ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๑๑ ภาษาบาลีอักษรไทย สํ.อ. (สารตฺถ.๑)

                         ๒. กินฺททสุตฺตวณฺณนา
        [๔๒] ทุติเย อนฺนโทติ ยสฺมา อติพลวาปิ เทฺว ตีณิ ภตฺตานิ อภุตฺวา
อุฏฺฐาตุํ น สกฺโกติ, ภุตฺวา ปน ทุพฺพโลปิ หุตฺวา พลสมฺปนฺโน โหติ, ตสฺมา
"อนฺนโท พลโท"ติ อาห. วตฺถโทติ ยสฺมา สุรูโปปิ ทุจฺโจโฬ วา อโจโฬ
วา วิรูโป โหติ โอหีฬิโต ทุทฺทสฺสิโก, วตฺถจฺฉนฺโน เทวปุตฺโต วิย โสภติ,
ตสฺมา "วตฺถโท โหติ วณฺณโท"ติ อาห. ยานโทติ หตฺถิยานาทีนํ ทายโก,
เตสุ ปน:-
                   น หตฺถิยานํ สมณสฺส กปฺปติ
                   น อสฺสยานํ น รเถน ยาตุํ
                   อิทญฺจ ยานํ สมณสฺส กปฺปติ
                   อุปาหนา รกฺขโต สีลกฺขนฺธนฺติ.
       ตสฺมา ฉตฺตุปาหนกตฺตรยฏฺฐิมญฺจปีฐานํ ทายโก โย จ มคฺคํ โสเธติ,
นิสฺเสณึ กโรติ, เสตุํ กโรติ, นาวํ ปฏิยาเทติ, สพฺโพปิ ยานโทว โหติ.
สุขโท โหตีติ ยานสุขาวหนโต สุขโท นาม โหติ. จกฺขุโทติ  อนฺธกาเร
จกฺขุมนฺตานํปิ รูปทสฺสนาภาวโต ทีปโท จกฺขุโท นาม โหติ, อนุรุทฺธตฺเถโร วิย
ทิพฺพจกฺขุสมฺปทํ ลภติ.
@เชิงอรรถ:  ฉ.ม. สุนีหตํ เอวมุปริปิ
สพฺพทโท โหตีติ สพฺเพสํเยว พลาทีนํ ทายโก โหติ. เทฺว ตโย คาเม
ปิณฺฑาย จริตฺวา กิญฺจิ อลทฺธา อาคตสฺสาปิ สีตลาย โปกฺขรณิยา นฺหายิตฺวา
ปติสฺสยํ ๑- ปวิสิตฺวา มุหุตฺตํ มญฺเจ นิปชฺชิตฺวา อุฏฺฐาย นิสินฺนสฺสาปิ กาเย
พลํ อาหริตฺวา ปกฺขิตฺตํ วิย โหติ. พหิ วิจรนฺตสฺส จ กาเย วณฺณายตนํ วาตาตเปหิ
ฌายติ, ปติสฺสยํ ปวิสิตฺวา ทฺวารมฺปิธาย มุหุตฺตํ นิปนฺนสฺส จ วิสภาคสนฺตติ
วูปสมติ, สภาคสนฺตติ โอกฺกมติ, วณฺณายตนํ อาหริตฺวา ปกฺขิตฺตํ วิย โหติ. พหิ
วิจรนฺตสฺส ปาเท กณฺฏโก วิชฺฌติ, ขาณุ ปหรติ, สิรึสปาทิปริสฺสโย ๒-  เจว
โจรภยํ จ อุปฺปชฺชติ, ปติสฺสยํ ปวิสิตฺวา ทฺวารมฺปิธาย นิปนฺนสฺส สพฺเพ เต
ปริสฺสยา น โหนฺติ, ธมฺมํ สชฺฌายนฺตสฺส ธมฺมปีติสุขํ, กมฺมฏฺฐานํ มนสิกโรนฺตสฺส
อุปสมสุขํ อุปฺปชฺชติ. ตถา พหิ วิจรนฺตสฺส จ เสทา มุญฺจนฺติ, อกฺขีนิ
ผนฺทนฺติ, เสนาสนํ ปวิสนกฺขเณ กูเป โอติณฺโณ วิย โหติ, มญฺจปีฐาทีนิ น
ปญฺญายนฺติ. มุหุตฺตํ นิสินฺนสฺส ปน อกฺขิปสาโท อาหริตฺวา ปกฺขิตฺโต วิย โหติ,
ทฺวารกวาฏวาตปานมญฺจปีฐาทีนิ ปญฺญายนฺติ. เตน วุตฺตํ "โส จ สพฺพทโท
โหติ, โย ททาติ อุปสฺสยนฺ"ติ.
     อมตํ ทโท จ โส โหตีติ ปณีตโภชนสฺส ปตฺตํ ปูเรนฺโต วิย
อมรทานํ นาม เทติ. โย ธมฺมมนุสาสตีติ โย ธมฺมํ อนุสาสติ, อฏฺฐกถํ
กเถติ, ปาลึ วาเจติ, ปุจฺฉิตปญฺหํ วิสฺสชฺเชติ, กมฺมฏฺฐานํ อาจิกฺขติ, ธมฺมสฺสวนํ
กโรติ, สพฺโพเปส ธมฺมมนุสาสติ นาม. สพฺพทานานญฺจ อิทํ ธมฺมทานเมว
อคฺคนฺติ เวทิตพฺพํ. วุตฺตมฺปิ เจตํ:-
                 "สพฺพทานํ ธมฺมทานํ ชินาติ
                  สพฺพรสํ ธมฺมรโส ชินาติ
                  สพฺพรตึ ธมฺมรติ ชินาติ
                  ตณฺหกฺขโย สพฺพทุกฺขํ ชินาตี"ติ ๓-
                        ทุติยํ.
@เชิงอรรถ:  ม. อุปสฺสยํ   ฉ.ม. สรีสปาทิปริสฺสโย   ขุ. ธมฺม. ๒๕/๓๕๔/๗๘ สกฺกเทวราชวตฺถุ


             อรรถกถาภาษาบาลีอักษรไทย เล่มที่ ๑๑ หน้า ๘๐-๘๑. http://84000.org/tipitaka/atthapali/read_th.php?B=11&A=2110&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=11&A=2110&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=15&i=137              เนื้อความพระไตรปิฎกฉบับหลวง :- http://84000.org/tipitaka/read/r.php?B=15&A=923              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=15&A=822              The Pali Tipitaka in Roman Character :- http://84000.org/tipitaka/read/roman_read.php?B=15&A=822              สารบัญพระไตรปิฎกเล่มที่ ๑๕ http://84000.org/tipitaka/read/?index_15

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]