Atthakatha Book 2 : PALI ROMAN
Vinaya.A. (samanta.2)

     {570} Catutthasikkhāpade. Avaruddhā hontīti paṭiviruddhā honti.
     {573} Pañcannaṃ paṭisaṃviditanti pañcasu sahadhammikesu yaṅkiñci pesetvā
khādanīyaṃ vā bhojanīyaṃ vā āharissāmāti paṭisaṃviditaṃ kataṃpi
apaṭisaṃviditamevāti attho. Ārāmaṃ ārāmūpacāraṃ ṭhapetvāti
āraññakasenāsanārāmaṃ ca tassa upacāraṃ ca ṭhapetvā upacārato
nikkhantaṃ antarāmagge bhikkhuṃ disvā vā gāmaṃ āgatassa vā paṭisaṃviditaṃ
kataṃpi apaṭisaṃviditameva hotīti veditabbaṃ. Sace sāsaṅkaṃ hoti
Sāsaṅkanti ācikkhitabbanti kasmā ācikkhitabbaṃ. Ārāme core
vasante amhākaṃ nārocentīti vacanaparimocanatthaṃ. Corā
vattabbā manussā idhūpacarantīti kasmā vattabbā. Attano
upaṭṭhākehi amhe gaṇhāpentīti vacanaparimocanatthaṃ. Yāguyā
paṭisaṃvidite tassā parivāro āharīyatīti yāguyā paṭisaṃviditaṃ katvā
kiṃ suddhayāguyā dinnāya pūvabhattādīnipi etissā yāguyā parivāraṃ
katvā dassāmāti evaṃ yaṅkiñci āharanti sabbaṃ paṭisaṃviditameva
hoti. Bhattena paṭisaṃviditetiādīsupi eseva nayo. Asukannāma
kulaṃ paṭisaṃviditaṃ katvā khādanīyādīni gahetvā gacchatīti sutvā
aññānipi tena saddhiṃ attano deyyadhammaṃ āharanti vaṭṭati.
Yāguyā paṭisaṃviditaṃ katvā pūvaṃ vā bhattaṃ vā āharanti etaṃpi
vaṭṭatīti kurundiyaṃ vuttaṃ. {575} Gilānassāti apaṭisaṃviditepi gilānassa
anāpatti. Paṭisaṃvidite vā gilānassa vā sesakanti ekassatthāya
paṭisaṃviditaṃ katvā āhaṭaṃ tassa sesakaṃ aññassāpi bhuñjituṃ
vaṭṭati. Catunnaṃ vā pañcannaṃ vā paṭisaṃviditaṃ katvā bahuṃ
āhaṭaṃ hoti aññesaṃpi dātuṃ icchanti. Etaṃpi paṭisaṃviditasesakameva
sabbesaṃpi vaṭṭati. Atha adhikameva hoti sannidhiṃ mocetvā
ṭhapitaṃ dutiyadivasepi vaṭṭati. Gilānassa āhaṭāvasesepi eseva
nayo. Yaṃ pana apaṭisaṃviditameva katvā āhaṭaṃ taṃ bahiārāmaṃ
pesetvā paṭisaṃviditaṃ kāretvā āharāpetabbaṃ. Bhikkhūhi vā
gantvā antarāmagge gahetabbaṃ. Yaṃpi vihāramajjhena gacchantā vā
Vanacarakādayo vā vanato āharitvā denti purimanayeneva paṭisaṃviditaṃ
kāretabbaṃ. Tattha jātakanti ārāme jātakameva mūlakhādanīyādiṃ
aññena kappiyaṃ katvā dinnaṃ paribhuñjato anāpatti. Sace pana
naṃ gāmaṃ haritvā pacitvā āharanti na vaṭṭati paṭisaṃviditaṃ
kāretabbaṃ. Sesamettha uttānameva. Kaṭhinasamuṭṭhānaṃ kiriyākiriyaṃ
nosaññāvimokkhaṃ acittakaṃ paṇṇattivajjaṃ kāyakammaṃ vacīkammaṃ
ticittaṃ tivedananti.
     Catutthapāṭidesanīyaṃ samattaṃ vaṇṇanākkamenāti.
Samantapāsādikāya vinayasaṃvaṇṇanāya pāṭidesanīyavaṇṇanā niṭṭhitā.
                    ---------------


             The Pali Atthakatha in Roman Book 2 page 490-492.
http://84000.org/tipitaka/atthapali/read_rm.php?B=2&A=10338
             อรรถกถาบาลีอักษรไทย :-
http://84000.org/tipitaka/atthapali/read_th.php?B=2&A=10338
             อ่านอรรถกถาแปลไทย :-
http://84000.org/tipitaka/attha/attha.php?b=1&i=
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=1&A=
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=1&A=
             The Pali Tipitaka in Roman Character :-
http://84000.org/tipitaka/read/roman_read.php?B=1&A=
             Contents of The Tipitaka Volume 1
http://84000.org/tipitaka/read/?index_1