Atthakatha Book 15 : PALI ROMAN
Aṅ.A. (manoratha.2)

page287.
                     9. Taṇhuppādasuttavaṇṇanā
     [9] Navame uppajjati etesūti uppādā. Kā uppajjati? taṇhā.
Taṇhāya uppādā taṇhuppādā, taṇhāvatthūni taṇhākāraṇānīti attho.
Cīvarahetūti "kattha manāpaṃ cīvaraṃ labhissāmī"ti  cīvarakāraṇā uppajjati. Itibhavābhava-
hetūti ettha itīti nidassanatthe 1- nipāto. Yathā cīvarādihetu, evaṃ bhavābhavahetupīti
attho. Bhavābhavoti cettha paṇītappaṇītatarāni 2- sappinavanītādīna adhippetāni.
Sampattibhavesu paṇītatarapaṇītatamabhavotipi vadanti. 3-
     Taṇhādutiyoti ayañhi satto anamatagge saṃsāravaṭṭe saṃsaranto na ekakova
saṃsarati, taṇhaṃ pana dutiyikaṃ labhantova saṃsarati. Tena vuttaṃ "taṇhādutiyo"ti.
Itthabhāvaññathābhāvanti ettha itthabhāvo nāma ayaṃ attabhāvo, aññathābhāvo
nāma anāgatattabhāvo. Evarūpo vā aññopi attabhāvo itthabhāvo nāma, na
evarūpo aññathābhāvo nāma. Taṃ itthabhāvaññathābhāvaṃ. Saṃsāranti khandhadhātu-
āyatanapaṭipāṭiṃ. 4- Nātivattatīti nātikkamati. Evamādīnavaṃ ñatvāti evaṃ atītānāgata-
paccuppannesu khandhesu ādīnavaṃ jānitvā. Taṇhaṃ dukkhassa sambhavanti taṇhaṃ ca 5-
"ayaṃ vaṭṭadukkhassa sambhavo pabhavo 6- kāraṇan"ti evaṃ jānitvā. Ettāvatā
imassa bhikkhuno vipassanaṃ vaḍḍhetvā arahattappattabhāvo dassito. Idāni taṃ
khīṇāsavaṃ thomento vītataṇhotiādimāha. Tattha  anādānoti niggahaṇo. Sato
bhikkhu paribbajeti satisampajaññavepullappatto 7- khīṇāsavo bhikkhu sato sampajāno
careyya vihareyyāti attho. Iti suttante vaṭṭaṃ kathetvā gāthāsu vaṭṭavivaṭṭaṃ
kathitanti.
@Footnote: 1 Sī. nidassane     2 cha.Ma. paṇītatarāni
@3 cha.Ma. vadantiyeva   4 cha.Ma. khandhadhātuāyatanānaṃ paṭipāṭiṃ
@5 Ma. taṇhaṃva   6 cha.Ma. ayaṃ vaṭṭadukkhasambhūto sabhāvo
@7 Sī. satisampajaññe vepullappatto


             The Pali Atthakatha in Roman Book 15 page 287.
http://84000.org/tipitaka/atthapali/read_rm.php?B=15&A=6634&pagebreak=1
             อรรถกถาบาลีอักษรไทย :-
http://84000.org/tipitaka/atthapali/read_th.php?B=15&A=6634&pagebreak=1
             อ่านอรรถกถาแปลไทย :-
http://84000.org/tipitaka/attha/attha.php?b=20&i=82
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=20&A=332
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=20&A=357
             The Pali Tipitaka in Roman Character :-
http://84000.org/tipitaka/read/roman_read.php?B=20&A=357
             Contents of The Tipitaka Volume 20
http://84000.org/tipitaka/read/?index_20