AtthaPali Vol.27

5. Upaparikkhasuttavaṇṇanā [94] Pañcame tathā tathāti tena tena pakārena. Upaparikkheyyāti vīmaṃseyya parituleyya sammaseyya vā. Yathā yathāssa upaparikkhatoti yathā yathā assa bhikkhuno upaparikkhantassa. Bahiddhā cassa viññāṇaṃ avikkhittaṃ avisaṭanti bahiddhā rūpādiārammaṇe uppajjanakavikkhepābhāvato avikkhittaṃ samāhitaṃ. Tato eva avisaṭaṃ siyā. Idaṃ vuttaṃ hoti:- bhikkhave yena yena pakārena imassa āraddhavipassakassa bhikkhuno upaparikkhato saṅkhāre sammasantassa pubbe samāhitākārasallakkhaṇavasena samathanimittaṃ ^1- gahetvā sakkaccaṃ nirantaraṃ sammasanañāṇaṃ @Footnote: ¹ Ma. pavattacittaṃ

--------------------------------------------------------------------------------------------- page339.

Pavattentassa attano vipassanācittaṃ kammaṭṭhānato bahiddhā rūpādiārammaṇe uppajjanakaṃ na siyā, accāraddhavīriyatāya uddhaccapakkhiyaṃ na siyā, tena tena pakārena bhikkhu upaparikkheyya parituleyyāti. Ajjhattaṃ asaṇṭhitanti yasmā vīriye mandaṃ vahante samādhissa balavabhāvato kosajjābhibhavena ajjhattaṃ gocarajjhatta saṅkhāte kammaṭṭhānārammaṇe saṅkocavasena ṭhitattā saṇṭhitaṃ nāma hoti, vīriyasamatāya pana yojitāya asaṇṭhitaṃ hoti vīthiṃ paṭipannaṃ. Tasmā yathā yathāssa upaparikkhato viññāṇaṃ ajjhattaṃ asaṇṭhitaṃ assa vīthipaṭipannaṃ siyā, tathā tathā upaparikkheyya. Anupādāya na paritasseyyāti yathā yathāssa upaparikkhato "etaṃ mama, eso me attā"ti taṇhādiṭṭhiggāhavasena rūpādīsu kañci saṅkhāraṃ aggahetvā tato eva taṇhādiṭṭhiggāhavasena na paritasseyya, tathā tathā upaparikkheyyāti sambandho. Kathaṃ pana upaparikkhato tividhaṃ petaṃ siyāti? uddhaccapakkhiye ca kosajjapakkhiye ca Dhamme āvajjento ^1- vīriyasamataṃ yojetvā pubbeva vipassanūpakkilesehi cittaṃ visodhetvā yathā sammadeva vipasasanāñāṇaṃ vipassanāvīthiṃ paṭipajjati, tathā sammasato. Iti bhagavā catusaccakammaṭṭhānikassa bhikkhuno anukkamena paṭipadāñāṇadassana- visuddhiyā āraddhāya accāraddhavīriyaatisithilavīrīyavipassanūpakkilesehi cittassa visodhanūpāyaṃ dassetvā idāni tathā visodhite vipassanāñāṇe nacirasseva vipassanaṃ maggena ghaṭetvā sakalavaṭṭadukkhasamatikkamāya saṃvattatīti dassento "bahiddhā ^2- bhikkhave viññāṇe"tiādimāha, taṃ vuttanayameva. Yaṃ pana vuttaṃ "āyatiṃ jātijarāmaraṇadukkhasamudayasambhavo na hotī"ti, tassattho:- evaṃ vipassanaṃ maggena ghaṭetvā maggapaṭipāṭiyā aggamaggena anavasesato kilesesu khīṇesu āyatiṃ anāgate jātijarāmaraṇasakalavaṭṭadukkhassa samudayasaṅkhāto sambhavo uppādo ca na @Footnote: ¹ cha.Ma. vajjento ² Sī. bahiddhā cassa

--------------------------------------------------------------------------------------------- page340.

Hoti, jātisaṅkhāto vā dukkhasamudayo jarāmaraṇasaṅkhāto dukkhasambhavo ca na hoti. Gāthāyaṃ sattasaṅgappahīnassāti taṇhāsaṅgo diṭṭhisaṅgo mānasaṅgo kodhasaṅgo avijjāsaṅgo kilesasaṅgo duccaritasaṅgoti imesaṃ sattannaṃ saṅgānaṃ pahīnattā sattasaṅgappahīnassa. Keci pana "sattatānusayā eva satta saṅgā"ti vadanti. Netticchinnassāti chinnabhavanettikassa. Vikkhīṇo jātisaṃsāroti punappunaṃ jāyanavasena pavattiyā jātihetukattā ca jātibhūto saṃsāroti jātisaṃsāro, so bhavanettiyā chinnattā vikkhīṇo parikkhīṇo, tato eva natthi tassa punabbhavoti. Pañcamasuttavaṇṇanā niṭṭhitā. --------------

The Pali Atthakatha in Roman Book 27 page 338-340. http://84000.org/tipitaka/atthapali/read_rm.php?B=27&A=7492&pagebreak=1 อรรถกถาบาลีอักษรไทย :- http://84000.org/tipitaka/atthapali/read_th.php?B=27&A=7492&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=25&i=274 เนื้อความพระไตรปิฎกฉบับหลวง :- http://84000.org/tipitaka/read/r.php?B=25&A=6383 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=25&A=6256 The Pali Tipitaka in Roman Character :- http://84000.org/tipitaka/read/roman_read.php?B=25&A=6256 Contents of The Tipitaka Volume 25 http://84000.org/tipitaka/read/?index_25