ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
first pageprevious pagedispage pageNumbernext pagelast page chage to ENGLISH letter
Atthakatha Book 2 : PALI ROMAN Vinaya.A. (samanta.2)

     Tena samayenāti accekacīvarasikkhāpadaṃ. Tattha dasāhānāgatanti
dasa ahāni dasāhaṃ. Tena dasāhena anāgatā dasāhānāgatā.
Dasāhena asampattāti attho. Taṃ dasāhānāgataṃ.
Accantasaṃyogavasena bhummatthe upayogavacanaṃ. Tenevassa padabhājane
dasāhānāgatāyāti vuttaṃ. Pavāraṇāyāti idaṃ pana yā dasāhānāgatāti
vuttā taṃ sarūpato dassetuṃ asammohatthaṃ anuppayogavacanaṃ.
Kattikatemāsipuṇṇamanti paṭhamakattikatemāsipuṇṇamaṃ. Idhāpi
paṭhamapadassa anuppayogattā purimanayeneva bhummatthe upayogavacanaṃ.
Idaṃ vuttaṃ hoti yato paṭṭhāya paṭhamamahāpavāraṇā dasāhānāgatāti
vuccati sacepi tāni divasāni accantameva bhikkhuno accekacīvaraṃ
uppajjeyya accekaṃ idanti jānamānena bhikkhunā sabbaṃpi
paṭiggahetabbanti. Tena pavāraṇamāsassa juṇhapakkhapañcamito
paṭṭhāya uppannassa cīvarassa nidhānakālo dassito hoti. Kāmaṃ
cesa dasāhaparamaṃ atirekacīvaraṃ dhāretabbanti imināva siddho
atthuppattivasena 1- apubbaṃ viya atthaṃ dassetvā sikkhāpadaṃ ṭhapitaṃ.
Accekacīvaranti accāyikacīvaraṃ vuccati. Tassa pana accāyikabhāvaṃ
@Footnote: 1. ito paraṃ pana nipāto icchitabbo.
Dassetuṃ senāya vā gantukāmo hotīti ādi vuttaṃ. Tattha
saddhāti iminā saddhāmattakameva dassitaṃ. Pasādoti iminā
suppasannā balavasaddhā. Etaṃ accekacīvaraṃ nāmāti ettha
imehi kāraṇehi dātukāmena dūtaṃ vā pesetvā sayaṃ vā āgantvā
vassāvāsikaṃ dassāmīti evaṃ ārocitacīvaraṃ accekacīvaraṃ nāma
hotīti. Chaṭṭhito paṭṭhāya panuppannaṃ anaccekacīvaraṃpi paccuddharitvā
ṭhapitaticīvaraṃpi etaṃ parihāraṃ labhatiyeva. Saññāṇaṃ katvā
nikkhipitabbanti kiñci nimittaṃ katvā ṭhapetabbaṃ. Kasmā etaṃ
vuttaṃ. Yadi hi  taṃ pure pavāraṇāya vibhajanti yena gahitaṃ
tena chinnavassena na bhavitabbaṃ. Sace pana chinnavasso hoti
cīvaraṃ saṅghikameva hoti. Tato sallakkhetvā sukhaṃ dātuṃ bhavissatīti.
Accekacīvare accekacīvarasaññīti evamādi vibhajitvā gahitameva sandhāya
vuttaṃ. Sace pana avibhattaṃ hoti saṅghassa vā bhaṇḍāgārikacīvaraṃ
samayātikkamepi anāpatti. Iti atirekacīvarassa dasāhaṃ parihāro.
Ticīvarassa ekadivasampi parihāro natthi. Akatassa vassikasāṭikacīvarassa
anatthate kaṭhine pañca māsā vasse ukkaḍḍhite chammāsā
atthate kaṭhine apare cattāro māsā hemantassa pacchime
divase satiyā paccāsāya mūlacīvarādhiṭṭhānavasena aparopi eko
māsoti ekādasamāsā parihāro. Accekacīvarassa anatthate
kaṭhine ekādasadivasādhiko māso atthate kaṭhine ekādasadivasādhikā
pañcamāsā tato paraṃ ekadivasampi parihāro natthīti veditabbaṃ.
Anaccekacīvareti accekacīvarasadise aññasmiṃ. Sesamettha
uttānamevāti ca kaṭhinasamuṭṭhānaṃ akiriyā nosaññāvimokkhaṃ acittakaṃ
paṇṇattivajjaṃ kāyakammaṃ vacīkammaṃ ticittaṃ tivedananti.
                   Accekacīvarasikkhāpadaṃ.



             The Pali Atthakatha in Roman Book 2 page 275-277. http://www.84000.org/tipitaka/atthapali/read_rm.php?B=2&A=5787              อรรถกถาบาลีอักษรไทย :- http://www.84000.org/tipitaka/atthapali/read_th.php?B=2&A=5787              อ่านอรรถกถาแปลไทย :- http://www.84000.org/tipitaka/attha/attha.php?b=1&i=233              เนื้อความพระไตรปิฎกฉบับหลวง :- http://www.84000.org/tipitaka/read/r.php?B=1&A=8692              พระไตรปิฎกฉบับบาลีอักษรไทย :- http://www.84000.org/tipitaka/read/pali_read.php?B=1&A=3385              The Pali Tipitaka in Roman Character :- http://www.84000.org/tipitaka/read/roman_read.php?B=1&A=3385              Contents of The Tipitaka Volume 1 http://www.84000.org/tipitaka/read/?index_1

first pageprevious pagedispage pageNumbernext pagelast page chage to ENGLISH letter

บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ DhammaPerfect@yahoo.com