฏจีวราทีนํ

--------------------------------------------------------------------------------------------- หน้าที่ ๗๐.

อิทํ คิลานานํ, อิทํ อปฺปลาภีนํ ๑- โหตู"ติ ทตฺวา เตสํ ปุราณจีวรํ วา สงฺการกูฏาทิโต วา อาปณนฺตริกานิ ๒- อุจฺจินิตฺวา เตหิ สงฺฆาฏึ กตฺวา ธาเรนฺโตปิ สนฺตุฏฺโฐว โหติ. อยมสฺส จีวเร ยถาสารุปฺปสนฺโตโส. อิธ ปน ภิกฺขุ ปิณฺฑปาตํ ลภติ ลูขํ วา ปณีตํ วา, โส เตเนว ยาเปติ, อญฺญํ น ปตฺเถติ, ลภนฺโตปิ น คณฺหาติ. อยมสฺส ปิณฺฑปาเต ยถาลาภสนฺโตโส. โย ปน อตฺตโน ปกติวิรุทฺธํ วา พฺยาธิวิรุทฺธํ วา ปิณฺฑปาตํ ลภติ, เยน ๓- ปริภุตฺเตน อผาสุ โหติ, โส สภาคสฺส ภิกฺขุโน ตํ ทตฺวา ตสฺส หตฺถโต สปฺปายโภชนํ ภุญฺชิตฺวา สมณธมฺมํ กโรนฺโตปิ สนฺตุฏฺโฐว โหติ. อยมสฺส ปิณฺฑปาเต ยถาพลสนฺโตโส. อปโร พหุํ ปณีตปิณฺฑปาตํ ลภติ. โส ตํ จีวรํ วิย จิรปพฺพชิตพหุสฺสุตอปฺปลาภคิลานานํ ๔- ทตฺวา เตสํ วา สนฺติกา ๕- ปิณฺฑาย วา จริตฺวา มิสฺสกาหารํ ภุญฺชนฺโตปิ สนฺตุฏฺโฐว โหติ. อยมสฺส ปิณฺฑปาเต ยถาสารุปฺปสนฺโตโส. อิธ ปน ภิกฺขุ เสนาสนํ ลภติ มนาปํ วา อมนาปํ วา, โส เตน เนว โสมนสฺสํ น ปฏิฆํ ๖- อุปฺปาเทติ, อนฺตมโส ติณสนฺถารเกนาปิ ยถาลทฺเธเนว ตุสฺสติ. อยมสฺส เสนาสเน ยถาลาภสนฺโตโส. โย ปน อตฺตโน ปกติวิรุทฺธํ วา พฺยาธิวิรุทฺธํ วา เสนาสนํ ลภติ, ยตฺถสฺส วสโต อผาสุ โหติ, โส ตํ สภาคสฺส ภิกฺขุโน ทตฺวา ตสฺส สนฺตเก สปฺปายเสนาสเน วสนฺโตปิ สนฺตุฏฺโฐว โหติ. อยมสฺส เสนาสเน ยถาพลสนฺโตโส. อปโร มหาปุญฺโญ เลณมณฺฑปกูฏาคาราทีนิ พหูนิ ปณีตเสนาสนานิ ลภติ. โส ตานิปิ จีวรานิ ๗- วิย จิรปพฺพชิตพหุสฺสุตอปฺปลาภคิลานานํ ทตฺวา ยตฺถ กตฺถจิ วสนฺโตปิ สนฺตุฏฺโฐว โหติ. อยมสฺส เสนาสเน ยถาสารุปฺปสนฺโตโส. โยปิ @เชิงอรรถ: ฉ.ม.,อิ. อปฺปลาภานํ ฉ.ม.,อิ. นนฺตกานิ ฉ.ม.,อิ. เยนสฺส @ ฉ.ม. เถรจิร....เอวมุปริปิ ฉ.ม. เสสกํ, สี.,อิ. สนฺตกํ ฉ.ม. น โทมนสฺสํ @ ฉ.ม. ตานิ จีวราทีนิ

--------------------------------------------------------------------------------------------- หน้าที่ ๗๑.

"อุตฺตมเสนาสนํ นาม ปมาทฏฺฐานํ, ตตฺถ ๑- นิสินฺนสฺส ถีนมิทฺธํ โอกฺกมติ, นิทฺทาภิภูตสฺส ปน ปฏิพุชฺฌโต ปาปวิตกฺกา ปาตุภวนฺตี"ติ ปฏิสญฺจิกฺขิตฺวา ตาทิสํ เสนาสนํ ปตฺตมฺปิ น สมฺปฏิจฺฉติ, โส ตํ ปฏิกฺขิปิตฺวา อพฺโภกาสรุกฺขมูลาทีสุ วสนฺโตปิ สนฺตุฏฺโฐว โหติ. อยมสฺส เสนาสเน ยถาสารุปฺปสนฺโตโส. อิธ ปน ภิกฺขุ เภสชฺชํ ลภติ ลูขํ วา ปณีตํ วา, โส ยํ ลภติ, เตเนว ตุสฺสติ, อญฺญํ น ปตฺเถติ, ลภนฺโตปิ น คณฺหาติ. อยมสฺส คิลานปจฺจเย ยถาลาภสนฺโตโส. โย ปน เตเลน อตฺถิโก ผาณิตํ ลภติ, โส ตํ สภาคสฺส ภิกฺขุโน ทตฺวา ตสฺส หตฺถโต เตลํ คเหตฺวา อญฺญเทว วา ปริเยสิตฺวา เภสชฺชํ กโรนฺโตปิ สนฺตุฏฺโฐว โหติ. อยมสฺส ๒- คิลานปจฺจเย ยถาพลสนฺโตโส. อปโร มหาปุญฺโญ พหุํ เตลผาณิตาทิปณีตเภสชฺชํ ๓- ลภติ. โส ตํ จีวรํ วิย จิรปพฺพชิตพหุสฺสุตอปฺปลาภคิลานานํ ทตฺวา เตสํ อาภเตน เยน เกนจิ ยาเปนฺโตปิ สนฺตุฏฺโฐว โหติ. โย ปน เอกสฺมึ ภาชเน มุตฺตหรีฏกํ ฐเปตฺวา เอกสฺมึ จตุมธุรํ "คณฺหถ ภนฺเต ยทิจฺฉสี"ติ ๔- วุจฺจมาโน "สจสฺส เตสุ อญฺญตเรนปิ โรโค วูปสมฺมติ, อถ มุตฺตหรีฏกํ นาม พุทฺธาทีหิ วณฺณิตนฺ"ติ จตุมธุรํ ปฏิกฺขิปิตฺวา มุตฺตหรีฏเกน เภสชฺชํ กโรนฺโตปิ ปรมสนฺตุฏฺโฐว โหติ. อยมสฺส คิลานปจฺจเย ยถาสารุปฺปสนฺโตโส. อิเมสํ ปน ปจฺเจกปจฺจเยสุ ๕- ติณฺณํ ติณฺณํ สนฺโตสานํ ยถาสารุปฺปสนฺโตโสว อคฺโค. [๖๖-๖๗] ฉฏฺฐสตฺตเมสุ อโยนิโสมนสิการโยนิโสมนสิการา เหฏฺฐา วุตฺตลกฺขณาว. เสสเมตฺถ อุตฺตานตฺถเมวาติ. [๖๘] อฏฺฐเม อสมฺปชญฺญนฺติ อสมฺปชานภาโว, โมหสฺเสตํ อธิวจนํ. อสมฺปชานสฺสาติ อชานนฺตสฺส มูฬฺหสฺส. ๖- @เชิงอรรถ: อิ. ยตฺถ ฉ.ม. อยมฺปิสฺส @ ฉ.ม.,อิ. เตลมธุผาณิตาทิ.... ฉ.ม. ยทิจฺฉกนฺติ ม. อิเมสุ ปน จตูสุ @ปจฺจเยสุ ฉ. สมฺมุฏฺฐสฺส, ม. ปมุฏฺฐสฺส

--------------------------------------------------------------------------------------------- หน้าที่ ๗๒.

[๖๙] นวเม สมฺปชญฺญนฺติ สมฺปชานภาโว, ปญฺญาเยตํ นามํ. สมฺปชานสฺสาติ สมฺปชานนฺตสฺส. [๗๐] ทสเม ปาปมิตฺตตาติ ยสฺส ปาปา ลามกา มิตฺตา, โส ปาปมิตฺโต. ปาปมิตฺตสฺส ภาโว ปาปมิตฺตตา, เตนากาเรน ปวตฺตานํ จตุนฺนํ ขนฺธานเมเวตํ นามํ. วุตฺตมฺปิ เจตํ:- "ตตฺถ กตมา ปาปมิตฺตตา? เย เต ปุคฺคลา อสฺสทฺธา ทุสฺสีลา อปฺปสฺสุตา มจฺฉริโน ทุปฺปญฺญา. ยา เตสํ เสวนา นิเสวนา สํเสวนา ภชนา สมฺภชนา ภตฺติ สมฺภตฺติ สมฺปวงฺกตา. อยํ วุจฺจติ ปาปมิตฺตตา"ติ. ๑- วิริยารมฺภาทิวคฺควณฺณนา นิฏฺฐิตา. สตฺตโม วคฺโค. -------------------- @เชิงอรรถ: อภิ.วิ. ๓๕/๙๐๑/๔๓๙ ทุกนิทฺเทส

             อรรถกถาภาษาบาลีอักษรไทย เล่มที่ ๑๔ หน้า ๖๖-๗๒. http://84000.org/tipitaka/atthapali/read_th.php?B=14&A=1554&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=14&A=1554&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=20&i=62              เนื้อความพระไตรปิฎกฉบับหลวง :- http://84000.org/tipitaka/read/r.php?B=20&A=247              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=20&A=262              The Pali Tipitaka in Roman Character :- http://84000.org/tipitaka/read/roman_read.php?B=20&A=262              สารบัญพระไตรปิฎกเล่มที่ ๒๐ http://84000.org/tipitaka/read/?index_20

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]