AtthaPali Vol.13

3. Aṭṭhasatapariyāyavagga 1. Sīvakasuttavaṇṇanā [269] Tatiyavaggassa paṭhame moḷiyasīvakoti sīvakoti tassa nāmaṃ. Cūḷā panassa atthi, tasmā moḷiyasīvakoti vuccati. Paribbājakoti channaparibbājako. Pittasamuṭṭhānānīti pittapaccayāni. Vedayitānīti vedanā. Tattha pittapaccayā tisso vedanā uppajjanti, kathaṃ? ekacco hi "pittaṃ me kuppitaṃ, dujjānaṃ kho pana jīvitan"ti dānaṃ deti, sīlaṃ samādiyati, uposathakammaṃ karoti, evamassa kusalavedanā uppajjati, ekacco "pittabhesajjaṃ karissāmī"ti pāṇaṃ hanati, adinnaṃ ādiyati, musā bhaṇati, dasa dussīlayakammāni karoti, evamassa akusalavedanā uppajjati. Ekacco "ettakenapi me bhesajjakaraṇena pittaṃ na vūpasammati, alaṃ yaṃ hotu, ^1- taṃ hotū"ti majjhato kāyikavedanaṃ adhivāsento nipajjati, evamessa abyākatavedanāva uppajjati. Sāmampi kho etanti taṃ taṃ pittavikāraṃ disvā attanāpi etaṃ veditabbaṃ. Saccasammatanti bhūtaṃ sammataṃ. Lokopi hissa sarīre sabalavaṇṇatādipittavikāraṃ @Footnote: ¹ cha.Ma. hoti Disvā "pittamassa kuppitan"ti jānāti. Tasmāti yasmā sāmañca viditaṃ lokassa ca saccasammataṃ adhidhāvanti, tasmā. Semhasamuṭṭhānādīsupi eseva nayo. Ettha pana sannipātikānīti tiṇṇampi pittādīnaṃ kopena samuṭṭhitāni. Utupariṇāmajānīti visabhāgaututo jātāni. Jaṅgaladesavāsīnaṃ hi anuppadese ^1- vasantānaṃ visabhāgo utu uppajjati, anupadesanañca jaṅgaladeseti evaṃ malayasamuddatīrādivasenāpi utu visabhāgatā uppajjatiyeva. Tato jātāti utupariṇāmajātāni. Visamaparihārajānīti mahābhāravahanasudhākoṭṭanādito vā avelāya carantassa sappaḍaṃsanakuppapātādito vā visamaparihārato jātāni. Opakkamikānīti "ayaṃ coro vā pāradāriko vāti gahetvā jannukakapparamuggarādīhi nippothanaupakkamaṃ paccayaṃ katvā uppannāni. Etaṃ bahi upakkamaṃ labhitvā koci vuttanayeneva kusalaṃ karoti, koci akusalaṃ, koci adhivāsento nipajjati. Kammavipākajānīti kevalaṃ kammavipākatova jātāni. Tesupi hi uppannesu vuttanayeneva koci kusalaṃ karoti, koci akusalaṃ, koci adhivāsento nipajjati. Evaṃ sabbavāresu tividhāva vedanā honti. Tattha purimehi sattahi kāraṇehi uppannā sārīrikā vedanā sakkā paṭibāhituṃ, kammavipākajānaṃ pana sabbabhesajjānipi sabbaparittānipi nālaṃ paṭighātāya. Imasmiṃ sutte lokavohāro nāma kathitoti.

The Pali Atthakatha in Roman Book 13 page 142-143. http://84000.org/tipitaka/atthapali/read_rm.php?B=13&A=3118 อรรถกถาบาลีอักษรไทย :- http://84000.org/tipitaka/atthapali/read_th.php?B=13&A=3118 อ่านอรรถกถาแปลไทย :- http://84000.org/tipitaka/attha/attha.php?b=18&i=427 เนื้อความพระไตรปิฎกฉบับหลวง :- http://84000.org/tipitaka/read/r.php?B=18&A=6098 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=18&A=5795 The Pali Tipitaka in Roman Character :- http://84000.org/tipitaka/read/roman_read.php?B=18&A=5795 Contents of The Tipitaka Volume 18 http://84000.org/tipitaka/read/?index_18