บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
4. Sambahulasuttavaṇṇanā [224] Catutthe sambahulāti bahū suttantikā ābhidhammikā vinayadharā ca. Viharantīti satthu santike kammaṭṭhānaṃ gahetvā viharanti. Pakkamiṃsūti te kira tasmiṃ janapade aññataraṃ gāmaṃ upasaṅkamante disvāva manussā pasannacittā āsanasālāya kojavattharaṇādīni 1- paññāpetvā yāgukhajjakaṃ 2- datvā upanisīdiṃsu. Mahāthero ekaṃ dhammakathikaṃ "dhammaṃ kathehī"ti āha. So cittadhammakathaṃ kathesi. Manussā pasīditvā bhojanavelāya paṇītabhojanaṃ adaṃsu. Mahāthero manuññaṃ bhattānumodanaṃ akāsi. Manussā bhiyyoso mattāya pasannā "idheva bhante temāsaṃ vasathā"ti paṭiññaṃ kāretvā gamanāgamanasampanne ṭhāne senāsanāni kāretvā catūhi paccayehi upaṭṭhahiṃsu. Mahāthero vassūpanāyikadivase bhikkhū ovadi "āvuso tumhehi garukassa satthu santike kammaṭṭhānaṃ gahitaṃ, buddhapātubhāvo nāma dullabho māsassa aṭṭha divase dhammassavanaṃ katvā gaṇasaṅgaṇikaṃ pahāya appamattā viharathā"ti. Te tato @Footnote: 1 i. kojavaṭṭharaṇādīni 2 cha.Ma. yāgukhajjakāni, i. yāgukhajjakādīni Paṭṭhāya yuñjanti ghaṭenti. Kadāci sabbarattikaṃ 1- dhammassavanaṃ karonti, kadāci pañhaṃ vissajjenti, kadāci padhānaṃ karonti. Tesaṃ dhammassavanadivase dhammaṃ kathentānaṃyeva aruṇaṃ 2- uggacchati. Pañhavissajjanadivase byatto bhikkhu pañhaṃ pucchati, paṇḍito vissajjetīti pucchanavissajjanaṃ karontānaṃyeva. Padhānadivase suriyatthaṅgamane gaṇḍiṃ paharitvāva caṅkamaṃ otaritvā padhānaṃ karontānaṃyeva. Te evaṃ vassaṃ vasitvā pavāretvā pakkamiṃsu. Taṃ sandhāyetaṃ vuttaṃ. Paridevamānāti "idāni tathārūpaṃ madhuraṃ dhammassavanapañhakathanaṃ 3- kuto labhissāmī"tiādīni vatvā rodamānā. Khāyatīti paññāyati upaṭṭhāti. Kometi kahaṃ ime. Vajjibhūmiyāti vajjīraṭṭhābhimukhagatā. 4- Magā 5- viyāti yathā magā tasmiṃ pabbatapāde vā vanasaṇḍe vā vicarantā "idaṃ amhākaṃ mātusantakaṃ pitusantakaṃ paveṇiāgatan"ti agahetvā yattheva nesaṃ gocaraphāsutā ca hoti paripanthābhāvo ca, tattha viharanti. Evaṃ aniketā agehā bhikkhavopi "ayaṃ āvuso amhākaṃ ācariyūpajjhāyānaṃ santako paveṇiāgato"ti agahetvā yattheva nesaṃ utusappāyaṃ bhojanasappāyaṃ senāsanasappāyaṃ puggalasappāyaṃ 6- dhammassavanasappāyaṃ ca sulabhaṃ hoti, tattha viharanti. Catutthaṃ.The Pali Atthakatha in Roman Book 11 page 275-276. http://84000.org/tipitaka/atthapali/read_rm.php?B=11&A=7120 อรรถกถาบาลีอักษรไทย :- http://84000.org/tipitaka/atthapali/read_th.php?B=11&A=7120 อ่านอรรถกถาแปลไทย :- http://84000.org/tipitaka/attha/attha.php?b=15&i=768 เนื้อความพระไตรปิฎกฉบับหลวง :- http://84000.org/tipitaka/read/r.php?B=15&A=6443 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=15&A=5729 The Pali Tipitaka in Roman Character :- http://84000.org/tipitaka/read/roman_read.php?B=15&A=5729 Contents of The Tipitaka Volume 15 http://84000.org/tipitaka/read/?index_15
|
บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]